រាជធានីភ្នំពេញ៖ បុរសម្នាក់បើករថយន្តស៊េរីទំនើបម៉ាក BMW មួយគ្រឿងក្នុងស្ថានភាពល្បឿនលឿនខ្វះការប្រុងប្រយ័ត្នក៏បានជ្រុលទៅបុកឡើងខឿនសួនច្បារបណ្ដាលឲ្យរថយន្តរងការខូចខាតយ៉ាងដំណំ។
ហេតុការណ៍នេះកើតឡើងនៅវេលាម៉ោង១២ យប់រំលងអាធ្រាតឈានចូលថ្ងៃទី ១១ ខែឧសភា ឆ្នាំ ២០២២ ស្ថិតតាមបណ្ដោយផ្លូវ ១១៨ កែងជាមួយនឹងផ្លូវមហាវិថីព្រះស៊ីសុវត្ថិ សង្កាត់ផ្សារកណ្ដាលទី ១ ខណ្ឌដូនពេញ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានប្រាប់ឲ្យបានដឹងថា៖ នៅមុនពេលកើតហេតុគេបានឃើញរថយន្តស៊េរីទំនើបម៉ាក BMW មួយគ្រឿង ពណ៌ខ្មៅ ពាក់ស្លាកលេខភ្នំពេញ 2AQ-7826 បេីកបរដោយបុរសម្នាក់ បានធ្វើដំណើរតាមមិនដល់ផ្លូវ ១១៨ ក្នុងទិសដៅពីលិចទៅកើត។
លុះពេលធ្វើដំណើរមកដល់ត្រង់ចំណុចកើតហេតុកែងនឹងផ្លូវមហាវិថីព្រះស៊ីសុវត្ថិ ដោយបើកបរក្នុងស្ថានភាពស្រវឹង ល្បឿនបោះពួយយ៉ាងលឿនថែមទាំងខ្វះការប្រុងប្រយ័ត្នក៏ជ្រុលបុកឡើងខឿនសួនច្បារពេញទំហឹងបណ្ដាលឲ្យរថយន្តរងការខូចខាតចំផ្នែកខាងមុខស្ទើរទាំងស្រុង។
ក្រោយពេលកើតហេតុសមត្ថកិច្ចជំនាញផ្នែកចរាចរណ៍បានធ្វើការវាស់វែងរួចបានយករថយន្តទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញរងចាំធ្វើការដោះស្រាយគ្នានៅពេលក្រោយបន្តទៀតផងដែរ៕
