រាជធានីភ្នំពេញ៖ ក្មេងតូចពីរនាក់រងរបួសដើមឈើមួយដើមបាក់រាបដល់ដី ឯរទេះលក់គុយទាវពីររទេះ និងបន្លែជាច្រើរាយប៉ាយពេញលើចិញ្ចើមផ្លូវក្រោយនារីពីរនាក់បើករថយន្ដសេរីទំនើបបុករះនៅសង្កាត់ផ្សារដើមគ។ ហេតុការណ៍នេះកើតឡើងនៅវេលាម៉ោង ១យប់រំលងអាធ្រាត្រឈានចូលថ្ងៃទី ១១ ខែឧសភា ឆ្នាំ ២០២២ ស្ថិតតាមបណ្ដោយផ្លូវ ២១៧ ក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានប្រាប់អោយបានដឹងថា៖ នៅមុនពេលកើតហេតុគេបានឃើញរថយន្តស៊េរីទំនើបម៉ាក ឡង់គ្រីស័រ មួយគ្រឿង ពណ៌ខ្មៅពាក់ស្លាកលេខភ្នំពេញ 2V-6686 បើកដោយនារីម្នាក់និងម្នាក់ទៀតរួមដំណើរ បានធ្វើដំណើរតាមបណ្ដោយផ្លូវ ២១៧ ក្នុងទិសដៅពីជើងទៅត្បូង។
លុះពេលធ្វើដំណើរមកដល់ត្រង់ចំណុចកើតហេតុដោយបើកបរក្នុងស្ថានភាពបោះពួយយ៉ាងលឿន ថែមទាំងខ្វះការប្រុងប្រយ័ត្ន ក៏បានរេចង្កូតមកខាងស្ដាំបុកដើមឈើបាក់អស់ចំនួន១ដើម និងបន្តជ្រុលទៅបុករទេះលក់មីស៊ុបខ្ទាតទឹកស៊ុបរលាកក្មេងតូចចំនួន២នាក់រងរបួសធ្ងន់ធ្ងរត្រូវបានរថយន្តសាមុយដឹកយកទៅសង្គ្រោះបន្ទាន់ភ្លាមៗ។
រថយន្តមិនទាន់អស់ល្បឿនក៏បន្តទៅបុកកន្លែងលក់បន្លែបន្ថែមទៀតបណ្ដាលឲ្យរថយន្តរងការខូចខាតចំផ្នែកខាងមុខយ៉ាងដំណំ។
ក្រោយពេលកើតហេតុសមត្ថកិច្ចជំនាញផ្នែកចរាចរណ៍បានធ្វើការវាស់វែង និងបានយករថយន្តទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយគ្នាទៅតាមសន្តិវិធីផ្លូវច្បាប់នៅពេលក្រោយបន្តទៀតផងដែរ៕
