ក្រុមបាល់ទះឆ្នេរខ្សាច់របស់កម្ពុជា ទាំងក្រុមទី១ និងក្រុមទី២ បានយកឈ្នះលើក្រុមរបស់សិង្ហបុរី ទាំង២ក្រុម ក្នុងវគ្គសន្សំពិន្ទុ ពូល A នៃព្រឹត្តិការណ៍កីឡាស៊ីហ្គេមលើកទី៣១ នៅប្រទេសវៀតណាម នារសៀលថ្ងៃចន្ទ ទី១៦ ខែឧសភា ឆ្នាំ២០២២ នេះ។
ក្រុមទី១របស់កម្ពុជា មានកីឡាករ ជុក សុភា និង ធី ម៉េងហួង បានយកឈ្នះលើក្រុមរបស់សិង្ហបុរី ដោយលទ្ធផល ៣សិតទល់១ ( ២១-១៧,១៣-២១ និង១៥-៧)។ ចំណែកក្រុមទី២ របស់កម្ពុជា មានកីឡាករ សោម សាមីត និង អ៊ឹម ណារិទ្ធិ បានយកឈ្នះលើក្រុមសិង្ហបុរី ដោយលទ្ធផល ២សិតទល់០ ។
នេះជាជ័យជម្នះដំបូងរបស់កម្ពុជា ខណៈប្រកួតបើកឆាកកម្ពុជា បានចាញ់វៀតណាម ដោយលទ្ធផល ២ប្រកួត ទល់១ ប្រកួត ក្នុងចំណោមក្រុមទាំង២ក្រុមរបស់កម្ពុជា។
សម្រាប់ប្រកួតបន្តកម្ពុជា ទាំង២ក្រុម នឹងជួបក្រុមហ្វីលីពីន ទាំង២ក្រុម នៅវេលាម៉ោង៩:៣០នាទីព្រឹក ថ្ងៃអង្គារ ទី១៧ ខែឧសភា ស្អែកនេះ។
ព្រឹត្តិការណ៍កីឡាស៊ីហ្គេមលើកទី៣១ មាន២ពូល ដោយពូល A មានម្ចាស់ផ្ទះវៀតណាម, កម្ពុជា,សិង្ហបុរី និងហ្វីលីពីន ខណៈពូល B មាន ថៃ, ឥណ្ឌូណេស៊ី, ម៉ាឡេស៊ី និងឡាវ។ ក្រោយចប់វគ្គសន្សំពិន្ទុតាមពូល ក្រុមលេខ១និងលេខ២ មានឈ្មោះឡើងទៅលេងវគ្គពាក់កណ្ដាលផ្ដាច់ព្រ័ត្រ ជាបន្ត៕
