បន្ទាប់ពីរក្សាភាពស្ងៀមស្ងាត់មួយរយៈក្រោយពីមានបុគ្គលម្នាក់យកស្បែកជើងគប់ទៅលើសម្តេចនៅក្នុងជំនួបមួយ ជាមួយពលរដ្ឋខ្មែរនៅសហរដ្ឋអាមេរិកកាលពីពេលថ្មីៗនេះ ប្រមុខរាជរដ្ឋាភិបាលកម្ពុជាសម្តេចតេជោហ៊ុន សែន បានមានប្រសាសន៍នៅព្រឹកថ្ងៃទី១៧ខែឧសភាឆ្នាំ២០២២នេះ បានថ្លែងថា សម្តេចមិនទាមទារឲ្យអាមេរិកមានវិធានការ ចំពោះបុគ្គលនោះឡើយ ប៉ុន្តែសម្តេចទុកឲ្យអាមេរិកជាអ្នកសម្រេចដោយខ្លួនឯង។
ការថ្លែងរបស់សម្តេចយ៉ាងដូច្នេះបានធ្វើឡើងក្នុងពេលសម្តេចអញ្ជើញជួបសំណេះសំណាលជាមួយក្រុមគ្រូពេទ្យ ស្ម័គ្រចិត្តយុវជនសម្តេចតេជោនៅព្រឹកថ្ងៃអង្គារនេះ។
សម្តេចបានបញ្ជាក់ថា រឿងនេះជាករណីរបស់រដ្ឋាភិបាលអាមេរិកសុទ្ធសាធ ដែលបុគ្គលម្នាក់បានយកស្បែកជើង ទៅគប់មេដឹកនាំប្រទេសមួយ ហើយអាមេរិកចាត់ទុកថាជារឿងបញ្ចេញមតិនោះ។ សម្រាប់សម្តេចតេជោ បើសិនជាករណីនេះ អាមេរិកថា ជាការបញ្ចេញមតិនោះ សម្តេចថា ករណីបែបនេះនឹងអាចកើតមាននៅតាមបណ្តាប្រទេស ផ្សេងទៀត ក្នុងនោះមានទាំងប្រទេសកម្ពុជាផងដែរ។
សូមរំលឹកថា នៅក្នុងពិធីសំណេះសំណាលជាមួយពលរដ្ឋខ្មែរនៅសហរដ្ឋអាមេរិក ដែលត្រូវបានផ្សព្វផ្សាយលើបណ្ដាញសង្គមនានា បានបង្ហាញពីបុរសវ័យជាង៦០ប្លាយឆ្នាំម្នាក់ បានដោះស្បែកជើងប៊ូរបស់ខ្លួន គប់សំដៅសម្តេចនាយករដ្ឋមន្ត្រី ហ៊ុន សែន ដែលកំពុងថតរូប Selfie ជាមួយអ្នកគាំទ្រ។ ប៉ុន្តែជាសំណាងល្អ ស្បែកជើងនេះមិនត្រូវចំសម្តេចនោះឡើយ ដោយធ្លាក់ចំទូរសព្ទដៃរបស់អ្នកគាំទ្រស្ទើរតែជ្រុះចេញពីដៃ។
សម្រាប់មជ្ឈដ្ឋានអ្នកប្រឆាំង បានហៅបរុសដែលហ៊ានគប់ស្បែកជើងទៅលើសម្តេចតេជោនោះថា ជាវីរបុរស ខណៈដែលពលរដ្ឋកម្ពុជា ភាគច្រើនជាពិសេសក្នុងចំណោមអ្នកគាំទ្រគណបក្សប្រជាជនបានថ្កោលទោសនិងចាត់ទុកទង្វើនោះថា ជាការប្រមាថដ៏ធ្ងន់ធ្ងរនិងមិន អាចទទួលយកបាននោះឡើយ។
អ្នកនាំពាក្យគណបក្សប្រជាជនកម្ពុជា ឯកឧត្តម សុខ ឥសានបានមានប្រសាសន៍តាមរយៈសារព័ត៌មានក្នុងស្រុកថា នេះគឺជាសេរីភាពនៃការបញ្ចេញមតិសម្រាប់ប្រទេសប្រកាន់លទ្ធិប្រជាធិបតេយ្យ តែឯកឧត្តមទទូចឱ្យអាជ្ញាធរ អាមេរិកចាត់វិធានការច្បាប់លើជនបង្កហេតុ ហើយនាំយកមកទទួលខុសត្រូវចំពោះមុខច្បាប់របស់អាមេរិកផងដែរ៕