ក្រោយទទួលបានដំណឹងតារាភាពយន្តជើងចាស់លោកតា រិទ្ធិ សារី ឈឺធ្ងន់ជាលើកទី ២ ភ្លាមៗគេស្រាប់តែឃើញអតីតតារាសម្ដែង ស៊ុក សុភា ឬនេនទុំ បានប្រញាប់ចេញមកប្រកាសនៅលើបណ្ដាញសង្គម ស្វែងរកជំនួយសប្បុរសធម៌ពីនាយសមុទ្រដើម្បីជួយដល់លោកតាជាថ្មីម្ដងទៀត។
តាមសំណេរទាំងស្រុងរបស់លោក ស៊ុក សុភា បានរៀបរាប់ថា៖ «តារាភាពយន្ដជើងចាស់ដ៏ល្បី លោកពុក រិទ្ធ សារី សព្វថ្ងៃមានអាយុ ៨០ជាងឆ្នាំ ហើយលោកពុកកំពុងមានជំងឺសម្រាកព្យាបាលនៅមន្ទីពេទ្យខេត្តបាត់ដំបង ហើយនៅពេលនេះលោកពុកអស់លទ្ធភាពក្នុងការព្យាបាលជំងឺ ហើយលោកពុកសុំមកសម្រាកនៅផ្ទះវិញ អាណិតលោកពុកណាស់លោកអើយ😔😓🇰🇭។ ខ្ញុំបាទនឹងភរិយាព្រមទាំងកូនៗ បានជូនថវិការលោកពុកខ្លះដែរ ហើយប្រសិនបើបងប្អូនចង់ចូលរួមជាថវិការជូនគាត់អាចទាក់ទងមកខ្ញុំបាទបាន 😔👌»។
តារាប្រុសរូបនេះបានបង្ហោះរូបភាពពីអតីតកាលដែលលោកធ្លាប់សម្ដែងរួមគ្នាជាមួយលោកតា រិទ្ធ សារី និងបាននិយាយបន្ថែមទៀតថា ៖ «ជំងឺលោកពុក រើមកវិញទៀតហើយ អាណិតលោកពុកខ្លាំងណាស់ 😔»។
គេនៅចាំបានថា កាលពីអំឡុងឆ្នាំ ២០២១ លោក ស៊ុក សុភា បានប្រមូលថវិកាពីសប្បុរសជនឯនាយសមុទ្រ ដែលអាណិតចំពោះលោកតារិទ្ធិសារីបានចូលរួមផ្ដល់ជំនួយដល់លោកតា រិទ្ធ សារី សរុបចំនួនជិត ១ពាន់ដុល្លារអាមេរិកផងដែរ។ នេះសបញ្ជាក់ឱ្យឃើញថា អតីតតារាសម្ដែងប្រុសរូបនេះ នៅតែយកចិត្តទុកដាក់ចំពោះតារាភាពយន្តជើងចាស់ រិទ្ធ សារី ជានិច្ច៕
សូមចូលអាន៖ ស៊ុក សុភា ប្រមូលថវិកាពីបងប្អូនខ្មែរឯនាយសមុទ្រជួយតារាជើងចាស់តា រិទ្ធ សារី កំពុងឈឺ!
