​ជនសង្ស័យធ្វើសកម្មភាពឆក់ទូរសព្ទពីស្ត្រីបីនាក់បណ្ដាលឲ្យ ដួលរងរបួសធ្ងន់

ភ្នំពេញ៖ ស្ត្រី៣នាក់រងរបួសធ្ងន់ស្រាល បន្ទាប់ពីជិះម៉ូតូសុខត្រូវបានជនសង្ស័យមួយក្រុមធ្វើសកម្មភាពឆក់ទូរស័ព្ទដៃបានសម្រេច កាល វេលាម៉ោង៥ព្រឹកថ្ងៃសៅរ៍ ទី២៨ ខែឧសភា ឆ្នាំ ២០២២ត្រង់ចំណុចលើស្ពានអាកាស ស្ទឹងមានជ័យ ស្ថិតនៅក្នុងសង្កាត់ស្ទឹងមានជ័យទី ១ ខណ្ឌមានជ័យ ។

នារីរងគ្រោះជិះម៉ូតូឌុបគ្នាម៉ាកសូមើរ ពណ៌ក្រហម ពាក់ស្លាកលេខភ្នំពេញ1GG.9729 ទូរស័ព្ទដែលបាត់ទៅម៉ាក iPhone 11Pro Max

បើតាមការរៀបរាប់របស់នារីរងគ្រោះបាន ប្រាប់ឲ្យដឹងថារូបគាត់ទាំង៣នាក់បានជិះម៉ូតូឌុបគ្នាតាមបណ្ដាយផ្លូវ២៧១ក្នុងទិសដៅពីជើងមកត្បូងក្នុងល្បឿនល្មម ជិះបណ្តើរនិយាយទូរស័ព្ទ បណ្តើរ លុះមកដល់ចំណុចកើតហេតុខាងលើស្រាប់តែលេចមុខជនសង្ស័យ១ក្រុមជិះម៉ូតូមកពីក្រោយ ខណៈពេលនោះគ្នាគាត់ដែលជាអ្នកឌុបកំពុងតែនិយាយទូរស័ព្ទ ក៏ត្រូវជនសង្ស័យឆក់ទាញទូរស័ព្ទរបស់ពួកគាត់បានសម្រេច បណ្ដាលឱ្យដួលម៉ូតូបែកមុខបែកមាត់រងរបួសធ្ងន់ម្នាក់និងរលត់ដៃ ជើង២នាក់។ហើយជនសង្ស័យបានជិះចុះពីលើស្ពានអាកាសស្ទឹងមានជ័យឆ្ពោះទៅខាងពេទ្យរុស្ស៊ីបាត់ស្រមោល ភ្លាមៗត្រូវបានរថយន្តសារម៉ុយដឹកជនរងគ្រោះទាំង៣ នាក់ទៅមន្ទីរពេទ្យដើម្បីសង្គ្រោះជីវិតផងដែរ។

ក្រោយកើតហេតុសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី១ បានមកយកម៉ូតូជនរងគ្រោះទៅរក្សាទុកនៅប៉ុស្តិ៍រងចាំប្រគល់ឲ្យជនរងគ្រោះនៅពេលក្រោយ៕