យុវជន ពេជ្រ មូន ទទួលបានការស្ញើចសរសើរពីមហាជនអ្នកលេងបណ្ដាញសង្គមហ្វេសប៊ុក បន្ទាប់ពីគេឃើញលោកបានបញ្ចប់ការសិក្សាពីបណ្ឌិតសភាយោធាអាមេរិក ដោយការប្រឹងប្រែងសិក្សាអស់រយៈពេល៤ឆ្នាំ។
រូបភាពលោកយាយកាន់ខ្សែគោ និងក្រមាចងសៀវភៅ ពីទឹកខ្មែររហូតទៅដល់ទឹកដីអាមេរិក ប្រគល់ជូនចៅប្រុសជាទីស្រឡាញ់ បានរម្លឹកឱ្យមហាជនមើលឃើញថា ភាពជោគជ័យគឺបានមកពីការខិតខំប្រឹងប្រែងតស៊ូយ៉ាងជាក់លាក់។
ក្នុងរឿងនេះ មានហ្វេនម្នាក់លើកឡើងថា តាមរយៈការតស៊ូរបស់ យុវជន ពេជ្រ មូន គេទទួលបានបទពិសោធន៍មេរៀនជីវិត ៤ ចំណុចដែលមហាជនអ្នកលេងបណ្ដាញសង្គមហ្វេសប៊ុកមិនមើលគួររំលងដូចជា ៖
១- ការតស៊ូមិនខ្ជិល
ការតស៊ូព្យាយាមជាគន្លឹះនាំមកនូវជីវិតរីកចម្រើន មនុស្សដែលមានសេចក្ដីអំនត់អត់ធន់ និងការតស៊ូព្យាយាមជម្នះរាល់បញ្ហា រមែងតែងតែទទួលបាននូវភាពជោគជ័យតាមបំណងប្រាថ្នា និងបានប្រសើរជាងមនុស្សដែរមានភាពខ្ជិលច្រអូស។ ព្រោះសេចក្ដីខ្ជិលច្រអូសវាបានជះនូវឥទ្ធិពលអាក្រក់មកលើខ្លួនឯងយ៉ាងច្រើនបំផុត វាបានធ្វើឱ្យខាត់បង់នូវពេលវេលា និងធ្វើឱ្យបាត់បង់នូវឱកាសល្អៗជាច្រើន ផ្ទុយទៅវិញសេចក្ដីតស៊ូព្យាយាម រមែងទទួលនិងចាប់បាននូវឱកាស់ល្អៗជាច្រើនរាប់មិនអស់ផងដែរ។
២- ការមានចិត្តអំណត់
ពាក្យចាស់និយាយថា «ចង់ធំ ឱ្យខំពីតូច » សំដៅសេចក្តីថា រាល់រូបបុគ្គលទាំងអស់ដែលបំណងប្រាថ្នាចង់ធ្វើធំ ចង់មានបុណ្យសក្តិកេរ្តិ៍ឈ្មោះកិត្តិយសក្នុងសង្គម គឺត្រូវតែខិតខំប្រឹងប្រែងពីក្មេងវ័យ តាំងពីការរៀនសូត្រ ប្រកបកិច្ចការមុខរបរ តស៊ូអំណត់អត់ធន់ជម្នះនូវរាល់ឧបសគ្គដែលប្រឈមមុខ។ ជាតួយ៉ាង នៅក្នុងស្នាដៃអក្សរសិល្ប៍ រឿងកុលាបប៉ៃលិន តួអង្គចៅចិត្រ ដែលខិតខំកសាងខ្លួនតាំងពីកម្មករជីកត្បួងរហូតដល់ជាអ្នកកាន់បញ្ជី និងឈានដល់អ្នកគ្រប់គ្រងទ្រព្យសម្បត្តិរបស់លោកហ្លួងរតនសម្បត្តិទាំងមូល។ ដូចគ្នានេះដែរ យុវជន ពេជ្រ មូន បានរំដោះខ្លួនពីភាពក្រីក្រ ហើយតស៊ូសិក្សារហូតដល់ចប់ និងនាំមុខមាត់ឱ្យប្រទេសជាតិថែមទៀត។
៣- ការមានគោលដៅច្បាស់លាស់
នៅពេលដែលយើងមានគោលដៅក្នុងជីវិតច្បាស់លាស់ យើងប្រាកដជាព្យាយាមសម្រេចវាឱ្យបាន ទើបយើងអាចមានអារម្មណ៍ថា យើងទទួលបានជោគជ័យ។ ខុសគ្នាពីនេះ ការផ្ដោតលើលទ្ធផល ឬការទន្ទឹងចាំនេះអាចនឹងបណ្ដាលឱ្យមានភាពតានតឹង។ ជាក់ស្ដែងគេមើលឃើញថា យុវជន ពេជ្រ មូន បានដាក់គោលដៅជីវិតច្បាស់លាស់ និងបានធ្វើតាមក្ដីស្រម៉ៃរបស់ខ្លួនដែលប្រាថ្នាចង់បាន។
៤-ហ៊ានដាក់ជីវិត ដើម្បីភាពជោគជ័យ
យុវជន ពេជ្រ មូន ជាគំរូល្អមួយសម្រាប់យុវជនខ្មែរ លោកធ្លាប់ជាក្មេងឃ្វាលគោ មិនថាលោកជាកូនអ្នកកសិករមានជីវភាពរស់នៅខ្វះខាត តែលោកតស៊ូជម្នះគ្រប់ឧបសគ្គ ដើម្បីបានបន្តការសិក្សានៅឯសាលាដ៏ល្បីរបស់សហរដ្ឋអាមេរិក។ ហេតុនេះយុវជនគួរកុំយកភាពក្រីក្រ ជីវភាពខ្វះខាត មកធ្វើជាឧបសគ្គក្នុងការស្រូបយកចំណេះដឹង។ ពិតមែនទៅ បើយើងមានការតាំងចិត្ត មានការតស៊ូ ព្យាយាម លទ្ធផលទទួលបានពិតជាល្អប្រសើរ ដូចជាយុវជនពេជ្រ មូនមិនខានឡើយ៕
សូមអានបន្ត៖
ខ្សែគោ និងក្រមា ជាបាច់ផ្កានៅថ្ងៃទទួលសញ្ញាបត្រសាលាបណ្ឌិតសភាយោធាអាមេរិករបស់យុវជន ពេជ្រ មូន
