ព្រះសីហនុ៖ បន្ទាប់ពីបានបញ្ចប់កាសាងសង់ អាគារតេជោព្យាបាលជំងឺកូវីដ-១៩ត្រូវបានប្រកាសដាក់ឲ្យប្រើប្រាស់ជាបណ្តោះអាសន្នបើទោះបីជាជំងឺកូវីដ-១៩ មិនមានឆ្លងថ្មីក៏ដោយ។
អាគារតេជោព្យាបាលជំងឺកូវីដ-១៩ ខេត្តព្រះសីហនុ មានទទឹង៣៣,៤ម៉ែត្រ បណ្តោយ ៩០,៦ម៉ែត្រ កម្ពស់ ០១ជាន់ សសរ គ្រឹះធ្វើពីបេតុង ដំបូលប្រក់ស័ង្កសី អាចដាក់គ្រែសរុប២២៩គ្រែ ក្នុងនោះគ្រែអ្នកជំងឺស្រាល ១៤៣គ្រែ អ្នកជំងឺធ្ងន់៥៧គ្រែ និងសង្រ្គោះបន្ទាន់២៩គ្រែ។ អគារតេជោនេះមានបន្ទប់ធំទូលាយ បំពាក់នូវឧបករណ៍ជំនួយដង្ហើមសម្រាប់ជួយសង្គ្រោះអាយុជីវិតអ្នកជំងឺនិងមានលក្ខណៈទំនើបទាន់សម័យ។
តាមរយៈអគារព្យាបាលជំងឺកូវីដ-១៩នេះនឹងជាផ្នែកមួយបន្ថែមទៀតសម្រាប់ជួយពិនិត្យព្យាបាលជំងឺជូនប្រជាពលរដ្ឋ។ ទោះបីបងប្អូនប្រជាពលរដ្ឋក្រីក្រ ឬអ្នកមានក៏អាចចូលមកទទួលសេវាសុខាភិបាលព្យាបាលបានដូចគ្នា។
ឯកឧត្តមអភិបាលខេត្តសង្ឃឹមថា ក្រោយពីដាក់ឱ្យដំណើរការអគារតេជោព្យាបាលជំងឺកូវីដ-១៩ ប្រជាពលរដ្ឋខេត្តព្រះសីហនុ នឹងមកទទួលសេវាសុខាភិបាលនៅមន្ទីរពេទ្យបង្អែកនេះកាន់តែមានមភាពងាយស្រួល។ ទន្ទឹមនោះឯកឧត្តម ក៏បានណែនាំក្រុមគ្រូពេទ្យត្រូវតែខិតខំជួយពិនិត្យព្យាបាលជូនបងប្អូនប្រជាពលរដ្ឋ ក៏ដូចជាភ្ញៀវទេសចរឱ្យអស់លទ្ធភាព៕
អត្ថបទ៖ ព្រះសីហនុ
