នៅក្នុងការប្រគំតន្ត្រីមួយរបស់ទូរទស្សន៍ហង្សមាស ទស្សនិកជនដែលទស្សនាផ្ទាល់និងតាមកញ្ចក់ទូរទស្សន៍ហាក់មានភាពស្រឡាំងកាំងបន្តិចដែរនៅពេលដែលតារាចម្រៀង ឈិន ម៉ានិច្ច ស្រាប់តែចូលតួទៅក្នុងបទចម្រៀងដែលខ្លួនកំពុងច្រៀងរហូតមិនអាចទប់ទឹកភ្នែកជាប់ ច្រៀងបណ្ដើរបណ្ដោយឱ្យទឹកភ្នែកហូរសស្រាក់បណ្ដើរ។
បុប្ផាដ៏ស្រស់សោភាទាំង៤ទង់របស់ហង្សមាស មានដូចជាតារាចម្រៀង សុគន្ធ នីសា ប៉ាច គីមមួយ កែវ សុបញ្ញា និង ឈិន ម៉ានិច្ច បានចូលរួមច្រៀងជាកិត្តិយសក្នុងកម្មវិធីប្រគំតន្ត្រីរបស់ហង្សមាស ដោយក្នុងនោះកញ្ញា ឈិន ម៉ានិច្ចបានលើកយកបទ «ស្រលាញ់អូនម្ដងទៀតបានទេ» ដែលជាសំនៀងដើមរបស់អ្នកនាង សុគន្ធ នីសា មកបកស្រាយ។
បទចម្រៀងស្នេហាដ៏សែនស្រងេះស្រងោចរៀបរាប់ពីអារម្មណ៍របស់នារីម្នាក់ដែលនៅតែស្រលាញ់អតីតសង្សាររបស់ខ្លួន ហើយទទូចចង់បុរសដែលខ្លួនស្រលាញ់វិលមកស្រលាញ់ខ្លួនដូចកាលពីថ្ងៃចាស់ ស៊ីគ្នានឹងទឹកសំឡេងដ៏ពីរោះរបស់អ្នកនាង ឈិន ម៉ានិច្ច រហូតអាចសង្កត់ដួងចិត្តអ្នកទស្សនាឱ្យកលន្លង់លន្លោចទៅតាមបទចម្រៀង។
យ៉ាងណាមិញនៅពេលដែលច្រៀងបទនេះបានជិតពាក់កណ្ដាលបទ ស្រាប់តែសំឡេងរបស់អ្នកនាង ឈិន ម៉ានិច្ចចាប់ផ្ដើមអួលអាក់ ហ់ើយនៅពេលដែលច្រៀងបានពាក់កណ្ដាលបទ ទំនងជាអ្នកនាងទប់លែងជាប់ ទើបអ្នកនាងបណ្ដោយឱ្យទឹកភ្នែកហូររហាមជោគថ្ពាល់តែម្ដង។
ប៉ុន្តែដោយសារតែអារម្មណ៍ចូលតួរបស់អ្នកនាង ឈិន ម៉ានិច្ច ជ្រុលខ្លាំងទើបធ្វើឱ្យអ្នកនាងពិបាកនឹងអាចច្រៀងបានយ៉ាងរលូនធ្វើឱ្យរៀមច្បងដែលជាម្ចាស់ចម្រៀងដើមឡើងមកជួយច្រៀងគ្នា ហើយទិដ្ឋភាពនៃមិត្តភាពដ៏ស្រស់បំព្រងនេះត្រូវបានមហាជនសាទរនិងសរសើរចំពោះទឹកចិត្តរបស់អ្នកនាង សុគន្ធ និសា យ៉ាងខ្លាំង ជាពិសេសធ្វើឱ្យបទចម្រៀងនេះនៅតែអាចបញ្ចប់ទៅដោយរលូននិងពីរោះជាប់ក្នុងបេះដូងអ្នកគាំទ្រ៕
ទស្សនាការច្រៀងបទចម្រៀង «ស្រលាញ់អូនម្ដងទៀតបានទេ» របស់ ឈិន ម៉ានិច្ច ខាងក្រោម៖
