តារាសម្ដែង និងជាតារាចម្រៀង ហេង ប៊ុនលាភ គេទើបតែឃើញលេចមុខវិលចូលប្រឡូកសិល្បៈឡើងវិញកាលពីខែ មេសា ក្នុងការថតបទចម្រៀងចូលឆ្នាំឱ្យផលិតកម្ម Davitra ហើយលោកក៏បានបញ្ចេញចម្រៀងទោលរបស់ខ្លួនបានចំនួនច្រើនបទដែរ។ យ៉ាងណាមិញ គេនៅមិនទាន់ឃើញតារាប្រុសចាស់វស្សារូបនេះ មានទីផ្សារសម្ដែងភាពយន្តនៅឡើយទេ។
បើទោះបីជាឃ្លាតឆ្ងាយពីសិល្បៈអស់រយៈពេលយូរបន្តិចមែន តែលោក ហេង ប៊ុនលាភ នៅរក្សាបានរូបរាងសង្ហាដដែល មិនចាញ់តារាសក្រក្រោយប៉ុន្មានទេ។ ថ្មីៗនេះ គេបានឃើញលោក ហេង ប៊ុនលាភ មានទីផ្សារថតបង្ហាញម៉ូដឱ្យហាងសម្លៀកបំពាក់បុរសនារី នៅក្នុងនោះ លោកពិតជាជះភាពសង្ហារបស់លោក ស័ក្ដសមជាមួយសម្លៀកបំពាក់ម៉ូដស្អាតៗ។ គេនៅមិនទាន់ច្បាស់ថា លោក ហេង ប៊ុនលាភ មានតម្លៃខ្ពស់ខ្លួនក្នុងទីផ្សារសិល្បៈដដែល ឬថមថយនោះទេ ព្រោះលោកក៏បានដកឃ្លាពីសិល្បៈយូរគ្រាន់បើដែរ។
គេនៅចាំបានថា លោក ហេង ប៊ុនលាភ គឺជាអតីតប្រុសស្អាតចំណាត់ថ្នាក់លេខ២ កាលពីឆ្នាំ២០០១ ហើយលោកក៏បានក្លាយខ្លួនជាតារាចម្រៀងក្នុងផលិតកម្ម SSB ដោយមានលោក ហ្វៃ សំអាង ជាអ្នកផ្ចុងផ្តើម។ ក្រៅពីមានទីផ្សារចម្រៀងហើយ លោកក៏មានទីផ្សារភាពយន្តខ្លាំងក្លាមិនចាញ់គ្នាឡើយ រហូតដល់លោកត្រូវបានអញ្ជើញឱ្យសម្ដែងជាដៃគូអ្នកនាង ដាញ់ ម៉ូនីកា សឹងតែគ្រប់ភាពយន្តក្នុងស្រុក។
ស្របពេលដែលទីផ្សារចម្រៀង និងសម្តែងកាន់តែមានសន្ទុះ គេស្រាប់តែឃើញលោក ហេង ប៊ុនលាភ បានសម្រេចចិត្តរៀបអាពាហ៍ពិពាហ៍ជាមួយកូនស្រីស្រស់សោភារបស់ថៅកែឡូនេសាទម្នាក់នៅខេត្តពោធិ៍សាត់ កាលពីអំឡុងឆ្នាំ២០០៧ ហើយលោកក៏បានផ្អាកការងារសិល្បៈ ស្រវាចាប់យកជំនួញដែលមានចំណូលខ្ពស់ជាងសិល្បៈតែម្ដង៕
