តម្លៃប្រេងសាំងនៅអាមេរិកបានឡើងថ្លៃខ្ពស់ជាថ្មីម្ដងទៀត ដោយឡើងដល់ ៤.៨១ដុល្លា ក្នុង១ហ្គាឡុង នៅព្រឹកថ្ងៃសៅរ៍សប្ដាហ៍មុននេះ។
យោងតាមទិន្នន័យពីសមាគមមិនរកប្រាក់ចំណេញរបស់សហរដ្ឋអាមេរិក Automobile (AAA) ដែលតាមដានតម្លៃនៅស្ថានីយ៍ប្រេងឥន្ទនៈជាង ៦ម៉ឺនស្ថានីយ៍ បានឲ្យដឹងថា ឥលូវនេះតម្លៃប្រេងបានកើនឡើងទ្វេដងចាប់តាំងពីប្រធានាធិបតីសហរដ្ឋអាមេរិក Joe Biden ឡើងកាន់តំណែង។
នៅចុងខែ មករា ឆ្នាំ ២០២១ ក្នុងអំឡុងសប្ដាហ៍ដំបូងនៃតំណែងរបស់លោក Biden តម្លៃប្រេងឥន្ទនៈមួយលីត្រត្រឹមតែ ២.៣៩ដុល្លារ ប៉ុណ្ណោះ។
ចំណែកតម្លៃប្រេងឥន្ទនៈឡើងខ្ពស់បំផុតនៅក្នុងប្រទេសត្រូវបានកត់ត្រានៅក្នុងរដ្ឋ California ដែលឥលូវនេះអ្នកបើកបរត្រូវចំណាយជាមធ្យម ៦.២៩ដុល្លា ក្នុង១ហ្គាឡុង។
ឥលូវនេះ តម្លៃប្រេងឥន្ទនៈរបស់សហរដ្ឋអាមេរិកបាននឹងកំពុងបង្កើតកំណត់ត្រាថ្មីរយៈពេល ៤សប្ដាហ៍ នេះ។ ខណៈការកើនឡើងលើកដំបូងបានកើតឡើងនៅពេលដែលរុស្ស៊ីចាប់ផ្ដើមប្រតិបត្តិការយោធារបស់ខ្លួនក្នុងប្រទេសអ៊ុយក្រែន ហើយបណ្ដារដ្ឋលោកខាងលិចបានឆ្លើយតបជាមួយនឹងទណ្ឌកម្មដែលធ្វើឲ្យការផ្គត់ផ្គង់ថាមពលរបស់រុស្ស៊ីជាសកលស្ថិតក្នុងចំណុចគ្រោះថ្នាក់។
ទោះបីជាតម្លៃប្រេងមានការកើនឡើង ទីក្រុងវ៉ាស៊ីនតោនបានដាក់ទណ្ឌកម្មលើប្រេងរបស់រុស្ស៊ីនៅដើមរដូវនិទាឃរដូវនេះ។ ថ្វីត្បិតការផ្គត់ផ្គង់របស់រុស្ស៊ីបានគ្រប់ដណ្ដប់ត្រឹមតែ ៨% នៃការនាំចូលរបស់អាមេរិកក៏ដោយ ក៏តម្លៃប្រេងឥន្ទនៈបាននឹងកំពុងកើនឡើងនៅពេលតម្លៃប្រេងកើនឡើងទូទាំងពិភពលោក៕
