មន្រ្តីក្នុងតំបន់បាននិយាយនាថ្ងៃអាទិត្យ ទី ១២ ខែ មិថុនា (ម៉ោងក្នុងស្រុក) ថា កងកម្លាំងរុស្ស៊ីបានបំផ្ទុះស្ពានតភ្ជាប់ទីក្រុង Sievierodonetsk ដែលជាស្ពានសម្រាប់ជម្លៀសជនស៊ីវិលទៅទីក្រុងមួយទៀត។
ទីក្រុង Sievierodonetsk បានក្លាយជាចំណុចកណ្ដាលនៃការប្រយុទ្ធដើម្បីគ្រប់គ្រងតំបន់ Donbas ភាគខាងកើតរបស់អ៊ុយក្រែន។ ផ្នែកខ្លះនៃទីក្រុងត្រូវបានបំផ្លាញនៅក្នុងការប្រយុទ្ធគ្នាយ៉ាងអាក្រក់បំផុតចាប់តាំងពីវិមានក្រឹមឡាំងឈ្លានពានអ៊ុយក្រែនកាលពីថ្ងៃទី ២៤ ខែ កុម្ភៈ ឆ្នាំ ២០២២ មក។
ប្រធានាធិបតីអ៊ុយក្រែន លោក Volodymyr Zelensky បាននិយាយនៅក្នុងវីដេអូមួយនាយប់ថ្ងៃអាទិត្យថា «គោលដៅយុទ្ធសាស្រ្តសំខាន់របស់អ្នកកាន់កាប់មិនផ្លាស់ប្ដូរទេ។ ពួកគេកំពុងបន្ដប្រយុទ្ធគ្នាយ៉ាងក្ដៅគគុកនៅក្នុងទីក្រុង Sievierodonetsk»។
អភិបាលខេត្ត Luhansk លោក Serhiy Gaidai បាននិយាយថា កងកម្លាំងអ៊ុយក្រែន និង រុស្ស៊ីនៅតែកំពុងប្រយុទ្ធគ្នានៅតាមដងផ្លូវនៅទីនោះកាលពីថ្ងៃអាទិត្យ។
កងកម្លាំងរុស្ស៊ីបានដណ្ដើមយកទីក្រុងភាគច្រើន ប៉ុន្ដែទាហានអ៊ុយក្រែននៅតែគ្រប់គ្រងតំបន់ឧស្សាហកម្ម និង រោងចក្រគីមី Azot ដែលជាកន្លែងដែលជនស៊ីវិលរាប់រយនាក់កំពុងជ្រកកោន។
លោក Gaidai បាននិយាយថា ប៉ុន្ដែជនជាតិរុស្ស៊ីបានបំផ្លាញស្ពានឆ្លងកាត់ទន្លេ Siverskyi Donests ដែលតភ្ជាប់ទីក្រុង Sievierodonetsk ជាមួយនឹងទីក្រុងភ្លោះ Lysychansk របស់ខ្លួន។ ដោយបន្សល់តែស្ពានចំនួន ១ ក្នុងចំណោមស្ពានទាំង ៣ ក្នុងតំបន់នោះ។
លោកបន្ដថា «ប្រសិនបើការបាញ់គ្រាប់ផ្លោងកម្ទេចស្ពានដែលនៅសល់ឲ្យដួលរលំ ទីក្រុងនឹងកាត់ផ្ដាច់។ វាគ្មានផ្លូវចាកចេញពីទីក្រុង Sievierodonetsk ដោយយានជំនិះឡើយ»។ លោកបានបញ្ជាក់ និង កត់សម្គាល់ពីកង្វះកិច្ចព្រមព្រៀងឈប់បាញ់គ្នា និង គ្មានច្រករបៀងដែលត្រូវបានព្រមព្រៀងឡើយ។
ដោយឡែកប្រធានរដ្ឋបាលទីក្រុង Sievierodonetsk បាននិយាយថា ជាងមួយភាគបីនៃទីក្រុងនេះ នៅតែស្ថិតក្រោមការគ្រប់គ្រងរបស់កងកម្លាំងអ៊ុយក្រែន ដោយមានប្រហែល ពីរភាគបី ស្ថិតនៅក្នុងដៃរបស់រុស្ស៊ី។ លោកប្រធានរដ្ឋបាលបានប្រាប់ទូរទស្សន៍ជាតិថា «កងកម្លាំងរបស់យើង កំពុងឈរលើបន្ទាត់ខ្សែការពារយ៉ាងរឹងមាំ»។
