ក្រសួងការបរទេសចិនកាលពីថ្ងៃ ច័ន្ទ បានរំលឹកជាថ្មីថា បញ្ហាតៃវ៉ាន់ខុសគ្នាស្រលះពីបញ្ហាអ៊ុយក្រែន ដោយបន្ថែមថា តៃវ៉ាន់គឺជា ផ្នែកដែលមិនអាចកាត់ផ្ដាច់បាននៃទឹកដីរបស់ចិន ហើយបញ្ហាតៃវ៉ាន់គឺជា កិច្ចការផ្ទៃក្នុងរបស់ចិនសុទ្ធសាធដែលមិនអាចត្រូវបានជ្រៀតជ្រែកពីបរទេសនោះដែរ។
អ្នកនាំពាក្យក្រសួងការបរទេសចិន លោក Wang Wenbin បានធ្វើការកត់សម្គាល់នៅក្នុងសន្និសិទសារព័ត៌មានថា នៅពេលដែលត្រូវសុំឲ្យមានការឆ្លើយតបទៅនឹងការលើកឡើងរបស់ប្រធានាធិបតីអ៊ុយក្រែន ចំពោះសំណួរថា តើតៃវ៉ាន់គួរឆ្លើយតបបែបណា? ប្រសិនបើចិនប្រើចំណាត់ការដោយបង្ខំ ក្នុងករណីចាំបាច់។
នៅក្នុងកិច្ចប្រជុំសន្តិសុខ Shangri-La នៅសិង្ហបុរី លោក Volodymyr Zelensky បានកត់សម្គាល់ថា «គំរូរបស់អ៊ុយក្រែនថ្ងៃនេះគឺជា គំរូសម្រាប់ពិភពលោកទាំងមូល គ្មាននរណាទទួលបានផលប្រយោជន៍ពីសង្រ្គាមទេ ប្រសិនបើមានការកើតឡើង។ ហើយបើសិនមានច្រកចេញតាមផ្លូវការទូត យើងត្រូវប្រើវិធីការទូត។ ប៉ុន្ដែវាត្រូវតែជាវិធីការពារទុកជាមុន មិនមែនត្រូវធ្វើឡើងក្រោយសង្រ្គាមបានចាប់ផ្ដើមឡើយ»។
លោក Wang បានសង្កត់ធ្ងន់ថា «យើងបានកត់សម្គាល់ឃើញថា លោកប្រធានាធិបតី Zelensky មិនបាននិយាយចំឈ្មោះតៃវ៉ាន់ទេ តែផ្ទុយទៅវិញ ប្រព័ន្ធផ្សព្វផ្សាយទេដែលព្យាយាមទាញយកសំណួរបញ្ចូលក្នុងបញ្ហានេះ»។
លោកបន្ថែមថា ចិននឹងចាត់វិធានការខ្លាំងក្លា ដើម្បីឆ្លើយតបទៅនឹងការប៉ុនប៉ង «ឯករាជ្យភាពតៃវ៉ាន់» ទាំងអស់ដែលមានគោលបំណងបំបែកចេញពីប្រទេសចិន ដើម្បីការពារយ៉ាងរឹងមាំនូវអធិបតេយ្យភាពជាតិ និង បូរណភាពទឹកដី៕
