អង្គការសុខភាពពិភពលោក (WHO) បាននិយាយថា ខ្លួនកំពុងធ្វើការជាមួយក្រុមអ្នកជំនាញ ដើម្បីបង្កើតឈ្មោះថ្មីសម្រាប់ជំងឺអុតស្វា (Monkeypox)។
រឿងនេះបានកើតឡើង បន្ទាប់ពីអ្នកវិទ្យាសាស្រ្តជាង ៣០នាក់ បានសរសេរកាលពីសប្ដាហ៍មុនអំពី «តម្រូវការបន្ទាន់សម្រាប់ឈ្មោះមិនរើសអើង សម្រាប់មេរោគ និង ជំងឺដែលវាបង្កឡើង»។ ពួកគេបាននិយាយថា ការបន្ដសំដៅទៅលើមេរោគនេះថាជា ជនជាតិអាហ្រ្វិកគឺមានភាពមិនត្រឹមត្រូវ និង រើសអើង។
ករណីជំងឺអុតស្វាចំនួន ១,៦០០ ត្រូវបានកត់ត្រាទូទាំងពិភពលោកក្នុងរយៈពេលប៉ុន្មានសប្ដាហ៍ថ្មីៗនេះ។ ទោះបីជា ចំនួនអ្នកស្លាប់ចំនួន ៧២នាក់ ត្រូវបានគេរាយការណ៍នៅក្នុងប្រទេសអាហ្រ្វិកក៏ដោយ ប៉ុន្ដែគេមិនរកឃើញនរណាម្នាក់បាត់បង់ជីវិត នៅក្នុងប្រទេសចំនួន ៣២ ដែលរងផលប៉ះពាល់ថ្មីដោយសារជំងឺនេះដូចចក្រភពអង់គ្លេសនោះទេ។
អង្គការសុខភាពពិភពលោកបាននិយាយថា ខ្លួននឹងបើកកិច្ចប្រជុំបន្ទាន់មួយនៅសប្ដាហ៍ក្រោយ ដើម្បីកំណត់ថា តើត្រូវចាត់ថ្នាក់ការផ្ទុះជំងឺនេះ ជាគ្រាអាសន្នសុខភាពសាធារណៈអន្តរជាតិដែរ ឬ ក៏អត់។
ប្រធានអង្គការសុខភាពពិភពលោក លោក Tedros Adhanom Ghebreyesus បាននិយាយថា «ការផ្ទុះឡើងនៃជំងឺអុតស្វានេះគឺ មិនធម្មតា និង ជារឿងគួរឲ្យព្រួយបារម្ភ»។ លោកថា កាលពីកន្លងមកពិភពលោក ក៏ធ្លាប់ជួបប្រទះជំងឺផ្សេងទៀតដូចជា៖ ជំងឺផ្ដាសាយជ្រូក គ្រុនស្វិតដៃជើង ជំងឺអ៉ីបូឡា ហ្ស៊ីកា និង ជំងឺកូវីដ១៩ ជាដើម៕
