អ្នកចរចាពាណិជ្ជកម្មកំពូលរបស់តៃប៉ិ បានប្រាប់ Reuters កាលពីថ្ងៃ អង្គារ សប្ដាហ៍នេះថា ការវាយប្រហារដោយយោធារបស់ចិនទៅលើតៃវ៉ាន់ នឹងជះឥទ្ធិពលខ្លាំងលើលំហូរពាណិជ្ជកម្មសកលជាងសង្រ្គាមរវាងរុស្ស៊ី-អ៊ុយក្រែនទៅទៀត។
ការឈ្លានពានរបស់រុស្ស៊ីលើអ៊ុយក្រែនកាលពីខែ កុម្ភៈ បានបង្កឲ្យមានការឡើងថ្លៃទំនិញ និង ការហាមឃាត់ការនាំចេញអាហារ ដែលនាំឲ្យមានការភ័យខ្លាចចំពោះគ្រោះទុរ្ភិក្សនៅក្នុងប្រទេសក្រីក្រ។
លោក John Deng បាននិយាយថា ប្រសិនបើចិនវាយប្រហារតៃវ៉ាន់ ការរំខានដែលអាចកើតមាន អាចនឹងកាន់តែអាក្រក់ ដោយលើកឡើងពីពិភពលោក។
ការរំខានដល់ខ្សែសង្វាក់ផ្គត់ផ្គង់អន្តរជាតិ ការរំខានដល់សណ្ដាប់ធ្នាប់សេដ្ឋកិច្ចអន្តរជាតិ ហើយឱកាសក្នុងការរីកចម្រើន នឹងទទួលការរំខានសំខាន់ជាងសង្រ្គាមនៅអ៊ុយក្រែនទៅទៀត នេះបើយោងតាមសម្ដីរបស់លោក Deng ប្រាប់សារព័ត៌មាន Reuters នៅក្នុងបទសម្ភាសន៍មួយ ខាងក្រៅកិច្ចប្រជុំថ្នាក់រដ្ឋមន្រ្តីរបស់អង្គការពាណិជ្ជកម្មពិភពលោក (WTO) ដ៏សំខាន់នៅទីក្រុងហ្សឺណែវ ប្រទេសស្វីស។
រដ្ឋាភិបាលទីក្រុងតៃប៉ិ បានរាយការណ៍ថា មិនមានសញ្ញានៃការវាយប្រហារដែលជិតកើតឡើងពីប្រទេសចិននោះទេ ប៉ុន្ដែតៃវ៉ាន់បានបង្កើនកម្រិតប្រកាសអាសន្នរបស់ខ្លួនចាប់តាំងពីសង្រ្គាមអ៊ុយក្រែនបានចាប់ផ្ដើម ដោយបានប្រយ័ត្នប្រយែងពីចេតនារបស់ទីក្រុងប៉េកាំង។
រដ្ឋាភិបាលចិនបាននិយាយថា ខ្លួនចង់បាន «ការបង្រួបបង្រួមដោយសន្តិភាព» ប៉ុន្ដែរក្សាជម្រើសផ្សេងទៀតសម្រាប់តៃវ៉ាន់ ដែលចិនចាត់ទុកថាជាខេត្តរបស់ខ្លួន។
យោងតាមទន្និន័យបានបង្ហាញថា តៃវ៉ាន់គ្រប់គ្រងទីផ្សារពិភពលោកសម្រាប់ការផលិតបន្ទះឈីបទំនើបបំផុត ហើយការនាំចេញរបស់វាមានតម្លៃ ១១៨ពាន់លានដុល្លារ កាលពីឆ្នាំមុន។
លោក Deng បាននិយាយថា លោកសង្ឃឹមថានឹងកាត់បន្ថយចំណែកនៃការនាំចេញទៅកាន់ប្រទេសចិនចំនួន ៤០%។
ការឈ្លានពានរបស់រុស្ស៊ី គឺ ជាលើកទីមួយហើយក្នុងប្រវត្តិសាស្រ្តរបស់អង្គការឃ្លាំមើលពាណិជ្ជកម្មពិភពលោកដែលមានអាយុកាល ២៧ឆ្នាំ ដែលសមាជិកអង្គការពាណិជ្ជកម្មពិភពលោក (WTO) មួយ បានឈ្លានពានមួយសមាជិកមួយផ្សេងទៀត។
ប្រភពពាណិជ្ជកម្មបាននិយាយថា ស្ថាប័ននេះសង្ឃឹមថា នឹងឈានដល់កញ្ចប់នៃកិច្ចព្រមព្រៀង រួមទាំងសន្តិសុខស្បៀងអាហារ ដើម្បីបន្ធូរបន្ថយការផ្គត់ផ្គង់ដែលមានភាពតានតឹងដែលបង្កើតឡើងដោយសង្រ្គាម អាចធ្វើឲ្យមានការលំបាកកាន់តែខ្លាំង។
សូមជម្រាបថា តៃវ៉ាន់បានចូលរួមក្នុងការដាក់ទណ្ឌកម្មជាមួយលោកខាងលិច លើប្រទេសរុស្ស៊ី ដោយបានចូលរួមក្នុងការអត្ថាធិប្បាយជាអចិន្រ្តៃយ៍សម្រាប់ប្រតិភូ WTO របស់អ៊ុយក្រែនកាលពីថ្ងៃ អាទិត្យ។ WTO គឺជាអង្គការពហុភាគីមួយ ក្នុងចំណោមអង្គការពហុភាគីមួយចំនួនដែលចិន និង តៃវ៉ាន់ ធ្វើការជាមួយគ្នា ចាប់តាំងពីទីក្រុងប៉េកាំង រារាំងការចូលរួមរបស់ខ្លួននៅក្នុងផ្នែកផ្សេងទៀត៕
