តារាសម្ដែងវ័យក្មេង ១៩ ឆ្នាំទើបដុះពន្លកក្នុងវិស័យសិល្បៈភាពយន្តខ្មែរ ឈ្មោះ ហេង សំ បានបោះជំហ៊ានសម្ដែងក្នុងភាពយន្តមួយដែលមានចំណងជើងថា «រសាត់អណ្ដែត» ឬ Buoyancy ជាភាពយន្តផលិតដោយផលិតករជនជាតិអូស្ត្រាលី។ ភាពយន្តនេះដែរ ក៏ធ្លាប់បង្ហាញខ្លួនក្នុងមហោស្រពអន្តរជាតិធំៗជាច្រើននៅឯបរទេស និងជាពិសេស បានបញ្ចាំងឱ្យមហាជនកម្ពុជាបានទស្សនាតាមរយៈ CIFF (មហោស្រពភាពយន្តអន្តរជាតិកម្ពុជា)។
ខ្សែភាពយន្ត «រសាត់អណ្ដែត» ជាភាពយន្តបែបសោទនាកម្ម ដែលត្រូវបានថតស្ទើរតែទាំងស្រុងនៅលើសមុទ្រក្នុងប្រទេសកម្ពុជា នាខេត្តកោះកុង និងរៀបរាប់អំពីក្មេងប្រុសអាយុ ១៤ឆ្នាំម្នាក់ ដែលបានចាកចេញពីផ្ទះនៅស្រុកកំណើត ដើម្បីស្វែងរកជីវិតដែលប្រសើរជាងមុន ប៉ុន្តែត្រូវធ្លាក់ខ្លួនធ្វើជាទាសករនេសាទតាមទូក កណ្ដាលសមុទ្រទៅវិញ។ ភាយន្តនេះបានការគាំទ្រក្នុងការផលិតដោយមជ្ឈមណ្ឌលបណ្ដុះបណ្ដាលជំនាញ និងទទួលការថតភាពយន្តនៅកម្ពុជា (CFC)។
ខ្សែភាពយន្តនេះ ត្រូវបានជ្រើសរើសជាបេក្ខភាពរបស់ប្រទេសអូស្រ្ដាលី សម្រាប់ខ្សែភាពយន្តខ្នាងវែងអន្តរជាតិល្អបំផុត នៅឯពានរង្វាន់ Oscars Academy Awards លើកទី៩២ផងដែរ។ មុនចាក់បញ្ចាំងនៅកម្ពុជា រឿងនេះត្រូវបានចាក់បញ្ចាំងលើកដំបូងនៅមហោស្រពភាពយន្តអន្តរជាតិប៊ែកឡាំង ប្រទេសអាល្លឺម៉ង់ និងមហោស្រពភាពយន្តអន្តរជាតិមែលប៊ន ប្រទេសអូស្រ្ដាលី។
តួប្រុស ហេង សំ បានលើកឡើងថា ខ្លួនមិនដែលបានប្រឡូកសិល្បៈនៃការសម្ដែងភាពយន្តឡើយ បើទោះបីជាខ្លួនមានដុងសិល្បៈក្នុងខ្លួនតាំងពីកំណើតមកម្លេះ។ សំ បានដុះខាត់ការសម្ដែងភាពយន្តជាលើកដំបូងតាមរយៈការណែនាំរបស់អ្នកដឹកនាំ អ្វីដែល សំ ជំនាញក្នុងការសម្ដែងជាគេនោះ គឺការសម្ដែងបែបក្បាច់គុន និងវ៉ៃតប់ ជាដើម។ ហេង សំ បានលើកឡើងទៀតថា ខ្លួនពិតជាមានសំណាងខ្លាំងណាស់ នៅក្នុងចំណោមអ្នក Casting ការសម្ដែង ១០០ នាក់ ខ្លួនជាមនុស្សចុងក្រោយដែលអ្នកដឹកនាំបានសម្រេចជ្រើសយកឱ្យសម្ដែង។
ខ្សែភាពយន្តភាពយន្ត «រសាត់អណ្ដែត» ត្រូវបាននិពន្ធ និងដឹកនាំរឿងដោយលោក Rodd Rathjen ជនជាតិអូស្រ្ដាលី និងផលិតដោយក្រុមហ៊ុន Causeway Film សហការជាមួយ CFC និងផលិតកម្ម Anupheap Production។
