កាលពីថ្ងៃ អង្គារ ម្សិលម៉ិញ រដ្ឋមន្រ្តីការបរទេសអាមេរិក លោក Anthony Blinken បាននិយាយថា ចិនគួរតែសំឡឹងមើលការឆ្លើយតបយ៉ាងម៉ឺងម៉ាត់របស់អន្តរជាតិ ពេលដែលខ្លួនចង់ពិចារណាធ្វើសកម្មភាពណាមួយ ពាក់ព័ន្ធនឹងតៃវ៉ាន់នាពេលអនាគត។
លោក Blinken បានផ្ដល់កិច្ចសម្ភាស៍ជាមួយប្រព័ន្ធផ្សព្វផ្សាយក្នុងស្រុកអាមេរិកថា «គួរឲ្យសោកស្ដាយណាស់ អ្វីដែលយើងបានមើលឃើញក្នុងរយៈពេល ១០ឆ្នាំចុងក្រោយនេះ គឺចិនធ្វើទង្វើគាបសង្កត់កាន់តែខ្លាំងនៅក្នុងប្រទេស រួមទាំងបង្កហេតុកាន់តែច្រើននៅក្រៅប្រទេស រួមមានទាំងសកម្មភាពទាក់ទងនឹងតៃវ៉ាន់ ដែលមានលក្ខណៈគ្រោះថ្នាក់ និង បង្កអស្ថិរភាព»។
លោកបន្ដថា «បើតាមការយល់ឃើញរបស់ខ្ញុំ ចិនចាំបាច់ត្រូវរាប់បញ្ចូលក្នុងការគណនារបស់ខ្លួននូវការឆ្លើយតបដែលពួកយើងបានឃើញរួចមកហើយ ចំពោះសកម្មភាពឈ្លានពានរបស់រុស្ស៊ីនៅអ៊ុយក្រែន ហើយប្រទេសជាច្រើនបានរួមសាមគ្គីគ្នាប្រឆាំងតទល់នឹងទង្វើបែបនេះ ទាំងតាមរយៈការធានាថា អ៊ុយក្រែនទទួលបានការគាំទ្រដែលខ្លួនត្រូវការ និង ការធ្វើឲ្យរុស្ស៊ីត្រូវបង់ថ្លៃសម្រាប់ការខូចខាតដែលបង្កឡើងដោយសង្រ្គាម»។
ចាប់តាំងពីរុស្ស៊ីបើកការឈ្លានពានអ៊ុយក្រែន ក៏មានការលើកឡើងផងដែរថា ចិនអាចនឹងឆ្លៀតឱកាសធ្វើសកម្មភាពស្រដៀងគ្នាទៅលើកោះតៃវ៉ាន់។ យ៉ាងណាម៉ិញ ទីក្រុងប៉េកាំងបានសង្កត់ធ្ងន់ម្ដងហើយម្ដងទៀតថា បញ្ហាតៃវ៉ាន់គឺមានលក្ខណៈផ្ទុយស្រឡះពីបញ្ហាអ៊ុយក្រែន ទោះបីតៃវ៉ាន់ជាផ្នែកដែលមិនអាចកាត់ផ្ដាច់ចេញពីទឹកដីប្រទេសចិនក៏ដោយ។ ប៉ុន្ដែចិនបានព្រមានថា នេះជាបញ្ហាផ្ទៃក្នុងរបស់ខ្លួនសុទ្ធសាធ ហើយចិនមិនអាចឲ្យបរទេសចូលជ្រៀតជ្រែកនោះទេ៕
