នាថ្ងៃ ព្រហស្បត្តិ៍ ទី ១៧ ខែ មិថុនា ឆ្នាំ ២០២២ (ម៉ោងក្នុងស្រុក) រដ្ឋមន្រ្តីក្រសួងកសិកម្មអាមេរិក លោក Tom Vilsack បានអំពាវនាវឲ្យរុស្ស៊ីបើកច្រកកំពង់ផែរបស់អ៊ុយក្រែនឲ្យបានឆាប់រហ័ស ដើម្បីនាំចេញគ្រាប់ធញ្ញជាតិដែលស្ដុកទុករាប់លានតោនក្នុងប្រទេសអ៊ុយក្រែន។
លោក Vilsack បានប្រាប់អ្នកយកព័ត៌មាននៅអង្គការសហប្រជាជាតិថា «ពួកគេគួរតែធ្វើសកម្មភាពភ្លាមៗ ដើម្បីបើកច្រកទាំងនោះ ហើយពួកគេគួរតែបញ្ចប់សង្រ្គាមនេះ»។ លោកបន្ដថា «នេះជារឿងធ្ងន់ធ្ងរ យើងមិនគួរប្រើអាហារជាអាវុធនោះទេ»។
អង្គការសហប្រជាជាតិបានពិភាក្សាគ្នាយ៉ាងស៊ីជម្រៅរវាងទីក្រុង ម៉ូស្គូ , ទីក្រុង កៀវ និង អង់ការ៉ា អស់រយៈពេលជាច្រើនសប្ដាហ៍អំពីរបៀបបើកច្រកសមុទ្រខ្មៅ ដែលកងទ័ពជើងទឹករុស្ស៊ីបានបិទផ្លូវជុំវិញអ៊ុយក្រែន រួមទាំងរារាំងនាវាដឹកទំនិញពាណិជ្ជកម្មដែលដឹកស្បៀងអាហារដូចជា គ្រាប់ធញ្ញជាតិ ទៅកាន់ទីផ្សារពិភពលោក។
ទាក់ទិននឹងការស្នើឲ្យមានការបើកច្រកកំពង់ផែ ដោយសារតែតម្លៃគ្រាប់ធញ្ញជាតិកើនឡើងជាអន្តរជាតិ ហើយបណ្ដាលឲ្យប្រទេសក្រីក្រជាច្រើនជួបប្រទះនូវកង្វះខាតស្បៀងអាហារធ្ងន់ធ្ងរ ទីក្រុងម៉ូស្គូបានទាមទារឲ្យដកទណ្ឌកម្មទាំងអស់ ដែលលោកខាងលិចបានដាក់លើខ្លួនជុំវិញការឈ្លានពានអ៊ុយក្រែនកាលពីថ្ងៃទី ២៤ ខែ កុម្ភៈ ដើម្បីជាថ្នូរនឹងការអនុញ្ញាតឲ្យបើកច្រកដូចមុនវិញ។
លោក Vilsack បានឲ្យដឹងថា ទណ្ឌកម្មរបស់អាមេរិក និង អឺរ៉ុប មិនបានអនុវត្តចំពោះគ្រាប់ធញ្ញជាតិ និង ជីនោះទេ ដូច្នេះរុស្ស៊ី មិនគួរយកបញ្ហាស្បៀងអាហារមកបូកបញ្ជូលនោះទេ។ លោកជំរុញឲ្យទីក្រុង ម៉ូស្គូ ប្រាកដថា ពួកគេកំពុងចរចាដោយស្មោះត្រង់អំពើការបើកច្រកកំពង់ផែឡើងវិញ ហើយពួកគេគួរតែធ្វើវាឲ្យបានលឿនតាមដែលអាចធ្វើបាន ព្រោះនេះជាតម្រូវការបន្ទាន់៕
