ការនាំចូលប្រេងឆៅរបស់ចិនពីប្រទេសរុស្ស៊ី បានកើនឡើង ៥៥% ធៀបនឹងឆ្នាំមុន ដល់កម្រិតកំណត់ត្រាមួយនៅក្នុងខែឧសភា ដោយធ្វើឲ្យអារ៉ាប៊ីសាអូឌីតជាអតីតអ្នកផ្គត់ផ្គង់ដ៏ធំបំផុតរបស់ចិនបានធ្លាក់ទៅចំណាត់ការលេខ២ វិញ។
ប្រទេសរុស្ស៊ីបានក្លាយជាអ្នកផ្គត់ផ្គង់ប្រេងធំឲ្យប្រទេសចិន ដោយបានលក់ប្រេងឆៅបញ្ចុះតម្លៃឲ្យទីក្រុងប៉េកាំង ចំពេលមានទណ្ឌកម្មជុំវិញសង្រ្គាមនៅអ៊ុយក្រែន។ ដោយហេតុតែតម្លៃទាប ក្រុមហ៊ុនចិនបានបង្កើនការទិញប្រេងពីរុស្ស៊ីនៅឆ្នាំនេះ។
យោងតាមទិន្នន័យពីរដ្ឋបាលគយចិន នាថ្ងៃ ច័ន្ទ បានឲ្យដឹងថា មានការនាំចូលប្រេងរបស់រុស្ស៊ីរួមទាំងការផ្គត់ផ្គង់ដែលបូមតាមបំពង់ស៊ីបេរីប៉ាស៊ីហ្វិកភាគខាងកើត និង ការដឹកជញ្ជូនតាមសមុទ្រកំពង់ផែអឺរ៉ុប សរុបចំនួនជិត ៨.៤២លានតោន។
ចំនួននោះបានរុញច្រានប្រទេសអារ៉ាប៊ីសាអូឌីត ដែលជាអតីតអ្នកផ្គត់ផ្គង់ប្រេងឆៅដ៏ធំបំផុតរបស់ចិន ធ្លាក់មកចំណាត់ថ្នាក់លេខ ២ ជាមួយនឹងបរិមាណ ៧.៨២លានតោន។
ក្រុមហ៊ុនចិន រួមទាំងក្រុមហ៊ុនចម្រាញ់ប្រេងដ៏ធំរបស់រដ្ឋ Sinopec និង ក្រុមហ៊ុន ZhenhuaOil ដែលគ្រប់គ្រងដោយរដ្ឋផងដែរ បានបង្កើនការទិញប្រេងឆៅរបស់រុស្ស៊ី ក្នុងរយៈពេលប៉ុន្មានខែថ្មីៗនេះ បន្ទាប់ពីទទួលបានការបញ្ចុះតម្លៃយ៉ាងខ្លាំង ខណៈអ្នកទិញនៅអឺរ៉ុប និង សហរដ្ឋអាមេរិក បានបដិសេធថាមពលរុស្ស៊ី ស្របតាមការដាក់ទណ្ឌកម្មជុំវិញសង្រ្គាមរបស់ខ្លួននៅអ៊ុយក្រែន។
ការបញ្ជុះតម្លៃរហូតដល់ ៣០% បានជួយឲ្យប្រទេសរុស្ស៊ីរក្សានូវទ្រព្យសម្បិត្តិរបស់ខ្លួន បើទោះបីជាមានការដាក់ទណ្ឌកម្មពីលោកខាងលិច ដែលត្រូវបានរៀបចំឡើងដើម្បីបង្ខូចសេដ្ឋកិច្ចរបស់រុស្ស៊ីក៏ដោយ។
ទាក់ទិននឹងការនាំចេញប្រេង វិមានក្រឹមឡាំងបានប្រមូលប្រាក់ប្រហែល ២០ពាន់លានដុល្លារ ពីការនាំចេញប្រេងនៅក្នុងខែ ឧសភានេះ។
កាលពីខែមីនា សហរដ្ឋអាមេរិក និង ចក្រភពអង់គ្លេស បាននិយាយថា ពួកគេនឹងហាមឃាត់ប្រេងរបស់រុស្ស៊ី ខណៈសហភាពអឺរ៉ុបកំពុងធ្វើការឆ្ពោះទៅរកការបញ្ចប់ ការពឹងផ្អែកលើឧស្ម័នរបស់រុស្ស៊ី។
ប្រទេសលោកខាងលិច ក៏បានបង្កើនការឆ្លើយតបផ្នែកសេដ្ឋកិច្ច ចំពោះការលុកលុយរបស់រុស្ស៊ី។ ជាមួយគ្នា លោក Joe Biden ប្រធានាធិបតីអាមេរិក បាននិយាយថា វិធានការនេះ ផ្ដោតលើសរសៃឈាមសំខាន់នៃសេដ្ឋកិច្ចរុស្ស៊ី។
ថ្វីបើលោកខាងលិចបាននាំគ្នាដាក់ទណ្ឌកម្មលើប្រភពចំណូលដ៏សំខាន់ពីការលក់ប្រេងឆៅរបស់រុស្ស៊ីយ៉ាងណាក្ដី ប៉ុន្ដែរុស្ស៊ីបានលើកឡើងថា វាមិនមានអ្វីធ្ងន់ធ្ងរសម្រាប់ខ្លួនឡើយផ្ទុយទៅវិញវាបានធ្វើឲ្យប៉ះពាល់ដល់អ្នកប្រើប្រាស់ និង តម្រូវការរបស់ប្រទេសលោកខាងលិចទៅវិញទេ៕
