យោងតាមគេហទំព័រ Global Petrol Prices គិតត្រឹមថ្ងៃទី ២០ មិថុនា ឆ្នាំ២០២២ បានឲ្យដឹងថា តម្លៃប្រេងសាំង Octane-95 ជាមធ្យមនៅជុំវិញពិភពកលោកគឺ ១.៤៦ដុល្លារអាមេរិក ស្មើនឹង ៥៩២០,៥៨រៀល ក្នុង ១លីត្រ ទោះជាយ៉ាងណាក៏ដោយតម្លៃប្រេងនេះមានភាពខុសគ្នាយ៉ាងខ្លាំងនៅក្នុងចំណោមបណ្ដាប្រទេសនានានៅទូទាំងពិភពលោក។
ជាធម្មតា ប្រទេសអ្នកមាន មានតម្លៃប្រេងខ្ពស់ជាងប្រទេសក្រីក្រ ខណៈដែលប្រទេសក្រីក្រ ប្រទេសដែលផលិត និង ប្រទេសនាំចេញប្រេងមានតម្លៃទាបជាងខ្លាំង។ ភាពខុសគ្នានៃតម្លៃទូទាំងប្រទេសគឺ ដោយសារតែពន្ធប្រេងនៃប្រទេសនីមួយៗខុសៗគ្នា ប្រទេសទាំងអស់មានសិទ្ធិទទួលបានតម្លៃប្រេងដូចគ្នានៃទីផ្សារអន្តរជាតិ ប៉ុន្ដែបន្ទាប់មកសម្រេចចិត្តដាក់ពន្ធប្រេងផ្សេងៗគ្នា ទើបតម្លៃប្រេងនៅតាមបណ្ដាប្រទេសនានាមានភាពខុសគ្នា។
តម្លៃប្រេងសាំងដែលកំពុងហក់ឡើងខ្ពស់ មិនធ្លាប់មានពីមុនមក បាននាំឲ្យទំនិញគ្រប់មុខលើទីផ្សារក៏មានតម្លៃហក់ឡើងខ្ពស់ដែរ ជាក់ស្ដែងវាបានបណ្ដាលឲ្យប៉ះពាល់ដល់សេដ្ឋកិច្ចរបស់ប្រជាជនដែលមានប្រាក់ចំណូលទាប។
តោះមកមើលតម្លៃប្រេងសាំង Octane-95 នៅប្រទេសទាំង១០ ក្នុងតំបន់អាស៊ាន៖
១) សិង្ហបុរី ៖ មានតម្លៃ ២.៣៣ ដុល្លារអាមេរិក (៩,៥១៨ រៀល) ក្នុង ១លីត្រ
២) ឡាវ ៖ មានតម្លៃ ១.៨៧ ដុល្លារអាមេរិក (៧,៦១៥ រៀល) ក្នុង ១លីត្រ
៣) ហ្វីលីពីន ៖ មានតម្លៃ ១.៥៧ ដុល្លារអាមេរិក (៦,៣៩២ រៀល) ក្នុង ១លីត្រ
៤) កម្ពុជា ៖ មានតម្លៃ ១.៥៨ ដុល្លារអាមេរិក (៦,៤៥០ រៀល) ក្នុង ១លីត្រ
៥) វៀតណាម ៖ មានតម្លៃ ១.៤៤ ដុល្លារអាមេរិក (៥,៨៦៦ រៀល) ក្នុង ១លីត្រ
៦) មីយ៉ាន់ម៉ា ៖ មិនមានតម្លៃនៅក្នុងទិន្នន័យ Global petrol prices
៧) ថៃ ៖ មានតម្លៃ ១.៥០ ដុល្លារអាមេរិក (៦,១៣២ រៀល) ក្នុង ១លីត្រ
៨) ឥណ្ឌូណេស៊ី ៖ មានតម្លៃ ១.១៩ ដុល្លារអាមេរិក (៤,៨៦៧ រៀល) ក្នុង ១លីត្រ
៩) ម៉ាឡេស៊ី ៖ មានតម្លៃ ០.៤៦ ដុល្លារអាមេរិក (១,៨៩៥ រៀល) ក្នុង ១លីត្រ
១០) ប្រ៊ុយណេ ៖ មិនមានតម្លៃនៅក្នុងទិន្នន័យ Global petrol prices (ប៉ុន្ដែជាធម្មតាតម្លៃប្រេងនៅក្នុងប្រទេសនេះមានតម្លៃមិនខ្ពស់នោះទេ)។
ទោះជាយ៉ាងណា មិនទាន់មានទិន្នន័យណាមួយបញ្ជាក់ថា ប្រទេសដែលមានតម្លៃប្រេងសាំងទាបបំផុតត្រូវបានគេទិញបន្ដមកលក់ឲ្យប្រទេសដែលមានតម្លៃប្រេងកំពុងហក់ឡើងខ្ពស់នោះទេ។
ថ្វីត្បិតជាតម្លៃប្រេងនៅប្រទេសខ្លះមានការប្រែប្រួល ប៉ុន្ដែបើមើលទៅប្រទេសវេណេស៊ុយអេឡា គឺជា ប្រទេសដែលមានតម្លៃប្រេងសាំងទាបជាងគេបង្អស់លើពិភពលោក ដោយលក់ប្រេងក្នុងតម្លៃ ០.២២សេន ស្មើនឹងជាង ៩០០រៀល ប៉ុណ្ណោះក្នុង ១លីត្រ។ មូលហេតុដែលប្រទេសនេះមានប្រេងសាំងលក់ក្នុងតម្លៃទាបជាងគេបំផុតនោះគឺ ប្រទេសនេះមានកន្លែងស្ដុកទុកប្រេងដ៏ធំបំផុតមួយលើពិភពលោក៕
