គ្រាប់មីស៊ីលរបស់រុស្ស៊ីជាច្រើនគ្រាប់បានបាញ់ស្រោចទៅលើតំបន់អគារ Apartment និង នៅជិតសាលាមតេ្តយ្យមួយក្នុងរដ្ឋធានី Kyiv របស់អ៊ុយក្រែននាថ្ងៃ អាទិត្យ ទី ២៦ ខែ មិថុនា (ម៉ោងក្នុងស្រុក)។
ការបាញ់ប្រហារនេះកើតមានឡើងស្របពេលដែលប្រធានាធិបតីសហរដ្ឋអាមេរិក លោក Joe Biden បានថ្កោលទោសថាជា «ភាពព្រៃផ្សៃ» ខណៈមេដឹកនាំពិភពលោកបានប្រមូលផ្ដុំគ្នានៅអឺរ៉ុបដើម្បីពិភាក្សាអំពីការដាក់ទណ្ឌកម្មបន្ថែមទៀតលើទីក្រុងម៉ូស្គូ។
ការផ្ទុះរហូតដល់ទៅ ៤ដង បានអង្រួនកណ្ដាលទីក្រុង Kyiv នៅវេលាម៉ោង ៦:៣០នាទីព្រឹក ដែលជាការវាយប្រហារលើកដំបូងក្នុងរយៈពេល ៣សប្ដាហ៍ ចាប់តាំងពីថ្ងៃទី ០៥ ខែ មិថុនា មក។
ក្រុមមន្រ្តីបាននិយាយថា វាលឿនពេកក្នុងការនិយាយថា តើមាននរណាម្នាក់បាត់បង់ជីវិតដែរ ឬ ក៏អត់ ហើយប្រធានរដ្ឋបាលយោធាក្នុងតំបន់ លោក អូលេកស៊ី ឃូលីបា (Oleksiy Kuleba) បាននិយាយថា ប្រព័ន្ធការពារដែនអាកាស បានបាញ់ទម្លាក់មីស៊ីលមួយគ្រាប់ នៅភូមិមួយក្នុងតំបន់ជុំវិញនោះ។
ស្របពេលជាមួយគ្នានោះ លោក វីតាលី គ្លីតស្គោ (Vitali Klitshko) អភិបាលក្រុង Kyiv បាននិយាយថា «យើងកំពុងធ្វើអ្វីគ្រប់យ៉ាងតាមដែលអាចធ្វើទៅបាន ដើម្បីបញ្ឈប់ការបាញ់ប្រហារហើយយកមនុស្សចេញពីអគារដែលត្រូវបំផ្លាញ។ យើងសង្ឃឹមថា គ្មាននរណាម្នាក់ស្លាប់ទេ ប៉ុន្ដែព័ត៌មានចុងក្រោយ យើងនឹងទទួលបានក្នុងរយៈពេល ២ ឬ ៣ ម៉ោងទៀត។
ដោយឡែកអភិបាលរងក្រុង Kyiv លោក មីគូឡា ភូវ៉ូរ៉ូនស្នីគ (Mykola Povoroznyk) បាននិយាយថា មនុស្សម្នាក់បានស្លាប់ និង ៦នាក់ទៀតរងរបួស។
ទាក់ទិនករណីនេះ លោក Biden បាននិយាយថាជា «អំពើព្រៃផ្សៃរបស់ពួកគេ» ខណៈដែលមេដឹកនាំ G7 បានប្រមូលផ្ដុំគ្នាសម្រាប់កិច្ចប្រជុំកំពូលក្នុងប្រទេសអាល្លឺម៉ង់ ដោយសំដៅទៅលើការវាយប្រហារដោយគ្រាប់មីស៊ីលលើទីក្រុង Kyiv។
ជាមួយគ្នារដ្ឋមន្រ្តីការបរទេសអ៊ុយក្រែន លោក ឌីមីដ្រូ គូលីបា (Dmytro Kuleba) បាននិយាយថា បណ្ដាប្រទេស G7 គួរតែឆ្លើយតបទៅនឹងការវាយប្រហារមីស៊ីលចុងក្រោយបំផុតនេះ ដោយដាក់ទណ្ឌកម្មបន្ថែមលើរុស្ស៊ី និង ការផ្ដល់អាវុធបន្ថែមទៀតដល់អ៊ុយក្រែន។
កាលពីថ្ងៃ អាទិត្យ សប្ដាហ៍មុន នៅក្នុងកិច្ចប្រជុំនៃប្រទេសមានសេដ្ឋកិច្ចជឿនលឿន G7 ដែលមានការចូលរួមពីចក្រភពអង់គ្លេស កាណាដា ជប៉ុន និង សហរដ្ឋអាមេរិក បានស្នើឲ្យបណ្ដាប្រទេសផ្សេងៗដែលអវត្តមានក្នុងកិច្ចប្រជុំ ហាមឃាត់ការនាំចូលមាសពីប្រទេសរុស្ស៊ី ដើម្បីរឹតបន្ដឹងនូវទណ្ឌកម្ម នឹងធ្វើយ៉ាងណាឲ្យសេដ្ឋកិច្ចរបស់លោក ពូទីន ជាប់គាំង។
សូមជម្រាបថា ការវាយប្រហារភាគច្រើនរបស់រុស្ស៊ីប្រឆាំងនឹងអ៊ុយក្រែន បានផ្ដោតទៅលើតំបន់ ដុនបាស (Donbas) នៅភាគខាងកើត ជាកន្លែងដែលពួកគេប្រកាសគ្រប់គ្រងទីក្រុង សេវើរ៉ូដូណេស៊ីក (Severodonetsk) ទាំងស្រុង បន្ទាប់ពីកងទ័ពអ៊ុយក្រែនដកខ្លួនចេញ៕
