មនុស្សចំនួន ៤នាក់បានស្លាប់ និង ប្រហែល ៧០នាក់បានរងរបួសកាលពីថ្ងៃ អាទិត្យ (ម៉ោងក្នុងស្រុក) នៅពេលដែលកន្លែងអង្គុយទស្សនាការប្រកួតគោជល់នៅទីក្រុង El Espinal ប្រទេស កូឡុំប៊ី បានបាក់រលំភ្លាមៗ។
វីដេអូដែលបង្ហោះនៅលើប្រព័ន្ធផ្សព្វផ្សាយសង្គមបានបង្ហាញពីកន្លែងទស្សនាកម្ពស់ ៣ជាន់ ធ្វើពីឈើ បាក់រលំភ្លាមៗ កំឡុងពេលប្រកួតនៅក្នុងតំបន់ Tolima ដែលហេតុការណ៍នេះត្រូវបានផ្សារភ្ជាប់ទៅនឹងព្រឹត្តិការណ៍ Corraleja ដែលជាផ្នែកមួយនៃការប្រារព្ធពិធីបុណ្យ San Pedro ដ៏ពេញនិយនៅកូឡុំប៊ី។
អភិបាលក្រុង Tolima លោក Jose Ricardo Orozco បានប្រាប់វិទ្យុ Blu Radio ក្នុងស្រុកថា «មានអ្នកស្លាប់ ៤នាក់ ដោយមានស្រ្តីចំនួន ២នាក់ បុរសម្នាក់ និង អនីតិជន ១នាក់»។ មន្រ្តីសុខាភិបាលក្នុងតំបន់និយាយថា មន្ទីរពេទ្យបានព្យាបាលមនុស្សចំនួន ៣២២នាក់ ដោយក្នុងនោះមាន ៤នាក់ កំពុងស្ថិតក្រោមការមើលថែយ៉ាងយកចិត្តទុកដាក់។
ស្របពេលជាមួយគ្នា ប្រធានាធិបតីផុតអាណត្តិលោក Ivan Duque បាននិយាយថា នឹងមានការស៊ើបអង្កេតមួយ ខណៈប្រធានាធិបតីជាប់ឆ្នោត Gustavo Petro បានជំរុញឲ្យមន្រ្តីក្នុងតំបន់ហាមឃាត់ព្រឹត្តិការណ៍បែបនេះ ហើយករណីនេះមិនមែនជាលើកទី១ ឡើយនៅក្នុងប្រទេស៕
