រដ្ឋាភិបាលជប៉ុនបានជំរុញឲ្យប្រជាជនក្នុងទីក្រុង តូក្យូ និង តំបន់ជុំវិញខ្លួនកាត់បន្ថយការប្រើប្រាស់អគ្គិសនីនាថ្ងៃ ច័ន្ទ ដើមសប្ដាហ៍នេះ ខណៈដែលខ្លួនបានព្រមានថា ការផ្គត់ផ្គង់នឹងមានភាពតានតឹងស្របពេលប្រទេស ប្រឈមនឹងរលកកម្ដៅ។
ក្រសួងសេដ្ឋកិច្ច ពាណិជ្ជកម្ម និង ឧស្សាហកម្ម រំពឹងថា តម្រូវការថាមពលនឹង «ធ្ងន់ធ្ងរ» នៅរសៀលនេះ (ម៉ោងក្នុងស្រុក)។ ក្រសួងបាននិយាយថា មនុស្សគួរតែបិទភ្លើងដែរមិនចាំបាច់ ប៉ុន្ដែនៅតែប្រើម៉ាស៊ីនត្រជាក់ ដើម្បីជៀសវាងការឡើងកម្ដៅ។
អស់រយៈពេលជាច្រើនសប្ដាហ៍មកនេះ ក្រុមមន្រ្តីបានព្រមានអំពីការដាច់ចរន្ដអគ្គិសនីនៅពេលដែលសីតុណ្ហភាពកើនឡើងខ្លាំង។
នៅចុងសប្ដាហ៍នេះសីតុណ្ហភាពនៅកណ្ដាលទីក្រុង តូក្យូ បានកើនឡើងលើសពី ៣៥អង្សា ខណៈទីក្រុង Isesaki ភាគពាយ័ព្យនៃរាជធានីមានសីតុណ្ហភាពខ្ពស់បំបែកកំណត់ត្រា ៤០.២អង្សាសេ។ នោះគឺជាសីតុណ្ហភាពខ្ពស់បំផុតមិនធ្លាប់មានក្នុងខែ មិថុនា សម្រាប់ប្រទេសជប៉ុន។ ខែ មិថុនា គឺជាការចាប់ផ្តើមនៃរដូវក្តៅនៅក្នុងប្រទេសជប៉ុន ដោយសីតុណ្ហភាពជាធម្មតាក្នុងខែនេះគឺស្ថិតនៅក្រោម ៣០អង្សាសេ។
នៅក្នុងសេចក្ដីថ្លែងការណ៍មួយកាលពីថ្ងៃ អាទិត្យ សប្ដាហ៍មុន ក្រសួងបាននិយាយថាសមត្ថភាពផលិតអគ្គិសនី ត្រូវបានគេរំពឹងថានឹងធ្លាក់ចុះមកត្រឹម ៣,៧% នៅរសៀលថ្ងៃ ចន្ទក្នុងទីក្រុង តូក្យូ និងខេត្តជុំវិញចំនួន៨។
រដ្ឋាភិបាលបានស្នើឲ្យប្រជាជនបិទភ្លើងដែលមិនចាំបាច់រយៈពេល៣ម៉ោង ចាប់ពីម៉ោង ១៥:០០នាទីសៀលទៅ ហើយប្រើប្រាស់ម៉ាស៊ីនត្រជាក់ឲ្យបានត្រឹមត្រូវ។
សូមជម្រាបថា ការផ្គត់ផ្គង់ថាមពលរបស់ប្រទេសជប៉ុន មិនដំណើរការរលូនឡើយ ចាប់តាំងពីការរញ្ជួយដីនៅក្នុងតំបន់ភាគឦសានរបស់ខ្លួនកាលពីខែ មីនា បានបង្ខំឲ្យរោងចក្រថាមពលនុយក្លេអ៊ែរមួយចំនួនត្រូវផ្អាកប្រតិបត្តិការ។
ក្រុមមន្ត្រីក៏បានបិទរោងចក្រឥន្ធនៈហ្វូស៊ីលដែលមានវ័យចំណាស់មួយចំនួនផងដែរ ក្នុងការប៉ុនប៉ងកាត់បន្ថយការបញ្ចេញកាបូនឌីអុកស៊ីត៕
