ប្រធានាធិបតីរុស្ស៊ី លោក Vladimir Putin បានថ្កោលទោសចំពោះ «មហិច្ឆតាអធិរាជ» របស់អង្គការ NATO ដោយចោទប្រកាន់សម្ព័ន្ធមិត្តយោធាថា កំពុងស្វែងរកការអះអាងពី «ឧត្ដមភាព» របស់ខ្លួនតាមរយៈជម្លោះអ៊ុយក្រែន។
មេដឹកនាំរុស្ស៊ីក៏បាននិយាយកាលពីថ្ងៃ ពុធ ថា លោកនឹងឆ្លើយតបយ៉ាងទន់ភ្លន់ប្រសិនបើ NATO ដាក់ពង្រាយកងទ័ព និង ហេដ្ឋារចនាសម្ព័ន្ធនៅក្នុងប្រទេសហ្វាំងឡង់ និង ស៊ុយអែត បន្ទាប់ពីប្រទេស Nordic ទាំង២ ចូលរួមសម្ព័ន្ធភាពយោធានេះ។
លោក ពូទីន បានធ្វើការអត្ថាធិប្បាយ ១ថ្ងៃ បន្ទាប់ពីសមាជិក NATO តួកគីបានដកវេតូរបស់ខ្លួនជុំវិញការប៉ុនប៉ងដោយហ្វាំងឡង់ និង ស៊ុយអែត ដើម្បីចូលរួមសម្ព័ន្ធភាព ក្រោយពេលប្រទេសទាំង ៣ យល់ព្រមក្នុងការការពារសន្តិសុខរបស់គ្នាទៅវិញទៅមក។
ការចូលរួមរបស់ទីក្រុង Helsinki និង Stockholm ក្នុងអង្គការ NATO គឺជាការផ្លាស់ប្ដូរដ៏ធំបំផុតមួយនៅក្នុងសន្តិសុខអឺរ៉ុប ក្នុងរយៈពេលជាច្រើនទសវត្សរ៍មកនេះ។
លោក ពូទីន បានប្រាប់ទូរទស្សន៍រដ្ឋរុស្ស៊ីបន្ទាប់ពីកិច្ចពិភាក្សាជាមួយមេដឹកនាំតំបន់ក្នុងរដ្ឋ Turkmenistan ដែលជាអតីតសហភាពសូវៀតនៅអាស៊ីកណ្ដាលថា «ជាមួយស៊ុយអែត និង ហ្វាំងឡង់ យើងមិនមានបញ្ហាដូចជាមួយនឹងអ៊ុយក្រែនទេ។ ពួកគេចង់ចូល NATO សូមចូលចុះ ប៉ុន្ដែពួកគេត្រូវតែយល់ថា នឹងមិនមានការគំរាមកំហែងទេ។ ប្រសិនបើឧបសម្ព័ន្ធយោធា និង ហេដ្ឋារចនាសម្ព័ន្ធ ត្រូវបានដាក់ពង្រាយនៅទីនោះ យើងនឹងត្រូវឆ្លើយតបដោយទន់ភ្លន់ និង ការគំរាមកំហែងដល់ប្រទេសទាំង២ នេះ ដូចដែលការគំរាមកំហែងដែលពួកគេបង្កចំពោះយើង»។
លោកបន្ថែមថា ទំនាក់ទំនងរបស់ទីក្រុង ម៉ូស្គូ ជាមួយទីក្រុង Helsinki និង Stockholm នឹងមានភាពជូរចត់ដោយចៀសមិនរួច ជុំវិញសមាជិកភាពអង្គការ NATO របស់ពួកគេ។
លោក ពូទីន ថា «អ្វីគ្រប់យ៉ាងគឺល្អរវាងពួកយើង ប៉ុន្ដែឥលូវនេះវាអាចនឹងមានភាពតានតឹងខ្លះ វាប្រាកដជាមាន។ ចៀសមិនរួចទេ បើមានការគំរាមកំហែងមកលើយើង»៕
