ប្រធានាធិបតីរុស្ស៊ី លោក Vladimir Putin បានឌឺដងទៅមេដឹកនាំលោកខាងលិច ដែលចំអកការហាត់ប្រាណរបស់លោក ដោយលោក Putin និយាយថា ពួកគេមើលទៅគួរឲ្យខ្ពើម ប្រសិនបើពួកគេមិនបានពាក់អាវ។
លោក ពូទីន បានធ្វើការអត្ថាធិប្បាយក្នុងអំឡុងពេលដំណើរទស្សនកិច្ចទៅកាន់ប្រទេស តួកមេនីស្ថាន នៅព្រឹកថ្ងៃ ព្រហស្បតិ៍ នៅពេលត្រូវបានគេសួរអំពីមេដឹកនាំលោកខាងលិចដែលនិយាយលេងសើចអំពីគាត់នៅឯកិច្ចប្រជុំកំពូល G7។
នៅពេលមេដឹកនាំ G7 អង្គុយជជែកគ្នាក្នុងអង្គប្រជុំ នាយករដ្ឋមន្រ្តីចក្រភពអង់គ្លេស លោក Boris Johnson បាននិយាយចំអកថា «មេដឹកនាំ G7 ទាំងអស់គ្នាអាចដោះសម្លៀកបំពាក់ចេញបាន ដើម្បីបង្ហាញថា យើងមានសាច់ដុំរឹងមុំាជាងពូទីន ចំពេលមានភាពតានតឹងរវាងរុស្ស៊ី និង លោកខាងលិចជុំវិញសកម្មភាពយោធារបស់ទីក្រុង ម៉ូស្គូ នៅអ៊ុយក្រែន។
ចំណែកឯនាយករដ្ឋមន្រ្តីកាណាដា លោក Justin Trudeau ក៏បាននិយាយលេងសើចដែរថា មេដឹកនាំលោកខាងលិចអាចប្រៀបធៀបរូបភាពដោះអាវរបស់ពួកគេ ទៅនឹងរូបភាពដោះអាវបញ្ចេញសាច់ដុំរបស់លោក ពូទីន ជិះលើខ្នងសេះរបស់គាត់បាន។
ថ្លែងទៅកាន់អ្នកសារព័ត៌មាន លោក ពូទីន បានឆ្លើយតបវិញថា មិនដូចលោក Trudeau ទេ មេដឹកនាំលោកខាងលិចបានផឹកគ្រឿងស្រវឹង ហើយមិនហាត់ប្រាណ ឬ លេងកីឡាអ្វីឡើយ។
លោក ពូទីន បានកត់សម្គាល់ថា «ខ្ញុំមិនដឹងថា ពួកគេចង់ដោះអាវ ឬ ដោះអ្វីក្រោមចង្កេះដោយរបៀបណាទេ។ ប៉ុន្ដែខ្ញុំគិតថា វានឹងជាការមើលឃើញដ៏គួរឲ្យខ្ពើមណាស់។ លោក គិតថា ដើម្បីឲ្យបានរាងស្អាត មេដឹកនាំក្រុមប្រទេស G7 ទាំងអស់គួរតែចំណាយពេលហាត់ប្រាណ ឬ លេងកីឡាខ្លះផង»៕
