មនុស្ស ៦នាក់បានស្លាប់ និង ច្រើនជាង ៣៦នាក់ទៀត បានរងរបួស នៅពេលដែលបុរសម្នាក់កាន់កាំភ្លើងវែងមួយដើម បើកការបាញ់ប្រហារលើក្បួនព្យុហយាត្រាក្នុងឱកាសប្រារព្ធពិធីបុណ្យឯករាជ្យជាតិអាមេរិក នៅជាយទីក្រុង Chicago នៃរដ្ឋ illinois នាថ្ងៃទី ០៤ ខែ កក្កដា ឆ្នាំ ២០២២ (ម៉ោងក្នុងស្រុក)។
ប៉ូលីសអាមេរិកបានប្រាប់ថា ពួកគេចាប់បានជនសង្ស័យម្នាក់ឈ្មោះ Robert E Crimio មានអាយុ ២២ឆ្នាំ។
អាជ្ញាធរបាននិយាយថា ខ្មាន់កាំភ្លើងបានបើកការបាញ់ប្រហារនៅម៉ោងប្រហែល ១០:១៥នាទីព្រឹក នៅពេលដែលក្បួនដង្ហែរប្រហែល ៣ភាគ៤ បានដើរឆ្លងកាត់ហាងទំនិញមួយកន្លែង។
លោក Christopher Covelli អ្នកនាំពាក្យកងកម្លាំងពិសេសនៃក្រុមប្រឆាំងឧក្រិដ្ឋកម្ម Lake County បានឲ្យដឹងថា ខ្មាន់កាំភ្លើងបានបាញ់ចេញពីលើដំបូលហាងទំនិញនោះ ដោយខ្មាន់កាំភ្លើងដើរឡើងទៅតាមជណ្ដើរជាប់នឹងអគារដែលនៅក្បែរនោះ។
លោកបាននិយាយនៅក្នុងសន្និសីទសារព័ត៌មានថា ជនរងគ្រោះជាច្រើននាក់បានស្លាប់នៅកន្លែងកើតហេតុ ហើយជនរងគ្រោះម្នាក់ត្រូវបានបញ្ជូនទៅសង្រ្គោះនៅមន្ទីរពេទ្យ ប៉ុន្ដែបានបញ្ជាក់ថា ស្លាប់នៅពេលបញ្ជូនទៅដល់ទីនោះ។
មន្រ្តីប៉ូលីសបានឲ្យដឹងថា ជនរងគ្រោះក្នុងហេតុការណ៍នេះ មានអាយុចន្លោះពី ៨ឆ្នាំ ទៅ ៨៥ឆ្នាំ ហើយត្រូវបញ្ជូនទៅសង្រ្គោះបន្ទាន់នៅមន្ទីរពេទ្យ Highland Park។
ទាក់ទិននឹងករណីនេះ ប៉ូលីសមិនទាន់បានបញ្ជាក់ពីមូលហេតុនៅពីក្រោយនៃការបាញ់ប្រហារនេះនៅឡើយទេ៕
