ប្រទេសអ៉ីតាលីបានប្រកាសភាពអាសន្នលើរដ្ឋចំនួន ៥ នៅក្នុងតំបន់ភាគខាងជើង និង បានប្រកាសមូលនិធិសង្រ្គោះបន្ទាន់ជុំវិញគ្រោះរាំងស្ងួតកាន់តែអាក្រក់ទៅៗ ក្នុងរយៈពេលប៉ុន្មានសប្ដាហ៍ចុងក្រោយនេះ។
រដ្ឋាភិបាលបាននិយាយនៅក្នុងសេចក្ដីថ្លែងការណ៍មួយថា គណៈរដ្ឋមន្រ្តីបានអនុម័តច្បាប់គ្រាអាសន្ននៅក្នុងតំបន់ចំនួន ៥ គឺ៖ តំបន់ អ៉ីមីលីយ៉ា-រ៉ូម៉ាកណា (Emilia-Romagna), ហ្វ្រីយូលី-វេនេសហ្សៀ ហ្គីយូលីយ៉ា (Friuli-Venezia Giulia), លូមបាឌី (Lombardy), តំបន់ ភីតម៉ុន (Piedmont) និង តំបន់ វេនេតូ (Veneto) រហូតដល់ថ្ងៃទី ៣១ ខែ ធ្នូ ឆ្នាំ ២០២២ ហើយនឹងមានការបែងចែកមូលនិធិចំនួន ៣៩.៦លានដុល្លារ ដើម្បីជួយសង្រ្គោះដល់អ្នកដែលរងផលប៉ះពាល់។
ប្រទេសអ៉ីតាលីកំពុងប្រឈមមុខនឹងរលកកំដៅដំបូងខុសពីធម្មតា និង កង្វះខាតទឹកភ្លៀង ជាពិសេសនៅតំបន់ភាគខាងជើងនៃជ្រលងភ្នំ Po ដែលបានទទួលរងផលប៉ះពាល់ខ្លាំងមិនធ្លាប់មានក្នុងរយៈពេល៧០ឆ្នាំ កន្លងមកនេះ។
ច្បាប់គ្រាអាសន្ននេះនឹងផ្ដល់នូវ «មធ្យោបាយ និង អំណាចវិសាមញ្ញ» ដើម្បីជួយធានាសុវត្ថិភាពសាធារណៈសំណងសម្រាប់ការខាតបង់ ខណៈប្រជាជនស្វែងរកការធានានូវលក្ខខណ្ឌរស់នៅ ជាធម្មតាសម្រាប់នៅក្នុងតំបន់រងគ្រោះនោះ។
យោងតាមសហជីពកសិកម្មដ៏ធំបំផុតមួយរបស់ប្រទេសអ៉ីតាលី បានឲ្យដឹងថា គ្រោះរាំងស្ងួតបានគំរាមកំហែងដល់ជាង ៣០% នៃផលិតកម្មកសិកម្មជាតិ និង ពាក់កណ្ដាលទៀតបានប៉ះពាល់ដល់កសិដ្ឋាននៅក្នុងជ្រលងភ្នំ Po។
ការប្រកាសច្បាប់គ្រាអាសន្ននេះកើតឡើង ១ថ្ងៃបន្ទាប់ពីមនុស្សយ៉ាងហោចណាស់ ៧នាក់ បានស្លាប់បន្ទាប់ពីផ្ទាំងទឹកកកមួយបានដួលរលំនៅតំបន់ភ្នំ អាល់ អ៉ីតាលី ដែលនាយករដ្ឋមន្រ្តី Mario Draghi បាននិយាយថា «គ្មានការសង្ស័យ» ទាក់ទងនឹងការឡើងកំដៅផែនដី៕
