ចំណងស្នេហាតារាចម្រៀងស្រីពេជ្រ សូលីកា និងលោក ហាន គីម បានដើរមកដល់ទីបញ្ចប់កាលពីថ្មីៗនេះ ពួកគេអះអាងពីទំនួលខុសត្រូវក្នុងការចិញ្ចឹមកូនប្រុសរៀងៗខ្លួន និងសល់តែឈ្មោះជាមិត្តល្អនឹងគ្នាទេ។ បើទោះបីជា សូលីកា ធ្លាប់លើកឡើងថា អ្នកនាងចង់រៀបការនៅឆ្នាំ២០២១ ប៉ុន្ដែដោយសារតែពេលនោះកូវីដផ្ទុះពេកទើបនាងបានរំសាយមង្គលការចោល ហើយស្រាប់តែមកដល់ដើមខែកក្កដានេះលោក ហាន គីម ជាសា្វមីនាងបានចេញមកទម្លាយពីការប្រេះឆាទំនាក់ទនងតែម្ដង។
ក្រោយភាគីខាងស្វាមីទម្លាយថាទំនាក់ទំនងអ្នកទាំងពីរនាក់នៅសល់តែពាក្យថា ឪពុកម្ដាយសម្រាប់តែកូនហើយនោះ អ្នកនាង ពេជ្រ សូលីកា ក៏បានបញ្ចេញសារដ៏ឈឺចាប់មួយប្រាប់ទៅមហាជនឱ្យបានដឹងដែរថា អ្នកនាងនឹងបង្រៀនកូនប្រុសរបស់អ្នកឱ្យចេះស្គាល់ពីការឱ្យតម្លៃមនុស្សជុំវិញខ្លួនឱ្យបានច្រើន រៀនកុំកុំហក់ កុំក្បត់ កុំអាត្មានិយម កុំអំនួតលើខ្លួនឯង កុំបោកប្រាស់ កុំធ្វើបាបចិត្តគេ កុំនិយាយជាន់មនុស្សដែលខ្លួនស្រលាញ់ កុំចង់មានបានលើសពីសម្ថភាពរបស់ខ្លួន កុំរៀនល្បិចកល កុំហ៊ឺហានិងរបស់ក្លែងក្លាយ កុំងប់ងល់ទៅទង្វើររបស់ខ្លួនបានប្រឌិត កុំរៀនសម្ដែងក្នុងឆាកជីវិតពិត រៀនទទួលយកកំហុសដែលខ្លួនបានធ្វើដាក់គេឱ្យបានច្រើន រៀនទទួលការពិត រៀនទទួលយកកំហុសដែលខ្លួនបានធ្វើ រៀនយល់ចិត្តគេ សំខាន់ជាងគេនោះគឺភាពស្មោះត្រង់ មិនក្បត់ផិត និងការឱ្យតម្លៃមនុស្ស My Son My Everything ។ សារនេះបានធ្វើឱ្យមហាជនកាន់តែមានចិត្តខ្លោចអាណិតដល់ ពេជ្រ សូលីកា ជាពន់ពេក។
រហូតមកទល់ថ្ងៃម្សិលមិញនេះ ពេជ្រ សូលីកា បានបញ្ចេញសារមួយទៀត បន្ទាប់ពីនាងទទួលបានកម្លាំងចិត្តពីអ្នកគាំទ្រ នាងថា៖ «ខ្ញុំពិតជាមិននឹកស្មានថា ខ្ញុំមានសំណាងអាចទទួលបានពាក្យជូនពរ និងការផ្តល់កម្លាំងចិត្តច្រើនបែបនេះពីអ្នកទាំងអស់គ្នា នេះពិតជាថ្នាំទិព្វដែលមានលុយមហាសាលហើយមិនអាចទិញបាន ខ្ញុំសូមអរគុណដល់អ្នកទាំងអស់គ្នាខ្លាំងមែនទែន ខ្ញុំមិនអីទេ បន្តែវារៀងពិ បា ក បន្តិចប្រហែលជាខ្ញុំត្រូវការពេលវេលាមួយរយៈ ដើម្បីជំនះវា ខ្ញុំរំភើបចិត្តដែលចូលអានសាររបស់អ្នកទាំងអស់គ្នាខ្ញុំសុំទោសដែលមិនបានតបសារបានទាំងអស់គ្នា ទោះជាមិនបានតប តែខ្ញុំបានឃើញនឹងទទួលបានទាំងអស់គ្នាណា។»
នៅក្នុងចិត្តរបស់អ្នកគាំទ្រ ពេជ្រ សូលីកា ត្រូវបានចាត់ទុកថា ជាមនុស្សស្រីដែលរឹងមាំខ្លាំងបំផុត ព្រោះនាងហែលឆ្លងជីវិតជូរជត់ក្នុងវិថីសិល្បៈមករហូត ចាប់តាំងពីរឿងអាស្រូវមានកូនស្រី រឿងម្ដាយត្រូវចាប់ខ្លួន រឿងបណ្ដឹងជាមួយមិត្តសម្លាញ់ រឿងរិះគន់ថតស្រាបបៀរ និងរឿងបែកផ្លូវគ្នាជាមួយស្វាមី ។ អ្នកគាំទ្រគិតថា ពេជ្រ សូលីកា អាចនឹងរងសម្ពាធផ្លូវចិត្តខ្លាំងក្លា បន្ទាប់ពីជួបរឿងច្រើនទាំងអស់នេះ ប៉ុន្តែ សូលីកា នៅតែក្រោយឈរបានដើម្បីកូនប្រុសរបស់នាង៕
