មន្រ្តីអាកាសចរណ៍បាននិយាយថា យន្ដហោះអាកាសចរណ៍ខ្នាតតូច ២គ្រឿង បានបុកគ្នានៅអាកាសយានដ្ឋាន North Las Vegas បណ្ដាលឲ្យមនុស្សនៅលើយន្ដហោះទាំង ២គ្រឿង បាត់បង់ជីវិត។
ឧប្បត្តិហេតុនេះកើតឡើងនៅថ្ងៃ អាទិត្យ សប្ដាហ៍មុននេះ វេលាម៉ោង ១២ថ្ងៃត្រង់ (ម៉ោងក្នុងស្រុក) នៅអាកាសយានដ្ឋានមួយក្នុងរដ្ឋ Nevada នៃសហរដ្ឋអាមេរិក។
នាយកដ្ឋានពន្លត់អគ្គិភ័យនៃទីក្រុង North Las Vegas បានប្រកាសតាមបណ្ដាញសង្គម Twitter ថា «មនុស្សចំនួន ៤នាក់ ត្រូវបានរាយការណ៍ថាបានស្លាប់ ខណៈឧបទ្ទវហេតុនោះ កំពុងបន្ដស្ថិតក្រោមការស៊ើបអង្កេត»។
អាជ្ញាធរសុវត្ថិភាពដឹកជញ្ជូនអាមេរិកបានឲ្យដឹងថា ខ្លួនកំពុងស៊ើបអង្កេតលើសោកនាដកម្មខាងលើដែលពាក់ព័ន្ធជាមួយយន្ដហោះធុន Piper PA-46 ១គ្រឿង និង យន្ដហោះធុន Cessna 172N ១គ្រឿងទៀត សុទ្ធតែជាយន្ដហោះខ្នាតតូចដូចគ្នា។
យោងតាមរដ្ឋបាលអាកាសចរណ៍សហព័ន្ធ បាននិយាយថា យន្ដហោះធុន Piper PA-46 បានធ្លាក់ចូលទៅក្នុងវាលមួយនៅខាងកើតផ្លូវ Runway 30-Right ហើយយន្ដហោះធុន Cessna បានធ្លាក់ចូលទៅក្នុងស្រះទឹក ដោយយន្ដហោះនីមួយៗជិះគ្នា ២នាក់។ ខណៈនាយកដ្ឋានអាកាសចរណ៍ Clark County បាននិយាយនៅក្នុងសេចក្ដីថ្លែងការណ៍មួយថា មិនមានអ្នកណាម្នាក់នៅរស់រានមានជីវិតនោះទេ។
ដោយឡែកនាយកដ្ឋានអាកាសចរណ៍បាននិយាយថា ប៉ុន្មានម៉ោងក្រោយពីឧប្បត្តិហេតុយន្ដហោះបុកគ្នារួច អាកាសយានដ្ឋាននៅតែបើកផ្លូវសម្រាប់ចរាចរណ៍ផ្លូវអាកាស ដោយផ្លូវរត់ចំនួន ២ ត្រូវបានបិទនៅពេលល្ងាច ដើម្បីអនុញ្ញាតឲ្យអ្នកស៊ើបអង្កេតធ្វើការត្រួតពិនិត្យ៕
