នៅក្នុងមហាសន្និបាតវិសាមញ្ញអាណត្តិទី៧ និងការបោះឆ្នោតប្រធាននិងសមាជិកគណៈកម្មាធិការប្រតិបត្តិ ឆ្នាំ២០២១-២០២៥ របស់សហព័ន្ធកីឡាប៊ូលនិងប៉េតង់កម្ពុជា នារសៀលថ្ងៃពុធ ទី២០ ខែកក្កដា ឆ្នាំ២០២២ មានការបោះឆ្នោតផ្លាស់ប្តូរប្រធានសហព័ន្ធមួយនេះ។
ឯកឧត្តម សុខ សូកាន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នឹងកាន់តំណែងជាប្រធានសហព័ន្ធកីឡាប៊ូលនិងប៉េតង់កម្ពុជា ជំនួសឯកឧត្តម ស សុខា រដ្ឋលេខាធិការក្រសួងអប់រំយុវជននិងកីឡា សម្រាប់អាណត្តិថ្មី។
អត្ថបទពាក់ព័ន្ធ៖មន្រ្តីជំនាញ និយាយពីការដណ្តើមមេដាយមាស២គ្រឿងក្នុងកីឡា World Gamesលើទឹកដីអាមេរិក
បើការផ្តល់កិច្ចសម្ភាសន៍ជាមួយក្រុមការងារសារព័ត៌មានត្រយង លោកបណ្ឌិត អាំង សិរីពិសិដ្ឋ អ្នកនាំពាក្យរបស់ឯកឧត្តម ស សុខា ប្រធានកិត្តិយសរបស់សហព័ន្ធកីឡាប៊ូលនិងប៉េតង់កម្ពុជា បានមានប្រសាសន៍ថា៖«មានកត្តា៣យ៉ាងដែលនាំឱ្យមានការផ្លាស់ប្ដូរថ្នាក់ដឹកនាំរបស់សហព័ន្ធនេះ ដោយទី១ កត្តាពេលវេលា ទី២ កត្តាភាពរឹងមាំនៃថ្នាក់ដឹកនាំសហព័ន្ធគ្រប់ជាន់ថ្នាក់ និងទី៣ កត្តាផ្តល់ឱកាសថ្នាក់ដឹកនាំបន្តវេន»។
«ការដកឃ្លាពីតួរនាទីនេះធ្វើឱ្យឯកឧត្តម ស សុខា មានពេលច្រើនក្នុងការជួយសហព័ន្ធផ្សេងទៀត ជាពិសេសសហព័ន្ធកីឡាសិស្សនិស្សិតនិងសហព័ន្ធកីឡាបាល់ទះជាដើម។ មួយបែបទៀតការដកផ្លាស់ប្ដូរនេះក្រោយថ្នាក់ដឹកនាំសម្លឹងឃើញថាសហព័ន្ធកីឡាប៊ូលនិងប៉េតង់កម្ពុជា មានភាពរឹងមាំនិងមានផែនការជាក់លាក់យូរអង្វែងត្រឹមត្រូវ។ សម្រាប់ថ្នាក់ដឹកនាំថ្មីក៏មិនមានអ្នកផ្សេងណាក្រៅពីគ្រួសារកីឡាប៉េតង់ នេះដែរ គឺគាត់ជាកូនរបស់សម្តេចវិបុលបញ្ញា សុខ អាន ដែលជាស្ថាបនិមួយរូបរួមបង្កើតសហព័ន្ធនៅកម្ពុជា កាលពីឆ្នាំ១៩៩២ផងដែរ»។
អត្ថបទពាក់ព័ន្ធ៖ឯកឧត្តម សុខ សូកាន ធ្វើជាប្រធានសហព័ន្ធកីឡាប៊ូលនិងប៉េតង់កម្ពុជា ជំនួសឯកឧត្តម ស សុខា
សហព័ន្ធកីឡាប៊ូលនិងប៉េតង់ បង្កើតឡើងដំបូងគឺជាចេញពីគំនិតផ្ដួចផ្ដើមពីថ្នាក់ដឹកនាំជំនាន់មុនមានសម្តេចវិបុលបញ្ញា សុខ អាន ជាប្រធាននិងសម្តេចក្រឡាហោម ស ខេង ជាប្រធានកិត្តយស ព្រមទាំងស្ថាបនិកជាច្រើនរូបផ្សេងទៀត បានលះបង់កម្លាំងកាយចិត្ត ពេលវេលាដ៏មមាញឹកនិងថវិកាផ្ទាល់ខ្លួន ក្នុងការជំរុញវិស័យកីឡាប៊ូលនិងប៉េតង់រហូតមានភាពល្បីល្បាញនិងទទួលបានការកោតសរសើរលើសកលលោកដោយទទួលបានការប្រសិទ្ធនាមពីសហព័ន្ធកីឡាប៊ូលនិងប៉េតង់អន្តរជាតិថា «កម្ពុជា ជាមហាអំណាចលើប្រភេទកីឡាប៉េតង់»។
យោងតាមលទ្ធផលនៃការបោះឆ្នោត ឯកឧត្តម ស សុខា បានជ្រើសតាំងជាប្រធានកិត្តិយស និង ឯកឧត្តម សុខ សូកាន ដែលត្រូវបានជ្រើសតាំងជាប្រធានសហព័ន្ធកីឡាប៊ូល និងប៉េតង់កម្ពុជា អាណត្តិទី៧ ឆ្នាំ២០២១ – ឆ្នាំ២០២៥ និងសមាជិកគណៈកម្មាធិការប្រតិបត្តិចំនួន ១៥រូប ផ្សេងទៀត ដែលទទួលបានទំនុកចិត្តបោះឆ្នោតគាំទ្រ ពីមហាសន្និបាតវិសាមញ្ញ នៅថ្ងៃទី២០ ខែកក្កដា ឆ្នាំ២០២២។
ជាមួយគ្នានេះដែរឯកឧត្តម សុខ សប្បាយណា អគ្គលេខាធិការសហព័ន្ធកីឡាប៊ូលនិងប៉េតង់កម្ពុជា បានបញ្ជាក់ថា៖«ខ្ញុំសូមថ្លែងអំណរគុណ ដល់ ឯកឧត្តម ស សុខា ដែលបានចូលរួមត្រួសត្រាយផ្លូវ និងដឹកនាំសហព័ន្ធដោយផ្ទាល់ ចាប់តាំងពីថ្ងៃទី១២ ខែឧសភា ឆ្នាំ២០១៩ រហូតមកដល់បច្ចុប្បន្ន ដែល ឯកឧត្តម បានចង្អុលបង្ហាញដោយផ្ទាល់ និងនាំមកនូវសមិទ្ធផលគួរឱ្យកត់សម្គាល់ទាំងលំហូរការងាររដ្ឋបាលប្រចាំថ្ងៃ រចនាសម្ព័ន្ធ បទដ្ឋានបច្ចេកទេស ការបណ្តុះបណ្តាលធនធានមនុស្ស ហេដ្ឋារចនាសម្ព័ន្ធទីលាន ការហ្វឹកហាត់ ការប្រកួតស្របតាមបទបញ្ជាបច្ចេកទេស និងលក្ខន្តិកៈរបស់សហព័ន្ធ ជាពិសេស ការទទួលបានមេដាយកម្រិតអន្តរជាតិ ជាដើម។ បន្ថែមពីនេះ ឯកឧត្តម បានលះបង់នូវពេលវេលា និងថវិកាផ្ទាល់ខ្លួនជាច្រើន ដែលនេះពិតជាមានអត្ថន័យ និងការចូលរួមចំណែកយ៉ាងសំខាន់ក្នុងការអភិវឌ្ឍ និងភាពជោគជ័យរបស់សហព័ន្ធ។ ខ្ញុំបាទនឹងបន្តព្យាយាមឱ្យអស់ពីលទ្ធភាព និងអស់ពីសមត្ថភាព ដើម្បីបន្តចូលរួមជំរុញសហព័ន្ធឱ្យមានការរីកលូតលាស់ដូចការគ្រោងទុក ស្របតាមចក្ខុវិស័យ និងគោលបំណងរបស់ថ្នាក់ដឹកនាំជំនាន់មុន»។
ចំណែកនៅលើហ្វេសប៊ុកផ្លូវការរបស់ឯកឧត្តម ស សុខា សង្កត់ធ្ងន់ថា៖«តាមពិតទៅសហព័ន្ធត្រូវរៀបចំការបោះឆ្នោតជ្រើសតាំងប្រធាន និងគណ:កម្មាធិការប្រតិបត្តិនៃសហព័ន្ធកីឡាប៊ូលនិងប៉េតង់ កម្ពុជា សម្រាប់អាណត្តិឆ្នាំ២០២១-២០២៥ តាំងពីឆ្នាំ២០២១មកម៉្លេះ។ ប៉ុន្តែដោយសារស្ថានភាពកូវីដ-១៩ រាតត្បាតខ្លាំងនិងម៉្យាងដោយសារតែកៀកនឹងព្រឹត្តិការណ៍កីឡាស៊ីហ្គេមលើកទី៣១ នៅប្រទេសវៀតណាមផង ទើបធ្វើឱ្យលើកពេលមកដល់ថ្ងៃនេះតែម្តង»។
សូមបញ្ជាក់ថាគិតចាប់តាំងពីបង្កើតសហព័ន្ធតាំងពីឆ្នាំ១៩៩២ មកសហព័ន្ធកីឡាប៊ូលនិងប៉េតង់កម្ពុជា ដណ្តើមបានមេដាយជូនជាតិមាតុភូមិចំនួន៣៨១គ្រឿង ក្នុងនោះមេដាយមាស១១២គ្រឿង មេដាយប្រាក់ ១៣៣គ្រឿង និងមេដាយសំរឹទ្ធិចំនួន១៣៦គ្រឿង និងថ្មីៗនេះទទួលបានមេដាយមាស២គ្រឿងបន្ថែមទៀតពីកីឡាពិភពលោក The World Games ឆ្នាំ២០២២ នៅសហរដ្ឋអាមេរិក៕
