នេះចាត់ទុកជាប្រវត្តិសាស្ត្រថ្មីមួយសម្រាប់កម្ពុជានៅក្នុងការប្រកួតសម្រស់ព្រោះ កញ្ញា សារី ស្រីពេជ្រ បានបំបែកកំណត់ត្រាដណ្ដើមបានមកុដពីវេទិកាប្រកួតកម្រិតអន្តរជាតិក្នុងការប្រកួត Miss Petite Global 2022 នៅឯប្រទេសម៉ាឡេស៊ី។ បងប្អូនអ្នកគាំទ្រមួយចំនួនប្រកួតជាចង់ដឹងហើយថាតើកម្មវិធី Miss Petite នេះមានប្រវត្តិបែបណា? ហើយលក្ខខ័ណ្ឌនៃការប្រកួតដូចទៅនឹងការប្រកួត Miss World ឬ Miss Universe ដែរឬទេ?
ការប្រកួតបវរកញ្ញា Miss Petite នេះមានការលំបាកក្នុងការស្រាវជ្រាវជាខ្លាំងហើយមិនសូវសំបូរឯកសារដូចកម្មវិធីផ្សេងៗនោះឡើយ។ តាមរយៈការស្រាវជ្រាវនៅលើ Google បានឱ្យដឹងយ៉ាងសង្ខេបថា៖ «កម្មវិធីប្រកួត Miss Petite ចាប់ផ្ដើមឡើងនៅឆ្នាំ១៩៩០ ដោយមានស្ត្រី២រូបនៅក្នុងរដ្ឋ Houston ដែលបានគិតថាស្ត្រីដែលមានកម្ពស់ខ្ពស់មានប្រៀបជាង (គុណប្រយោជន៍ជាង) នៅក្នុងការប្រកួតបវរកញ្ញាអាមេរិក។ មិនត្រឹមតែការប្រកួតឡើយសូម្បីតែនៅក្នុងកីឡាស្ត្រីដែលខ្ពស់ច្រើនតែមានប្រៀបជាងជានិច្ចដែលនេះបានបង្ហាញពីការរើសអើងមួយ។
ដូច្នេះទើបគេបង្កើតការប្រកួតនេះឡើងដោយអ្នកចូលរួមប្រកួតមិនតម្រូវឱ្យមានកម្ពស់ខ្ពស់នោះទេ ប៉ុន្តែបេក្ខនារីដែលចូលប្រកួតតម្រូវឱ្យមានកម្ពស់ទាបជាង១,៦៥ សង់ទីម៉ែត្រ។ នេះបើយោងតាមការវែបសាយ ermworld ដែលបានផ្សាយពីការប្រកួតជាប្រវត្តិសាស្ត្ររបស់ Miss Petite Malaysia តាំងពីឆ្នាំ១៩៩៧ មក។
តាមការរៀបរាប់នៅក្នុងនោះការប្រកួតនេះមិនខុសពីការប្រកួតសម្រស់ផ្សេងៗនោះឡើយ ព្រោះបេក្ខនារីទាំងអស់ត្រូវដើរបង្ហាញរាងក្នុងឈុតកីឡា ឈុតហែលទឹក និងឈុតរាត្រីស្រមោលស។ ទោះជាមានរូបសម្រស់ស្អាត អាចដើរបង្ហាញរាងយ៉ាងស្រស់សោភាក៏ពិតមែន ប៉ុន្តែបេក្ខនារីដែលជាប់ជាជ័យលាភីនៅតែជាបេក្ខនារីដែលអាចឆ្លើយសំនួរបានល្អជាងគេដដែល ព្រោះគ្រប់ការប្រកួតសម្រស់ទាំងអស់គឺឱ្យតម្លៃទៅលើការសម្ភាសន៍សម្ងាត់ និងការឆ្លើយសំនួរនៅលើវេទិកាជាគោលការណ៍ក្នុងការកំណត់ម្ចាស់ជ័យលាភី។
សម្រាប់កម្ពុជានេះអាចចាត់ទុកជាការបង្កើតកំណត់ត្រាប្រវត្តិសាស្ត្រថ្មីមួយនៅលើវេទិកាប្រកួតអន្តរជាតិ ព្រោះនេះគឺជាលើកទីមួយដែលបេក្ខនារីបវរកញ្ញាកម្ពុជាអាចដណ្ដើមបានមកុដនៅលើឆាកប្រកួតអន្តរជាតិបែបនេះ៕
សូមទស្សនាវីដេអូ Top News ៖
ប្រភព៖ google, ermworld
