កាលពីថ្ងៃទី២១ ខែសីហា ឆ្នាំ២០២២ បវរកញ្ញាចក្រវាឡកម្ពុជា Miss Universe Cambodia កញ្ញា ហង្ស ម៉ានីតា បានផ្ដល់កិត្តិយសសម្ភាសន៍ក្នុងកម្មវិធីមួយរបស់ ឆាណែល The Qrown Philippines ដែលជាឆាណែលផ្ដោតលើការជជែកវែកញែក ប្រាប់ព័ត៌មានផ្សេងៗទាក់ទងនឹងកម្មវិធីប្រកួតប្រជែងសម្រស់របស់ប្រទេសហ្វីលីពីន។
នៅក្នុងកម្មវិធីសម្ភាសន៍តាមអនឡាញដែលមានរយៈពេលជិតមួយម៉ោងនេះ ពិធីករចំនួន២រូបរបស់ហ្វីលីពីនបានសាកសួរច្រើនពាក់ព័ន្ធទៅនឹងការប្រកួតប្រជែងកម្មវិធី Miss Universe Cambodia 2022 របស់កញ្ញា។ ក្រៅពីសាកសួររឿងប្រកួតហើយនោះ ពិធីករក៏បានផ្ដល់សំនួរចំនួន១០ឱ្យកញ្ញាជ្រើសរើសដើម្បីឆ្លើយតបផងដែរ។ មានសំនួរមួយដែលកញ្ញាត្រូវបានសួរថាបើសិនអ្នកអាចញ៉ាំម្ហូបបានតែមួយមុខពេញមួយជីវិត តើអ្នកនឹងញ៉ាំមុខម្ហូបអ្វី? កញ្ញា ហង្ស ម៉ានីតា បានឆ្លើយថាកញ្ញា នឹងជ្រើសរើសយកបាយឡុកឡាក់ ព្រមទាំងពន្យល់ណែនាំឱ្យពិធីករហ្វីលីពីនដឹងពីអ្វីគឺជាបាយឡុកឡាក់របស់ខ្មែរថែមទៀត។
ក្រោយស្ដាប់ការណែនាំអាហារដែលជាចំណូលចិត្តរបស់ ម៉ានីតារួច ពិធីករទាំងពីរបាននិយាយថា ពួកគាត់ចង់មកស្រុកខ្មែរដើម្បីភ្លក់ម្ហូបមួយមុខនេះដែរ។ នៅក្នុងសម្ភាសន៍នោះពិធីករក៏បានសួរនាំដែរថាតើកញ្ញា ហង្ស ម៉ានីតា មានបំណងចូលប្រឡូកក្នុងវិស័យសិល្បៈដែរទេ? ស្រីស្អាតរូបនេះបានឆ្លើយតបថាបច្ចុប្បន្នកញ្ញាមានកាតព្វកិច្ចប្រកួត ដូច្នេះមិនចង់គិតអ្វីផ្សេងនោះឡើយ ប៉ុន្តែនៅថ្ងៃអនាគតមិនប្រាកដនោះទេ។ ចម្លើយបែបនេះបានធ្វើឱ្យពិធីករទាំងពីររូបសន្និដ្ឋានបានថា ថ្ងៃអនាគតអ្នកគាំទ្រប្រាកដជាបានឃើញកញ្ញាសម្ដែងនៅក្នុងខ្សែភាពយន្តណាមួយជាក់ជាមិនខាន។
នៅក្នុងការ Live មានអ្នកគាំទ្ររបស់កញ្ញា ហង្ស ម៉ានីតា ទាំងខ្មែរ ហ្វីលីពីន និងបរទេស បាន Comment លើកទឹកចិត្ត បង្ហាញក្ដីស្រលាញ់ និងចោទជាសំនួរទៅកាន់កញ្ញាជាច្រើនផងដែរ។
ចុងក្រោយ ហង្ស ម៉ានីតា បាននិយាយថាការដែលកញ្ញាចូលរួមប្រកួតក្នុងកម្មវិធីនេះដោយសារតែជាកម្មវិធីធំមានមនុស្សមើលច្រើន អាចជំរុញឱ្យអ្នកទស្សនារស់នៅក្នុងសង្គមមួយដែលកាន់តែល្អប្រសើរ។ កញ្ញានិយាយទៀតថាយើងគ្រប់គ្នារស់នៅក្នុងសង្គមមួយដែលជួនកាលអាចមានគ្រោះថ្នាក់ ដូច្នេះកញ្ញាមិនចង់ឱ្យអ្នកណាម្នាក់ជួបប្រទះនឹងរឿងអាក្រក់នោះឡើយ យើងមានមនុស្សជាច្រើនដែលត្រូវជួយ ខ្ញុំចូលរួមក្នុងកម្មវិធីនេះ ដើម្បីលើកមុខលើកមាត់ឱ្យប្រទេសខ្ញុំ ប៉ុន្តែក៏មានមនុស្សជាច្រើនដែលត្រូវការឱ្យជួយដែរ៕
