លោក ជួង ជី បានចេញវីដេអូសុំទោសជាសាធារណៈ ដើម្បីបញ្ជាក់ពីភាពស្អាតស្អំ និង ការទទួលខុសត្រូវរបស់ខ្លួន ក្រោយពីការសម្ដែងរបស់លោក ធ្វើឲ្យបងប្អូនអ្នកគាំទ្រកាន់សាសនាអ៊ីស្លាមមិនពេញចិត្ត។
ឈុតក្រៅឆាក MV ចម្រៀងថ្មីមួយ របស់តារាចម្រៀង ឆន សុវណ្ណារាជ បានផ្សព្វផ្សាយមកក្រៅ ដែលមានសម្ដែងដោយតារាកំប្លែងជើងចាស់ ល្បីលំដាប់ប្រទេស គឺ លោកពូ ជួង ជី (ហៅកុយ) និង លោកពូ អ៊ូ ប៊ុណ្ណារ៉ាត់ (ហៅក្រឹម) ប៉ះពាល់ដល់អារម្មណ៍បងប្អូនខ្មែរកាន់សាសនាអ៊ីស្លាម ព្រោះតែអ្នកដឹកនាំតម្រូវឲ្យលោកស្លៀកពាក់របៀបអ៊ីស្លាម (ដែលជាឈុតសូត្រធម៌) ហើយរាំញាក់ញ័រចាក់ក្បាច់ដូចឌីជេ។
លោក ជួង ជី បានបញ្ជាក់ថាខ្លួនមិនមានចេតនាមើលងាយ ឬប៉ះពាល់ណាមួយដល់បងប្អូនខ្មែរកាន់សាសនាអ៊ីស្លាមនោះឡើយ ប៉ុន្តែលោកជាអ្នកសម្ដែង ពេលគេហៅឲ្យសម្ដែង ឲ្យស្លៀកពាក់អ្វីនោះគឺលោកធ្វើតាមអ្នកដឹកនាំប៉ុណ្ណោះ។
នៅក្នុងវីដេអូ Live នោះលោកបានសុំទោសហើយសុំទោស និងបញ្ជាក់យ៉ាងច្បាស់ថានឹងមិនមានការសម្ដែងបែបនេះជាលើកទីពីរទៀតនោះឡើយ។ លោកពូកុយ ក៏ទទូចសុំឲ្យគ្រប់ផលិតកម្មទាំងអស់មុននឹងធ្វើអ្វីមួយ ឬផលិតអ្វីមួយគួរណាស់តែឆ្លងកាត់ក្រសួងពាក់ព័ន្ធ ដើម្បីឲ្យការផលិតបានត្រឹមត្រូវ ម្យ៉ាងទៀតគឺដើម្បីច្បាស់ថាអ្វីដែលផលិតចេញទៅល្អ និង មិនមានប៉ះពាល់។
នៅចុងវីដេអូ លោកពូ បានសុំទោសម្ដងទៀតដែលលោក និង លោកក្រឹម បានធ្វើឲ្យបងប្អូនកាន់សាសនាអ៊ីស្លាម មិនសប្បាយចិត្ត។លោកបាននិយាយទៀតថា អ្វីក៏ដោយតែចេះសុំទោស ដឹងខុស មិនមានអ្នកណាប្រកាន់ទោសអូសដំណើរនោះឡើយ។
លោកពូ កុយ និង លោកក្រឹម គឺជាតារាកំប្លែងជើងចាស់ដែលមានឈ្មោះបោះសំឡេងហើយអ្នកទាំងពីរក៏ជាដៃគូកំប្លែងដ៏ស៊ីសង្វាក់គ្នាផងដែរនៅលើឆាក ប៉ុន្តែក្រោយលោកបានបំបែកក្រុមគ្នារៀងខ្លួនវិញ លុះតែមានកម្មវិធីធំ ពិសេស ឬមានការអញ្ជើញទើបឃើញវត្តមានលោកសម្ដែងរួមគ្នា៕
