ពានរង្វាន់លីគកំពូលកម្ពុជា Cambodian Premier League 2022 បានឈានបញ្ចប់សប្ដាហ៍ទី១៧ ដែលឆ្លងកាត់៦៨ប្រកួតមកហើយ ខណៈជំនួបរវាងក្រុមវិសាខា ទល់គីរីវង់សែនជ័យ នៅចុងសប្ដាហ៍កន្លងទៅនេះ ជាប្រកួតទី៣ហើយដែលមិនត្រូវពិន័យកាតលឿង ឬក្រហម។
ការប្រកួតគ្មានកាតនេះជាការកាន់កញ្ចែនិងបង្ហាញខ្លួនលើកដំបូងរបស់លោកអាជ្ញាកណ្ដាល អ៊ីវ ទីណា ក្នុងពានរង្វាន់ CPL ខណៈលោកជាអាជ្ញាកណ្ដាលទី១១ ដឹកនាំកាប្រកួតមកនេះ។ លោក អ៊ីវ ទីណា ធ្លាប់ដឹកនាំការប្រកួតសំខាន់ៗទាំងក្នុងពានរង្វាន់លីគទី២ ពានរង្វាន់សម្តេចអគ្គមហាសេនាបតីតេជោ ហ៊ុន សែន និងពានរង្វាន់ Cambodian League Cup មុនទទួលបានឱកាសចូលកាន់កញ្ចែនៅ CPL។
ការប្រកួតដែលគ្មានពិន័យកាតទាំង៣លើកមកនេះមាន៖
-សប្ដាហ៍ទី៨ វិសាខា ៣-១ អង្គរថាយហ្គឺរ នៅកីឡដ្ឋានព្រីនស៍ (អាជ្ញាកណ្ដាល ហ៊ោ ប៊ុនថង)
-សប្ដាហ៍ទី១៤ គីរីវង់សុខសែនជ័យ ១-០ Tiffy Army FC នៅកីឡដ្ឋានគីរីវង់ (អាជ្ញាកណ្ដាល ឃិន ឧសីហា)
-សប្តាហ៍ទី១៧ វិសាខា ៦-១ គីរីវង់សុខសែនជ័យ នៅកីឡដ្ឋានព្រីនស៍ (អាជ្ញាកណ្ដាល អ៊ីវ ទីណា)
សម្រាប់ប្រកួតដែលត្រូវពិន័យកាតច្រើនជាងគេក្នុង១ប្រកួតគឺ៖
-ណាហ្គាវើល ១-០ បឹងកេត កីឡដ្ឋាន Cambodia Airway មានលឿង១០សន្លឹក ក្រហម៩សន្លឹក (អាជ្ញាកណ្ដាល លឹម ប៊ុនធឿន)
ដោយឡែកក្រុមទាំង៨ដែលត្រូវពិន័យកាតគិតត្រឹមពេលនេះមាន៖
១) ណាហ្គាវើល ៤៥សន្លឹក (ក្រហម៦)
២) អង្គរថាយហ្គឺរ ៤៤សន្លឹក (ក្រហម២)
៣) ក្រសួងការពារជាតិ ៤០សន្លឹក (ក្រហម២)
៤) បឹងកេត ៣៩សន្លឹក (ក្រហម៤)
៥) ភ្នំពេញក្រោន ៣៤សន្លឹក (ក្រហម១)
៦) គីរីវង់សុខសែនជ័យ ២៥សន្លឹក (ក្រហម១)
៧) ព្រះខ័នរាជស្វាយរៀង ២៣សន្លឹក
៨) វិសាខា ២២សន្លឹក
សរុបកាតដែលលោកអាជ្ញាកណ្ដាល១១នាក់ដឹកនាំការប្រកួតមកនេះ មានចំនួន២៧២សន្លឹក ពិន័យលើកីឡាករ ១៤៣នាក់ ហើយកីឡាករ វង់ ពិសី របស់អង្គរថាយហ្គឺរ ជាកីឡាករថ្មីតែម្នាក់គត់ត្រូវពិន័យកាតលឿង នៅសប្ដាហ៍ទី១៧នេះ។ ចំណែកកីឡាកររបស់ Tiffy Army FC រហូតដល់ទៅ២នាក់ឈរក្នុងបញ្ជីអ្នកដែលត្រូវពិន័យកាតច្រើនសន្លឹកជាងគេ មានកីឡាករ ស៊ុក វឌ្ឍនា និងកីឡាករជប៉ុន Yuta Kikuchi ក្នុងនោះម្នាក់៧សន្លឹក៕
រូបថត៖វិសាខា
