ឆ្លងកាត់ការប្រកួតដ៏តានតឹងពីមួយសប្ដាហ៍ទៅមួយសប្ដាហ៍ ទីបំផុតបុរសមកពីខេត្តកំពង់ចាម លឹម តិចម៉េង បានក្លាយជាម្ចាស់ពានរង្វាន់កម្មវិធីប្រកួតចម្រៀងកម្រិតពិភពលោក Cambodian Idol ឆ្នាំ២០២២ ហើយ។ ទម្រាំនឹងមានថ្ងៃនេះ តើ Idol វ័យក្មេងរូបនេះត្រូវហែលឆ្លងឧបសគ្គអ្វីខ្លះ?
ទម្រាំតែអាចឈានជើងមកឈរនៅចំណុចកំពូលក្លាយជាម្ចាស់ពាន តិចម៉េង បានចាកចេញពីស្រុកកំណើតមករស់នៅភ្នំពេញដោយជួលផ្ទះគេនៅម្នាក់ឯង តស៊ូយ៉ាងលំបាកលំបិន បើទោះជាគ្រួសារមិនសូវជាគាំទ្រក្ដីសុបិនរបស់តិចម៉េងក៏ដោយចុះ ព្រោះគ្រួសារចង់ឱ្យរូបគេខិតខំប្រឹងប្រែងរៀនសូត្រជាជាងធ្វើជាតារាចម្រៀង។ អាស្រ័យដោយ លីម តិចម៉េង មានឆន្ទៈមុះមត់លើវិថីមួយនេះទើបប្អូនតស៊ូជម្នះមិនថាជារងនូវការលំបាកគ្រប់សព្វក៏មិនធ្វើឱ្យ តិចម៉េង បោះចោលនូវសុបិនរបស់ខ្លួនជាដាច់ខាត។
សម្រាប់អ្នកដែលតាមដានទស្សនាកម្មវិធីមួយនេះពិសេសអ្នកដែលស្រលាញ់ លីម តិចម៉េង ច្បាស់ជានៅចាំបានយ៉ាងច្បាស់ថាក្នុងវគ្គ Judge Audition ប្អូនប្រុសបានលើកយកបទចម្រៀង «ជំងឺខ្វះអ្នកថែអាចរស់បានយូរប៉ុណ្ណា» បទចម្រៀងមនោសញ្ចេតនាឈឺចាប់ត្អូញត្អែរអស់សង្ឃឹមរបស់សំឡេងកំលោះតូចអមជាមួយនឹងការលេងហ្គីតាបានឆាប់ដួងព្រលឹងគណៈកម្មការនិងអ្នកទស្សនាឱ្យលន្លង់លន្លោចទៅតាមបទចម្រៀង។ ក្រៅពីមានសំឡេងពីរោះហើយនោះ តិចម៉េង ក៏ត្រូវបានគេចាប់អារម្មណ៍ខ្លាំងព្រោះតែប្អូនមានរូបរាងស្រដៀងទៅនឹង Judge ណុប បាយ៉ារិទ្ធិ កាលពីក្មេងថែមទៀតផង។
លីម តិចម៉េង ពីវគ្គទៅមួយវគ្គសមត្ថភាពនិងសំឡេងរបស់រូបប្អូន មិនដែលធ្វើឱ្យគណៈកម្មការអស់សង្ឃឹមម្ដងណាឡើយគឺមានតែសរសើរហើយ សរសើរទៀត ទើបធ្វើឱ្យគេអាចឆ្លងកាត់តាំងពីវគ្គ Theater Round ទាំងជុំទីមួយ ជុំពីរ ក៏ដូចជាវគ្គ Green Mile យ៉ាងផុយ។ ចូលមកដល់វគ្គ Live Show សប្ដាហ៍ទីមួយ លីម តិចម៉េង បានលើកយកបទចម្រៀង «ឈប់ស្រលាញ់អូនមិនបាន» ដែលជាចម្រៀងដើមរបស់លោកឧកញ៉ា ខេមរៈ សិរីមន្ត។
បទចម្រៀងមនោសញ្ចេតនាថ្ងូចថ្ងូរសែនឈឺចាប់នៃសាច់រឿងស្នេហារបស់និស្សិតក្រីក្រមួយបទនេះគ្រប់គ្រាន់ឱ្យ លីម តិចម៉េង ទាញយកប្រជាប្រិយពីសំណាក់អ្នកទស្សនាពីពិសេសសំឡេងផ្ញើសារគាំទ្រឱ្យរូបគេបន្តដំណើរឆ្ពោះទៅចាប់យកក្ដីស្រម៉ៃជាបន្តទៀត។
ប៉ុន្តែទម្រាំនឹងទទួលបានជោគជ័យមនុស្សយើងម្នាក់ៗរមែងត្រូវតែឆ្លងកាត់ឧបសគ្គ យុវជនរូបនេះក៏មិនអាចគេចផុតពីឧបសគ្គនៃជីវិតដូចគ្នា។ ខណៈដែលដួងតារាថ្មីមួយកំពុងតែបញ្ចេញរស្មីយ៉ាងភ្លឺចិញ្ចែងចិញ្ចាចស្រាប់តែមានអ្នកយកវីដេអូចាស់របស់ប្អូនដែលនិយាយដល់ Idol កូរ៉េ BTS រហូតមានក្រុមអ្នកគាំទ្រតារាកូរ៉េខាងលើចេញមកវាយប្រហារនិងកៀបសង្កត់អារម្មណ៍របស់ លីម តិចម៉េង។ នៅក្នុងវគ្គ Live Show សប្ដាហ៍ទី៥ បេក្ខជនរូបនេះហាក់ដូចជាបាក់ទឹកចិត្តបន្តិចដែរទោះជាប្អូនបានចេញមកសុំទោសនិងបង្ហាញពីចេតនាស្មោះត្រង់របស់ខ្លួនចំពោះក្រុមអ្នកគាំទ្រ BTS ក្ដី។
សប្ដាហ៍ដ៏តានតឹងមួយសម្រាប់ លីម តិចម៉េង ប្អូនបានលើកយកបទចម្រៀង Original មួយបទរបស់ ចេន គឺបទ «អាក្របី» មកបកស្រាយ។ គ្រាន់តែច្រៀងចប់ភ្លាម សំឡេងស្រែកហោរលើកទឹកចិត្ត និងហៅឈ្មោះរបស់ លីម តិចម៉េង ស្ទើតែបែកឆាកធ្វើឱ្យរូបប្អូនមិនអាចទប់អារម្មណ៍ជាប់ ដំណក់ទឹកភ្នែកជាច្រើនដំណក់បានហូរចេញពីក្នុងកែវភ្នែករបស់ប្អូន។
នៅក្នុងកម្មវិធីប្រកួតវគ្គផ្ដាច់ព្រ័ត្រ លីម តិចម៉េង កាន់តែធ្វើឱ្យអ្នកគាំទ្រពេញចិត្តស្ដូក ព្រោះតែបេក្ខជនរូបនេះបាននិយាយថា ខ្លួនមិនហ៊ានសុំសំឡេងបោះឆ្នោតពីអ្នកគាំទ្រឡើយ ប៉ុន្តែសុំឱ្យអ្នកគាំទ្រគ្រប់គ្នាជួយគាំទ្របេក្ខជនទាំងអស់។
វិញ្ញាសារប្រកួតវគ្គផ្ដាច់ព្រ័ត្រគឺតម្រូវឱ្យបេក្ខជនប្រកួតជ្រើសរើសបទចម្រៀងល្បីរបស់ហង្សមាសមកបកស្រាយក្នុងការប្រកួត លីម តិចម៉េង បាន Mash up បទចម្រៀងមនោសញ្ចេតនាស្នេហាចំនួន៣បទដែលប្រៀបដូចជាការនិទានពិពណ៌សាច់រឿងស្នេហាជាសាច់រឿងមួយយ៉ាងពេញលេញ។ បទទីមួយគឺបទ ថ្ងៃបែកគ្នា របស់លោក នីកូ បន្តដោយបទ មានជាតិក្រោយទៅណាទៅៗ របស់ Judge ឆន សុវណ្ណារាជ និងបិទបញ្ចប់ដោយបទចម្រៀង «យូរប៉ុណ្ណាក៏ចាំ» របស់ Judge ណុប បាយ៉ារិទ្ធ។ ការជ្រើសរើសបទចម្រៀងរបស់តិចម៉េង ធ្វើឱ្យមហាជនសរសើរថាច្រៀងបានយ៉ាងល្អឥតមានកន្លែងណាទាស់។
បទពិសោធជីវិតនិងការតស៊ូក្រាញននាលលើវិថីសិល្បៈរបស់ម្ចាស់ពាន លីម តិចម៉េង បានក្លាយជាឧទាហរណ៍យ៉ាងល្អមួយសម្រាប់អ្នកដែលបរាជ័យក្នុងជីវិត ឬអ្នកកំពុងតែជួបប្រទះនឹងការលំបាកទាំងអំបាលម៉ាន សូមចាំថា ផ្លូវទៅកាន់ភាពជោគជ័យមិនងាយស្រួលឡើយ ហើយមានតែមនុស្សដែលមិនបោះបង់ចោលសុបិន មានការជឿជាក់លើសមត្ថភាពរបស់ខ្លួនឯងប៉ុណ្ណោះ អាចដើរទៅដល់គោលដៅនៃពាក្យថាជោគជ័យយ៉ាងពិតប្រាកដ៕
