នៅថ្ងៃទី៩ ខែ មិថុនានេះ តារាជើងចាស់ចំនួន៣ រូបទទួលបានអំណោយឧបត្ថម្ភជាអង្ករនិងថវិកាពី «មូលនិធិសិល្បករចាស់ជរា» នៃសមាគមមិត្តសិល្បៈស្ម័គ្រចិត្តជួយសង្គម។
យោងតាមផេកហ្វេសប៊ុកលោក ហេង ឡុង ប្រធានសមាគមមិត្តសិល្បៈស្ម័គ្រចិត្តជួយសង្គម អំណោយឧបត្ថម្ភដូចបានរៀបរាប់ខាងលើនេះ បានឧបត្ថម្ភជូនចំពោះ សិល្បកររៀមច្បងវ័យចាស់ កំពុងតែជួបប្រទះជីវភាពខ្វះខាតដូចខាងក្រោម៖
១.តារាកំប្លែងជើងចាស់លោកតា ក្តិប ដែលមានជំងឺស្លាប់មួយចំហៀងខ្លួន និងជីវភាពខ្វះខាត។
២.កវីនិពន្ធជើងចាស់លោកតា សុម ម៉ាត់ ដែលមានជំងឺលើសឈាម និងជីវភាពខ្វះខាត។
៣.តារាកំប្លែងជើងចាស់លោកតា ចេក ដែលមានជំងឺប្រចាំកាយ និងជីវភាពខ្វះខាត។
នៅក្នុងនោះដែរលោក ហេង ឡុងតំណាងឱ្យប្រធានសមាគមបានឆ្លៀតឱកាសគោរពថ្លែងអំណរគុណទៅដល់សប្បុរសជនដែលបានចូលរួមឧបត្ថម្ភគាំទ្រ «មូលនិធិសិល្បករចាស់ជរា» ក្នុងនោះក៏មានការចូលរួមជួយគាំទ្រដ៏ខ្ពង់ខ្ពស់ពីសំណាក់សម្ដេចតេជោ ហ៊ុន សែន នាយករដ្ឋមន្ត្រី និង សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ដែលបានជួយឧបត្ថម្ភថវិកា ក្នុងមួយឆ្នាំ៥ម៉ឺនដុល្លារ រយៈពេល៥ឆ្នាំ។ ក្រៅពីនោះក៏មាន អ្នកឧកញ៉ា លាង ឃុន អគ្គនាយកក្រុមហ៊ុន ជីប ម៉ុង និង អ្នកឧកញ៉ា ហុងពីវ អគ្គនាយកបុរីពិភពថ្មីដែលបានឧបត្ថម្ភថវិកាក្នុងមួយនាក់ ៥ម៉ឺនដុល្លារ ក្នុង១ឆ្នាំ ក្នុងរយ:ពេល ៥ឆ្នាំ ដើម្បីទ្រទ្រង់ដល់សិល្បករចាស់ជរាផងដែរ
