ទង្វើរបស់អ្នកគ្រូ ផេនស៊ី ឬតារាកំប្លែងស្រី តុកគី (Tukky) ត្រូវបានមហាជនអ្នកគាំទ្រមើលឃើញថា ពិតជាកូនស្រីកតញ្ញូចំពោះឪពុកម្ដាយមែនទែន។ តារាស្រីរូបនេះ តែងតែមិនភ្លេចពីគុណូបការៈរបស់អ្នកមានគុណឡើយ ដែលថ្មីៗនេះ អ្នកនាង តុកគី បានជូនលុយចំនួន ១ថាស លើកជូនឪពុកម្ដាយ។
បើតាមការរៀបរាប់របស់តារាកំប្លែងស្រីរូបនេះ នៅលើបណ្ដាញសង្គម IG របស់នាង បានឱ្យដឹងថា នាឱកាសឆ្លងឆ្នាំសកល ឆ្នាំថ្មី២០២២នេះ អ្នកនាងបានធ្វើដំណើរទៅសួរសុខទុក្ខឪពុកម្ដាយនៅក្នុងខេត្ត ឧដនថានី។ អ្នកនាង បានរៀបរាប់ថា ៖ «ក្រាបសំពះឆ្នាំថ្មី តាសម័យ និងយាយភីម សូមជូនពរឱ្យភ្នែកភ្លឺច្បាស់ ។ យាយភីមមានសុខភាពល្អ សុខកាយសប្បាយចិត្តណា… ពុកម៉ែ..យប់នេះស្រឡាញ់គ្នាឱ្យបានយូរណា…»។
យ៉ាងណាមិញ គេមិនបានដឹងថាចំនួនលុយនៅថាសនោះមានចំនួនពិតប្រាកដប៉ុន្មានទេ គ្រាន់តែឃើញមានច្រើនសន្លឹក ហើយសុទ្ធតែជាសន្លឹក១០០០បាតថែមទៀត។
ក្រោយពីឃើញការបង្ហោះនេះហើយ អ្នកគាំទ្រលាន់មាត់ថា «ពិតជាកូនស្រីកតញ្ញូ» «គួរឱ្យស្រឡាញ់ ឧហ្សាហ៍ហើយកតញ្ញូ» និងខ្លះទៀតថា «ធ្វើបុណ្យជាមួយព្រះក្នុងផ្ទះ សូមឱ្យចម្រើនរុងរឿង និងសូមឱ្យពុកម៉ែមានសុខភាពល្អ»៕