សិល្បៈជាតិ៖ ក្រោយទទួលបានការអញ្ជើញកោះហៅពីសមាគមសិល្បករខ្មែរក្នុងការជួបពិភាក្សាពាក់ព័ន្ធទៅនឹងអ្វីដែលមហាជនហាក់មានអារម្មណ៍ថ្នាំងថ្នាក់ចិត្ត និងប្រតិកម្មយ៉ាងខ្លាំងចំពោះស្នាដៃច្នៃម៉ូដរបស់បណ្ឌិតច្នៃម៉ូដ ឯម រៀម ដែលមានលក្ខណៈស៊ិចស៊ីប្លែកៗមើលទៅជាន់ឈ្លី និងមិនឱ្យតម្លៃដល់សិល្បៈវប្បធម៌ប្រពៃណីខ្មែរនោះ លោកបានទទួលស្គាល់ថា ខ្លួនលោកពិតជាដើរហួសពីអ្វីដែលមហាជនទទួលយកបាន ចំពោះការច្នៃម៉ូដសហសម័យដែលជាទីពេញនិយម និងមានការគាំទ្រនៅបស្ចឹមប្រទេស។
លោក ឯម រៀម បានទទួលស្គាល់ចំពោះពាក្យរិះគន់របស់មហាជនពិតមែនមកលើរូបលោក និងព្រមទទួលយកនូវមតិកែលម្អរបស់ថ្នាក់ដឹកនាំសមាគមសិល្បករខ្មែរ ហើយសន្យាអនុវត្តតាមការកែណែនាំនានាលើកឡើងនៅក្នុងជំនួបនោះ។ ពោលគឺរូបលោកនៅតែបន្តច្នៃម៉ូដទៅតាមគំនិតរបស់ខ្លួន ដោយចៀសវាងនូវភាពស៊ិចស៊ីជ្រុលហួសហេតុនាំឱ្យមហាជនមិនពេញចិត្ត។
លោក ឯម រៀម ក៏បានប្ដេជ្ញាថា នឹងចូលរួមសហការជាមួយសមាគមសិល្បករខ្មែរ ដើម្បីកសាង និងអភិវឌ្ឍនូវស្នាដៃផ្សេងៗ ដោយឈរលើមូលដ្ឋាន អាចថែរក្សាបាននូវអត្តសញ្ញាណរបស់ជាតិ ក្នុងន័យរួបរួមសាមគ្គី រួមគ្នាលើកកម្ពស់វិស័យសិល្បៈវប្បធម៌ជាតិ។
គួររំលឹកដែរថា សិល្បករ និងបណ្ឌិតច្នៃម៉ូដ ឯម រាម បានទទួលអាហារូបករណ៍ទៅសិក្សានៅប្រទេសបារាំងក្នុងឆ្នាំ២០០០ សិក្សា៧ឆ្នាំ ផ្នែកគំនូរទំនើប គំនូររូបិយ គំនូរអរូបិយ និងគំនូរបែបច្នៃប្រឌិត។ ក្រោយពីបញ្ចប់ការសិក្សានៅទីនោះ លោកក៏បានមកបើកវិចិត្រសាលផ្ទាល់ខ្លួនក្នុងប្រទេសកម្ពុជា សម្រាប់លក់និងដាក់តាំងស្នាដៃរបស់ខ្លួន រហូតដល់សព្វថ្ងៃ។ ក្រៅពីការងារសិល្បៈគំនូរ ប្រមាណជិត ២០ ឆ្នាំមកនេះ បណ្ឌិតច្នៃម៉ូដ ឯម រៀម ធ្វើកិច្ចការជាច្រើន និងរួមចំណែកអភិវឌ្ឍន៍ការច្នៃម៉ូដនៅកម្ពុជា ដែលស្នាដៃរបស់ផ្ដោតទៅលើគ្រឿងសង្ហារិមធ្វើពីផ្តៅ ចម្លាក់ មកុដ និងការច្នៃម៉ូដជាលក្ខណៈក្បាច់បុរាណខ្មែរជាដើម៕
សូមស្ដាប់លោក បណ្ឌិតច្នៃម៉ូដ ឯម រៀម ប្រាប់មកអ្នកសារព័ត៌មានត្រយងដូច្នោះ៖
