រដ្ឋមន្ត្រីការបរទេសចិនលោក Wang Yi បានព្រមានហ្វីលីពីន ឱ្យដោះស្រាយបញ្ហាតាមរយៈការសន្ទនា អ្វីដែលចិនមើលឃើញថាជា «ការលំបាកដ៏ធ្ងន់ធ្ងរ» នៅចំពោះមុខទំនាក់ទំនងរបស់ប្រទេសទាំង២ ជុំវិញសមុទ្រចិនខាងត្បូង ដែលបានកើតឡើងដោយឧប្បត្តិហេតុ រវាងនាវារបស់ភាគីទាំងពីរ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃព្រហស្បតិ៍ ទី២១ ខែធ្នូ ឆ្នាំ២០២៣។
![](https://cdn.troryorng.com/wp-content/uploads/2023/12/27174723/image-800.png)
ទីក្រុងប៉េកាំង និងទីក្រុងម៉ានីលបានធ្វើការចោទប្រកាន់គ្នាយ៉ាងខ្លាំង ក្នុងរយៈពេលប៉ុន្មានខែថ្មីៗនេះ ជុំវិញការរត់ការពាក់ព័ន្ធនឹងទូកនេសាទ នាវាឆ្មាំឆ្នេរសមុទ្រ និងនាវាផ្សេងទៀតនៅក្នុងសមុទ្រចិនខាងត្បូង ដែលជាច្រករបៀងពាណិជ្ជកម្មយុទ្ធសាស្ត្រដែលប្រទេសទាំង២ មានការទាមទារកាន់កាប់ជាកម្មសិទ្ធិរាងខ្លួន។
លោក Wang បានប្រាប់សមភាគីហ្វីលីពីនតាមរយៈការសន្ទនាតាមទូរស័ព្ទជាមួយរដ្ឋមន្រ្តីការបរទេសហ្វីលីពីន លោក Enrique Manalo កាលពីថ្ងៃពុធ ថា «ប្រសិនបើប្រទេសអាស៊ីអាគ្នេយ៍មួយនេះ ធ្វើការវិនិច្ឆ័យខុស ឬឃុបឃិតជាមួយកងកម្លាំងខាងក្រៅ នៅក្នុងដែនទឹកជម្លោះ នោះប្រទេសចិន នឹងការពារសិទ្ធិរបស់ខ្លួន រួមទាំងឆ្លើយតបយ៉ាងម៉ឺងម៉ាត់ នេះបើយោងតាមសេចក្តីថ្លែងការណ៍របស់ក្រសួងការបរទេសចិន។
![](https://cdn.troryorng.com/wp-content/uploads/2023/12/27174716/image-804-1024x712.png)
សេចក្តីថ្លែងការណ៍នោះបានដកស្រង់សម្តីលោក Wang ដែលបាននិយាយថា៖ «ទំនាក់ទំនងចិន និងហ្វីលីពីនកំពុងស្ថិតនៅផ្លូវបំបែកមួយ ពោលគឺ ត្រូវប្រឈមនឹងជម្រើសថា តើត្រូវដោះស្រាយយ៉ាងដូចម្ដេច ហើយហ្វីលីពីនត្រូវតែធ្វើសកម្មភាពដោយប្រុងប្រយ័ត្ន»។
![](https://cdn.troryorng.com/wp-content/uploads/2023/12/27174715/image-805-1024x683.png)
ភ្លាមៗនោះគេមិនទាន់ដឹងច្បាស់ថា នរណាជាអ្នកផ្ដើមការហៅទូរសព្ទនោះទេ។ ចិនទាមទារយកដែនទឹកភាគច្រើននៅក្នុងអ្វីដែលហៅថា Nine Dash Line ដែលមានប្រទេសប្រ៊ុយណេ ម៉ាឡេស៊ី តៃវ៉ាន់ និងវៀតណាម ជាដៃគូប្រកួតប្រជែង។
![](https://cdn.troryorng.com/wp-content/uploads/2023/12/27174719/image-803-1024x1024.png)
សូមជម្រាបថា កាលពីថ្ងៃទី១១ ខែធ្នូ ហ្វីលីពីន បានកោះហៅឯកអគ្គរដ្ឋទូតចិនប្រចាំទីក្រុងម៉ានីល ឱ្យចូលជួបដើម្បីសម្ដែងការតវ៉ា ក្រោយឆ្មាំសមុទ្រហ្វីលីពីន ចោទថា នាវាឆ្មាំសមុទ្រចិនបានប្រើកាណុងបាញ់ទឹកដាក់ទូករបស់ខ្លួន ដែលកំពុងធ្វើបេសកកម្មផ្គត់ផ្គង់សម្ភារៈចាំបាច់ ដល់អ្នកនេសាទ និងទាហានហ្វីលីពីន មួយក្រុមតូច ដែលកំពុងឈរជើងនៅតំបន់ថ្មប៉ប្រះទឹក Second Thomas Shoal។ នៅក្នុងឧប្បត្តិហេតុនោះ ក៏មានការបុកទង្គិចគ្នារវាងនាវាចិន និងទូកហ្វីលីពីន ផងដែរ ហើយទាំងទីក្រុងប៉េកាំង និងម៉ានីល បានទម្លាក់កំហុសដាក់គ្នាទៅវិញទៅមក៕
![](https://cdn.troryorng.com/wp-content/uploads/2023/09/27204114/Troryorng-Telegram-1-1024x126-1-1-1-1.jpg)