ចូវ ស៊ិងឈើ ឬ ទិនហ្វី ម្ចាស់រហស្សនាម ស្ដេចកំប្លែងហុងកុង ជាតារាសម្ដែងដែលបានវិវត្តខ្លួនមកជាអ្នកដឹកនាំមានស្នាដៃភាពយន្តទទួលបានជោគជ័យយ៉ាងច្រើន តាមរយៈស្នាដៃដឹកនាំរឿងបែបកំប្លែងសើចសប្បាយរំសាយកង្វល់ ប៉ុន្តែមានមនុស្សប៉ុន្មាននាក់ដឹងថាបុរសដែលធ្វើឱ្យមនុស្សជាច្រើនរីករាយធ្លាប់មានប្រវត្តិជូរចត់លំបាកលំបិនជាងភាពយន្តអ្នកសុំទានដែលគេធ្លាប់បានសម្ដែងទៀត។
![](https://troryorng.com/wp-content/uploads/2021/08/photo_2021-08-19_11-34-54-1024x576.jpg)
នៅក្នុងកម្មវិធីសម្ភាសន៍មួយ ទិនហ្វី ធ្លាប់បានបង្ហើបឱ្យដឹងថាមានម្ដងនោះលោកបានធ្វើឱ្យភ្លៅមាន់ជ្រុះដី ដោយសារតែជីវភាពក្រីក្រម្ដាយលោកបានរើសយកភ្លៅមាន់នោះមកលាងទឹកក្ដៅពិសារវិញ។
កាលលោកមានអាយុ៧ឆ្នាំ ក្នុងកំឡុងឆ្នាំ១៩៦៨ ឪពុកម្ដាយលោកបានចែកផ្លូវគ្នា ដោយតុលាការបានកាត់ក្ដីឱ្យលោកនិងបងស្រី ព្រមទាំងប្អូនស្រីរស់នៅជាមួយនឹងម្ដាយ។
ស្ត្រីមេម៉ាយត្រូវចិញ្ចឹមកូន៣នាក់ឱ្យបានរៀនសូត្រនិងហូបចុកគ្រប់គ្រាន់គឺជារឿងមួយលំបាកព្រោះកូនតូចៗសុទ្ធតែស្ថិតក្នុងវ័យចម្រើនលូតលាស់។ ទិនហ្វី ជាក្មេងឆ្លាត តាំងចិត្តរៀន ធ្វើឱ្យម្ដាយស្រលាញ់ជាងគេ តែលោកក៏មានចរិតអាក្រក់ គឺឱ្យតែពេលញ៉ាំបាយគឺលោកតែងតែយកម្ហូបមកដាក់មុខខ្លួន ទំពារម្ហូបហើយខ្ជាក់ចូលចានម្ហូបវិញ។
ថ្ងៃមួយម្ដាយលោកខានបើកប្រាក់ខែពីរខែជាប់គ្នា ម្ដាយលោកបានខ្ចីប្រាក់គេមកទិញភ្លៅមាន់ពីរដើម្បីហូប ពេលចម្អិនរួចលោកបានយកភ្លៅមាន់មួយដុំធំនោះមកខាំហូបរួចញាក់មុខញាក់មាត់ដាក់បងប្អូនលោក រហូតធ្វើឱ្យភ្លៅមាន់របូតពីដៃ ប្រឡាក់ដីអស់ ពេលនោះម្ដាយលោកខឹងយ៉ាងខ្លាំងហើយបានវាយលោក។ ម្ដាយលោកខឹងយ៉ាងខ្លាំងហើយបានវាយលោក តែក្រោយមកម្ដាយបានឱបហើយសួរលោកថា «នៅឈឺទេ? ថ្ងៃក្រោយរពិសទៀតទេ? គេងទៅ ស្អែកត្រូវទៅសាលារៀន»
យ៉ាងណាមិញអាថ៌កំបាំងដែលទិនហ្វីព្យាយាមលាក់បាំងនោះគឺ លោកដឹងថាម្ដាយលំបាក បើលោកមិនធ្វើពុតឱ្យភ្លៅមាន់ធ្លាក់ដី ម្ដាយលោកម្ចាស់ជាទុកឱ្យកូនញ៉ាំខ្លួនឯង ដូច្នេះទើបលោកកើតគំនិតទំពារម្ហូបហើយខ្ជាក់មកវិញ ធ្វើបែបនេះម្ដាយលោកម្ចាស់ជាយកមកពិសារព្រោះតែស្ដាយ។ ក្រោយម្ដាយរបស់លោកបានស្ដាប់ឮអាថ៌កំបាំងនេះ លោកស្រីបានស្រក់ទឹកភ្នែកហើយរៀបរាប់ថាលោកស្រី គួរតែដឹងតាំងពីយូរ ព្រោះកូនប្រុសជាក្មេងល្អស្ដាប់បង្គាប់ តែមានចរិតអាក្រក់តែមួយនេះគត់។
ទិនហ្វីបាននិយាយមួយប្រយោគប្រកបដោយអត្ថន័យថា សម្រាប់លោកមានស្នាដៃដឹកនាំនិងសម្ដែងជាច្រើនរឿង ប៉ុន្តែរឿងដែលលោកគិតថាសម្ដែងបានល្អបំផុតគឺនៅពេលលោកមានអាយុ៧ឆ្នាំ ព្រោះជាការសម្ដែងចេញពីក្រអៅបេះដូងដោយមានអ្នកទស្សនាតែម្នាក់គត់ គឺម្ដាយរបស់លោក។
ទស្សនាវីដេអូព័ត៌មានខាងក្រោម៖
![Telegram-Troryorng](https://troryorng.com/wp-content/uploads/2021/05/Troryorng-Telegram-1-1024x126.jpeg)