សមាជិកលីគកំពូលកម្ពុជា Cambodian Premier League ក្លិបវិសាខា នៅព្រឹកថ្ងៃទី១៦ ខែមិថុនា ឆ្នាំ២០២៤ បានប្រកាសតែងតាំងគ្រូបង្វឹកថ្មីគឺលោក Jurgis Kalns ជនជាតិឡាតវី មកពីទ្វីបអឺរ៉ុប ខណៈមុនមកប្រកបអាជីពនៅកម្ពុជា បុរសវ័យ៤១ឆ្នាំរូបនេះ បានដឹកនាំក្លិប Valmiera លើកពានរង្វាន់លីគកំពូលក្នុងប្រទេសខ្លួន ក្នុងរដូវកាល២០២២។
ក្នុងនាមជាម្ចាស់ជើងឯក ក្រុម Valmiera បានតំណាងឱ្យប្រទេសឡាតវី ឡើងទៅជម្រុះពានរង្វាន់ជើងឯកទ្វីបអឺរ៉ុប UEFA Champions League រដូវកាល២០២៣-២៤ ក្នុងវគ្គ Qualification Round 1 តែបានចាញ់ក្រុម Olympia Ljubljana មកពីប្រទេសស្លូវ៉ានី ទាំង២ជើងដោយលទ្ធផល ៤-២។ បរាជ័យវគ្គជុំទី២នេះ ធ្វើឱ្យក្រុម Valmiera បន្តទទួលកូតាពានរង្វាន់ទ្វីបអឺរ៉ុប UEFA European Conference League រដូវកាល២០២៣-២៤ ដោយយកឈ្នះក្រុម Tre Penne មកពីប្រទេសសាន់ម៉ារីណូ ទាំង២ជើងដោយលទ្ធផល ១០-០ តែចាញ់ក្រុម Partisans មកពីប្រទេសអាល់បានី ទាំង២ជើងដោយលទ្ធផល ៣-១។
លោក Jurgis Kalns កើតក្នុងប្រទេសសហភាពសូវៀត ប៉ុន្តែក្រោយសហភាពសូវៀត ដួលរលំ ប្រទេសរបស់លោកបានប្រកាសឯករាជ្យភាពទៅជាប្រទេសឡាតវី។ កាលនៅជាកីឡាករលោកជាខ្សែប្រយុទ្ធ ឆ្នើម១រូបព្រមទាំងធ្លាប់ជើងឯករងលីគកំពូលក្នុងប្រទេសខ្លួន២ឆ្នាំជាប់គ្នានៅឆ្នាំ២០០៣,២០០៤ និងឈ្នះលេខ៣នៅរដូវកាលឆ្នាំ២០០១ និង២០០២ នៅក្លិប FK Liepājas Metalurgs។ នៅឆ្នាំ២០០៨ លោកក៏ជាផ្នែកជួយឱ្យក្លិប FK Ventspils លើកពានលីគកំពូលឡាតវី ផងដែរ។ រហូតដល់ចុងឆ្នាំ២០១៥ លោកបានសម្រេចព្យួរស្បែកជើងក្រោយចប់កិច្ចសន្យាជាមួយក្លិប FK Auda។
ក្រោយចូលនិវត្តន៍ ក្លិប FK Auda បានសម្រេចចិត្តតែងតាំងលោក Jurgis Kalns ជាគ្រូបង្វឹកឱ្យដឹកនាំក្រុមចាប់ពីរដូវកាល ២០១៥ ដល់២០១៧ ខណៈរដូវកាល២០១៨ លោកបន្តទៅដឹកនាំក្រុម SK Super Nova ហើយនៅឆ្នាំ២០១៩ និង២០២០ លោកដឹកនាំក្រុម FK Tukums 2000។ ចូលដល់ឆ្នាំ២០២១ ដល់ខែ ឧសភា ២០២៤ លោកដឹកនាំក្រុម Valmiera ទាំងចាប់ពីគ្រូជំនួយដល់គ្រូបង្វឹក ហើយនៅឆ្នាំ២០២២ លោកបានជួយក្រុមឈ្នះពានរង្វាន់លីគកំពូលប្រទេសឡាតវី ជាលើកដំបូងក្នុងប្រវត្តសាស្រ្តក្លិបតែម្តង ព្រមទាំងឈានជើងតំណាងប្រទេសទៅប្រកួតពានរង្វាន់នានា ក្នុងទ្វីបអឺរ៉ុប ដូចបានរៀបរាប់ខាងលើ។
បច្ចុប្បន្នលោក Jurgis Kalns កាន់អាជ្ញាប័ណ្ឌគ្រូបង្វឹក UEFA Pro Licence និងជាគ្រូបង្វឹក១រូប និយមដឹកនាំកូនក្រុមប្រើរូបមន្តប្រកួត 4-3-3។
ក្លិបវិសាខា ធ្លាប់ឈ្នះជើងឯកពានរង្វាន់សម្តេចតេជោ ហ៊ុន សែន ៣សម័យកាលជាប់ៗគ្នា ព្រមទាំងឈ្នះជើងឯករងលីគកំពូលកម្ពុជា ២លើកនៅឆ្នាំ២០១៩ និង២០២២ ព្រមទាំងឈរលេខ៣ចំនួន៣រដូវកាល គឺនៅឆ្នាំ២០១៨, ២០២១ និង២០២៣-២៤។
លោក Jurgis Kalns ជាគ្រូបង្វឹកទី៦ ហើយនៅក្លិបវិសាខា ក្រោយឈានជើងឡើងមកលេងនៅលីគកំពូលកម្ពុជា ពីឆ្នាំ២០១៨ មកបន្ទាប់ពីលោក ហុក សុជីវ័ន្ត, លោក Colum Curtis ជនជាតិអង់គ្លេស លោក Akeeb Tunji Ayoyinka (គ្រូបណ្តោះអាសន្ន), លោក Lee Tae Hoon ជនជាតិកូរ៉េខាងត្បូង, លោក មាស ចាន់ណា និង លោក Simon McMenemy ជនជាតិស្កុតឡែន ជាដើម៕