លោក នាង កាវិច គឺជាសិស្សខ្មែរដំបូងគេដែលបានសិក្សាជំនាញថតភាពយន្តខ្នាតខ្លីនៅ Asian Film Academy ដែលជាកម្មវិធីរបស់មហោស្រពភាពយន្តអន្តរជាតិទីក្រុងប៊ូសានប្រទេសកូរ៉េខាងត្បូង។ លោកក៏ធ្លាប់បញ្ចប់ការសិក្សាថ្នាក់បិរញ្ញាបត្រពីសាកលវិទ្យាល័យលីមកុកវីង ផ្នែកឌីហ្សាញប្រកបដោយវិជ្ជាជីវៈ (Professional Design) នៅឆ្នាំ២០១។ លោកមានស្នាដៃខាងផ្នែកភាពយន្ដមួយចំនួន ដែលសុទ្ធសឹងតែបានប្រឡូក និងចូលទៅដណ្ដើមពានរង្វាន់ពីមហោស្រពភាពយន្ដអន្ដរជាតិ ដូចជាកម្មវិធី Southeast Asian Film Lab របស់មហោស្រពភាពយន្តអន្តរជាតិសិង្ហបុរី និងបានទទួលបានរង្វាន់ Best SEA short documentary នៅទីក្រុងហ្សាការតា។
ការចាប់អាជីពជាអ្នកផលិតភាពយន្ដរបស់លោក នាង កាវិច វាមិនមែនជាងាយស្រួលឡើយសម្រាប់លោក ក្នុងការស្វែងរកគំនិតថ្មីៗដើម្បីយកមកផលិតឱ្យទាក់ចិត្តមហាជន ប៉ុន្ដែជំនឿចិត្ត និងការខិតខំប្រឹងប្រែងរបស់លោក គឺជារឿងដែលសំខាន់ដើម្បីជំរុញឱ្យលោកបង្កើតបានសមិទ្ធិផលភាពយន្ដដ៏មានគុណភាព ចេញទៅប្រកួតប្រជែងជាមួយបរទេស។ ថ្មីៗនេះ លោក នាង កាវិច បានដកស្រង់ប្រវត្តិពិតរបស់លោកក្នុងអំឡុងពេលស្នាក់នៅក្នុងអាគារប៊ូឌីញ ដែលជាសំណង់ចាស់មួយក្នុងរាជធានីភ្នំពេញ មកផលិតជាខ្សែភាពយន្ដមានចំណងជើងថា «ប៊ូឌីញ ស» ឬ White Building ។
បើតាមការបង្ហោះនៅលើហ្វេសប៊ុកផេក White Building បានឱ្យដឹងថា ខ្សែភាពយន្ត «ប៊ូឌីញ ស» ឬ White Building គឺជាសហផលិតកម្មអន្តរជាតិរវាងផលិតកម្ម Anti-Archive ដឹកនាំដោយផលិតករលោក ឈូ ដាវី និងផលិតកម្ម អប្សរា ដឹកនាំដោយ Marine ARRIGHI de CASANOVA និង សហផលិតកម្មជាមួយ Xstream Pictures ដឹកនាំដោយផលិតករដ៏ល្បីល្បាញលោក JIA Zhang-ke និងកងចក្រ ភីកឈ័រ ដឹកនាំដោយសហផលិតករ លោក តែ ឡូយ ជាមួយសហផលិតករ Brandon HASHIMOTO និង Rotha MOENG។
ភាពយន្ដមួយនេះ បានចូលទៅដណ្ដើមពានរង្វាន់ នៅក្នុងមហោស្រពភាពយន្ត ក្រុងVenice លើកទី ៧៨ នៅប្រទេសអ៊ីតាលី កាលដើមខែកញ្ញា និងបាននាំមោទកភាពជូនកូនខ្មែរគ្រប់រូប។ សម្រាប់ផលិតករខ្មែរ លោក នាង កាវិច ជាកូនខ្មែរ និងផលិតករខ្មែរទី១ ដែលបាននាំយកខ្សែភាពយន្តទៅប្រកួតប្រជែងក្នុងមហោស្រពអន្តរជាតិ ក្រុង Venice ដែលជាមហោស្រពខ្សែភាពយន្តអន្តរជាតិចំណាស់ជាងគេបង្អស់ក្នុងពិភពលោក។ ខ្សែភាពយន្តនេះ កំពុងតែទទួលបានការចាប់អារម្មណ៍ខ្លាំង នៅរោងភាពយន្តប្រទេសបារាំង និងបានធ្វើដំណើរទៅកាន់ទីក្រុងបែលស៊ីក មហោស្រពភាពយន្ដ Namur International French Language Film Festival ទីក្រុងឡុងដ៍ ក្នុងមហោស្រព BFI London Film Festival ទីក្រុងប៊ូសាន មហោស្រព Busan International Film Festival និងទីក្រុងឈីកាហ្គូ Chicago Film Festival ៕
ទស្សនាវីដេអូខាងក្រោមនេះ៖
ទស្សនា Trailer រឿង «ប៊ូឌី ស»៖