ម្ចាស់ផ្ទះអាល្លឺម៉ង់ ​យក​ឈ្នះស្កុតឡេន ក្នុងជំនួបបើកឆាក នៃពានរង្វាន់ជើងឯកទ្វីបអឺរ៉ុប ឆ្នាំ២០២៤

ម្ចាស់ផ្ទះអាល្លឺម៉ង់ បើកឆាក​យក​ឈ្នះស្កុតឡេន ក្នុង​លទ្ធផល ៥ទល់និង១ នារាត្រី​ថ្ងៃទី១៤ ឈាន​ចូល​ទី១៥ មិថុនា នៅ​ក្នុងកីឡដ្ឋាន Allianz Arena នៃពានរង្វាន់ជើងឯកទ្វីបអឺរ៉ុប UEFA Euro 2024 ឬ 2024 UEFA European Football Championship ដែលប្រទេស ប្រទេសអាល្លឺម៉ង់ ធ្វើ​ជាម្ចាស់ផ្ទះ។

ក្រុមទាំង២៤ ដែលត្រូវប្រកួតប្រជែងគ្នាដណ្តើមពានរង្វាន់ Euro 2024 ទាំង៦ពូល៖

ពូល A៖ អាល្លឺម៉ង់ ស្កុតឡេន ហុងគ្រី និងស្វ៊ីស

ពូល B៖ អេស្ប៉ាញ ក្រូអាត អ៊ីតាលី និងអាល់បានី

ពូល C៖ ស្លូវេនី ដាណឺម៉ាក ស៊ែប៊ី និងអង់គ្លេស

ពូល D៖ ប៉ូឡូញ ហូឡង់ អូទ្រីស និងបារាំង

ពួល E៖ បែលហ្ស៊ិក ស្លូវាគី រូម៉ានី និងអ៊ុយក្រែន

ពូល F៖ តួកគី ហ៊្សកហ្ស៊ី ព័រទុយហ្កាល់ និងឆែក។

ការប្រកួតបើកឆាកនៃព្រឹត្តិការណ៍ UEFA Euro 2024 ឬ 2024 UEFA European Football Championship 2024 នឹងដំណើរការប្រកួតចាប់ពីនៅថ្ងៃទី១៤ ខែមិថុនា ដល់ថ្ងៃទី១៤ ខែកក្កដា ឆ្នាំ២០២៤ ដោយប្រើប្រាស់កីឡដ្ឋានចំនួន ១០ នៅក្នុងទីក្រុងចំនួន ១០ ផ្សេងគ្នា សរុបចំនួន ៥១ ប្រកួតរបស់ក្រុមដែលចូលរួមទាំង ២៤។

គួរដឹងថាពានរង្វាន់ជើងឯកបាល់ទាត់ផ្នែកបុរស UEFA Euro ត្រូវបានបង្កើតឡើងដំបូងនៅឆ្នាំ១៩៥៨ បច្ចុប្បន្នមានអាយុកាល ៦៦ឆ្នាំ ស្របពេលក្រុមជម្រើសជាតិអាល្លឺម៉ង់ និងក្រុមអេស្ប៉ាញ ឈ្នះពាននេះបាន ៣លើកស្មើគ្នា ខណៈក្រុមការពារតំណែងជើងឯកគឺក្រុមជម្រើសជាតិអ៊ីតាលី៕