លោកស្រី ទ្រី ដាណា ដែលមហាជនបានស្គាល់ថា ជាថៅកែហាងពេជ្រ និងបុគ្គលល្បីឈ្មោះមួយរូបនៅលើអនឡានញ។ បន្ទាប់ពីមានទំនាស់ឈានដល់ការប្តឹងលែងលះស្វាមី មួយរយៈមុននោះគេឃើញអតីតស្វាមី បានទៅរត់កោរសក់បួសដើម្បីទទួលស្គាល់កំហុស និងសុំឱ្យភរិយាលើកលែងទោសដើម្បីត្រូវគ្នាវិញ។
ក្រោយមកទៀត លោកស្រីដូចមិនជាមិនបើកផ្លូវឱ្យអតីតស្វាមី នោះឡើយ និងអត់ទ្រាំមិនបានចំពោះក្រុមគ្រួសារខាងអតីតស្វាមី តែងតែបន្តបំពាន និងចោទប្រកាន់ បង្ខូចឈ្មោះលោកស្រី ដោយទម្លាក់កំហុសលើលោកស្រីជាច្រើនរឿង ទើបថ្មីនេះលោកស្រីក៏ទម្លាយរឿងដែលលោក ហ៊ីង បញ្ញារិទ្ធ ហៅពូម៉ៅ ជាអតីតស្វាមីធ្លាប់ប្រើអំពើហឹង្សាមកលើខ្លួនជាច្រើនដងមកហើយ និងលើកចុងក្រោយនេះ គឺបានវ៉ៃលោកស្រីនៅខេត្តសៀមរាប ដោយបានថតរូបនិងវីដេអូទុកជាភ័ស្តុតាង។
ម្ដងនេះហាក់ដូចជាដាច់ចិត្តមែនទែនហើយ ទើបបានជាលោកស្រី ទ្រី ដាណា បង្ហោះសាររូបភាព ២សន្លឹក បង្ហាញពីស្នាមរបួសដោយរងអំពើហឹង្សា និងសរសេរនៅលើបណ្តាញសង្គមហ្វេសប៊ុករបស់ខ្លួន នៅថ្ងៃទី២៨ ខែធ្នូ ឆ្នាំ២០២១ ថា «ស្លាកស្នាមមិនអាចបំភ្លេចបានក្នុងឆាកជីវិតនេះ ស្លាកស្នាមដែលពូម៉ៅគាត់វ៉ៃធ្វើបាប ហើយជាអ្វីដែលមិនធ្លាប់ទម្លាយពីមុនមក ក៏ព្រោះគិតពីកិត្តិយស គិតពីកូនហើយក៏ខ្មាសគេ។ នៅមានរឿងជាច្រើនទៀត ដែលមិនអាចនិយាយអស់ ហើយក៏មិនគួរនិយាយក្នុងនាមជាមនុស្សស្រី នឹកឃើញពេលណា ទឹកភ្នែកហូរស្រក់ពេលនោះ ព្យាយាមធ្វើជារឹងមាំ ព្យាយាមធ្វើជាមនុស្សម្នាក់អស្ចារ្យ លាក់បាំងភាពឈឺចាប់រាប់ឆ្នាំ។ តែពេលនេះមិនអាចទ្រាំបានទៀតទេ ខ្ញុំធ្លាប់ផ្ដល់ឱកាសគាត់ច្រើនដងហើយ ក៏គិតកិត្តិយសខ្លួនឯងជាស្រី ជាម្ដាយ តែអ្វីដែលទទួលបានគឺការឈឺចាប់ម្ដងហើយម្ដងទៀតឮ លើកនេះ ក៏ខ្ញុំសុំចប់ដោយសន្តិភាពរៀងខ្លួន តែគាត់នៅបំពាន បងប្អូន និងម្ដាយគាត់នៅតែចោទប្រកាន់ខ្ញុំ បង្ខូចឈ្មោះខ្ញុំ ទម្លាក់កំហុសលើខ្ញុំ»។
លោកស្រី ទ្រី ដាណា ក៏បានរៀបរាប់ពីឈឺចាប់និងមានរបួស្នាមលើរាងកាយបន្ដទៀតថា «ស្លាកស្នាមលើរាងកាយ វាមិនស្មើនឹងឈឺចាប់ក្នុងចិត្ត ហើយប្រឹងទ្រាំទេ ខ្ញុំអាណិតពុកម៉ែខ្ញុំ ដែលមិនអាចការពារខ្លួនឯងបាន ឱ្យគេធ្វើបាបបែបនេះ អោយគេធ្វើបាបរាងកាយកូនពួកគាត់ ខ្ញុំខុសអី ខំប្រឹងគ្រប់បែបយ៉ាង គ្មានពេលសម្រាក គឺដើម្បីគ្រួសារ និងកូនៗ ចុងក្រោយទទួលបានការតបស្នងបែបនេះ។ ខ្ញុំធ្លាប់ប្រាប់គាត់ហើយ បើគាត់ព្រមដោះលែងខ្ញុំដោយសន្តិវិធី យើងនឹងរស់នៅមានក្ដីសុខរៀងខ្លួន តែគ្រួសារ បងប្អូន និងម្ដាយគាត់ មិនព្រមទេ នៅតែតាមបង្ខូចឈ្មោះខ្ញុំ។ ខ្ញុំសុំចុះ យើងចប់គ្នាត្រឹមហ្នឹង ឈប់រករឿងខ្ញុំទៀត អាណិតកូន សូមមនុស្សប្រុសគ្រប់រូប នឹកឃើញពេលស្រលាញ់ថ្នាក់ថ្មមប្រពន្ធដំបូងផង មិនបានច្រើន សុំត្រឹម ៥០% ពេលជួបដំបូងក៏បាន យល់ពីអារម្មណ៍មនុស្សស្រី ផ្ដល់ការអាណិតខ្លះផង»។
តាមរយៈសំណេរខាងលើនេះ គេបានក៏ដឹងថា លោកស្រី ទ្រីដាណា បញ្ជាក់ពីជំហរដាច់ខាតគឺមិនអាចងាកក្រោយវិញបានទេ ការរស់នៅម្នាក់ឯងដោយសប្បាយចិត្តជាងមានគ្នាគឺជាជម្រើសល្អសម្រាប់លោកស្រី។ លោកស្រីបានអំពាវនាវឱ្យភាគីខាងអតីតស្វាមី រក្សាភាពថ្លៃថ្នូ និងឈប់បង្កាច់បង្ខូចកេរ្ដី៍ឈ្មោះរបស់លោកស្រី។ លោកស្រីថា ឈប់ចប់រឿងរ៉ាវទាំងអស់ដោយសន្តិវិធី ដើម្បីរស់នៅមានក្ដីសុខរៀងៗខ្លួន៕
