សកម្មភាពគំរាមភ្ជង់យកប្រាក់និងគ្រឿងអលង្ការចេញពីផ្ទះថៅកែអនឡាញ ឈ្មោះ អ៊ាន សៀវម៉ី ដោយក្រុមចោរប្រដាប់អាវុធដែលមានគ្នា ៥នាក់ស្លៀកឯកសណ្ឋានសមត្ថកិច្ច បានផ្ទុះកក្រើករាជធានីភ្នំពេញ និងមានការចាប់អារម្មណ៍ច្រើនពីសំណាក់សាធារណជន។ ផ្ទៃរឿងនៃអំពើគំរាមភ្ជង់យកប្រាក់ តាមរយៈការបន្លំខ្លួន កាន់ដីកាបង្គាប់ខ្លួនក្លែងក្លាយ ចូលចាប់ខ្លួនស្ត្រីជាអ្នកលក់ឡេអនឡាញ អា៊ន សៀវម៉ីនេះ បើពិនិត្យឱ្យលម្អិតគឺមានការរៀបចំគម្រោងផែនការយ៉ាងលម្អិតមិនចាញ់រឿងស៊ើបអង្កេតហុងកុងប៉ុន្មាននោះទេ។
ដំណើរដើមទងនៃសាច់រឿងភ្ជង់គំរាមយកប្រាក់នេះបានកើតឡើង នៅវេលាម៉ោង១០និង៤០នាទី ថ្ងៃទី១៩ ខែធ្នូ ឆ្នាំ២០២១ ដោយក្រុមចោរមានគ្នា៥នាក់ស្លៀកពាក់ឯកសណ្ឋានសមត្ថកិច្ច កាន់ដីបង្គាប់នាំខ្លួន បន្លំចូលចាប់ខ្លួនថៅកែឡេល្បីឈ្មោះ អ៊ាន សៀវម៉ី រួចហើយធ្វើសកម្មភាពភ្ជង់គំរាមយកប្រាក់តែម្ដង។ ក្រោយក្រុមជនល្មើសចាកចេញប្រមាណ៧នាទី ប្អូនប្រុសរបស់ជនរងគ្រោះ បានទូរស័ព្ទមកកាន់លេខ១២៩១ របស់អាវុធហត្ថរាជធានីភ្នំពេញ ដើម្បីសុំការអន្តរាគមន៍។ កងកម្លាំងជំនាញបានចុះទៅដល់កន្លែងកើតហេតុភ្លាម និងបានរកឃើញដីកាបង្គាប់នាំខ្លួនឈ្មោះ អ៊ាន សៀវម៉ី ដែលជនល្មើសទម្លាក់ចោល គឺជាដីកាក្លែងក្លាយ ចំណែកឯកសណ្ឋានសមត្ថកិច្ចដែលក្រុមចោរបានពាក់ធ្វើសកម្មភាពនាពេលនោះ ក៏សន្និដ្ឋានបានថាជាការក្លែងបន្លំ។
បន្ទាប់មកអាវុធហត្ថរាជធានី ភ្នំពេញ បានបើកកាស្រាវជ្រាវ កំណត់មុខសញ្ញា ដោយធ្វើការផ្ទៀងផ្ទាត់ ភិនភាគពួកចោរ និងរថយន្តធ្វើសកម្មភាព រកឃើញតម្រុយថា ករណីនេះ មានជាប់ពាក់ព័ន្ធជាមួយកូនចៅផ្ទាល់របស់ លោកមេបក្សខ្មែរក្រោក គឺលោក សុខ សុវណ្ណវឌ្ឍនាសាប៊ុង ឬហៅ William Guang ទើបកម្លាំងជំនាញអាវុធហត្ថរាជធានីភ្នំពេញ ក៏បានសម្ងំឃ្លាំមើលមុខសញ្ញា អស់ពេលមួយយប់មួយថ្ងៃ។
យោងតាមរបាយការណ៍ពីកងកម្លាំងរាជអាវុធហត្ថ ក្រោមការចង្អុលបង្ហាញពីលោកនាយឧត្តមសេនីយ៍ សៅ សុខា អគ្គមេបញ្ជាការ កងយោធពលខេមរភូមិន្ទ មេបញ្ជាការ កងរាជអាវុធហត្ថលេខាលើផ្ទៃប្រទេស និងទទួលបានការអនុញ្ញាតពីលោក ព្រះរាជអាជ្ញា ច្រឹងខ្មៅ បានចាត់ឱ្យលោកព្រះរាជអាជ្ញារង សិត វណ្ណៈ ចុះមកសម្របសម្រួល កម្លាំងអាវុធហត្ថរាជធានីភ្នំពេញដឹកនាំ ដោយឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេសនិងមេបញ្ជាការកងរាជអាវុធហត្ថរាជធានីភ្នំពេញ បានចុះសំដៅ ទៅកាន់ផ្ទះរបស់លោក William Guang ដែលស្ថិតក្នុងបុរីប៉េងហួត ផ្លូវ៦០ម៉ែត្រ ដោយជំហ៊ានដំបូង ឃាត់បានមនុស្សចំនួន២នាក់ ដែលបានបើកឡានចេញពីផ្ទះរបស់លោកយកទៅសួរនាំ រួចហើយបន្តសម្រុកចូលទៅផ្ទះដែលជាសម្បុកចោរ ឃាត់បានខ្លួនមនុស្ស១០នាក់បន្ថែមទៀត សរុប១២នាក់ (ប្រុស៩នាក់និងស្រី៣នាក់) ដោយក្នុងនោះរួមទាំងលោក William Guang ប្រធានគណបក្សខ្មែរក្រោកផងដែរ។
មេបក្សខ្មែរក្រោកដែលជាមេក្រុមចោរប្រដាប់អាវុធខាងលើបានសារភាពថា ប្រតិបត្តិការគំរាមភ្ជង់យកប្រាក់ផ្ទះ អ៊ាន សៀវម៉ីគឺមានរូបលោកជាអ្នកដឹកនាំដោយផ្ទាល់ រួមនឹងកូនចៅ៤នាក់ផ្សេងទៀត ប្រដាប់ដោយអាវុធចំនួន៥ដើម (AK ១ដើម និងកាំភ្លើងខ្លី៤ដើម) បានចូលទៅបន្លុះជាសមត្ថកិច្ចចុះអនុវត្តដីកា ហើយក៏ឆ្លៀតឱកាស ភ្ជង់បន្ល់ម្ចាស់ផ្ទះ។
បុគ្គលឈ្មោះ វីល្លៀម គ័ង បានឱ្យសមត្ថកិច្ចដឹងពីសកម្មភាពក្នុងពេលប្រព្រឹត្តិបទល្មើសនោះថា ពេលចូលក្នុងផ្ទះលោកបានកាន់កាំភ្លើងខ្លី១ដើម ឧបករណ៍ផ្ដាច់សេវាទូរស័ព្ទ១គ្រឿង និងស្ពាយសាក់កាដូ១ តែដោយសារតែលោកមីញ៉ូបភ្នែក ហើយមិនបានពាក់វែនតាម ទើបលោកត្រលប់មកក្រោយអង្គុយចាំក្នុងរថយន្តវិញ។ បន្ទាប់ពីកូនចៅទាំង៤នាក់ធ្វើសកម្មភាព យកបានគ្រឿងពេជ្រជាច្រើនឈុត ទើបនាំគ្នាចូលឡានបើកគេចខ្លួនតែម្ដងទៅ ប៉ុន្តែនៅតែមិនអាចគេចផុតពីសំណាញ់ច្បាប់។ ក្រៅពីកម្លាំងរាជអាវុធហត្ថបង្ក្រាបក្រុមចោរទាំងនេះ ក្រុមនគរបាលឯណោះវិញ ក៏បានចេញប្រតិបត្តិការដូចគ្នាដោយចាប់ឃាត់ខ្លួនជនសង្ស័យប្រុសមួយស្រីមួយនិងរថយន្ត Lexus GS300 ពណ៌ស អត់ស្លាកលេខ ដែលជនល្មើសគ្រោងយកទៅដុតកម្ទេចចោលបំបិទភស្ដុតាង
ថ្វីត្បិតតែក្រុមចោរ បានរៀបចំល្បិចនិងផែនការបានយ៉ាងល្អិតល្អន់យ៉ាងណាក៏ដោយ ក៏នៅតែមិនអាចគេចផុតពីការបំបែកសំណុំរឿងរបស់កងកម្លាំងមានសមត្ថកិច្ចដដែល ព្រោះនៅទីបំផុតជនល្មើសទាំងអស់ត្រូវសមត្ថកិច្ចចាប់ខ្លួនបាននិងដំណើរការតាមច្បាប់៕