លោក ហួរ សុបិន បានប្រាប់អ្នកសារព័ត៌មានត្រយង នៅក្នុងសារមន្ទីខ្លែងថា លោកចំណង់ចំណូលចិត្តលើវិស័យគំនូរនេះតាំងពីតូចមកម្ល៉េះ តែជាអកុសល លោកមិនបានចូលហ្វឹកហាត់ថ្វីដៃបន្ថែមនៅក្នុងសាលាវិចិត្រសិល្បៈនោះទេ តែលោកតាមរកក្ដីស្រម៉ៃឱ្យទាល់តែជួប។ លោកបានបញ្ចប់ការសិក្សាផ្នែកវិជ្ជសាស្ត្រ ហើយបានបោះបង់ការគូររូបអស់រយៈពេលជាច្រើនឆ្នាំទៀតផង។ លុះដល់ដើមឆ្នាំ២០១៩ ទើបលោកសម្រេចចិត្តវិលមកកាន់ជក់គូរគំនូរវិញ។ លោកបានវិវឌ្ឍន៍ទឹកដៃនៃការគូរគំនូរឡើងវិញនៅពេលដែលលោកចូលរួមប្រកួតក្នុងកម្មវិធីមួយរបស់ក្រុមហ៊ុន ក្បាច់អាត។
វិចិត្រករ ហួរ សុបិន បានសម្រេចក្ដីស្រម៉ៃរបស់ខ្លួន និងបានក្លាយជាម្ចាស់ជ័យលាភីជាច្រើនជាស្នាដៃ រាល់គំនូររបស់លោក គឺសុទ្ធតែបង្ហាញអំពីមនុស្សស្រី និងបង្កប់អត្ថន័យលើកកម្ពស់មនុស្សស្រីឱ្យសិទ្ធស្មើរគ្នានឹងបុរស។ លោកតែងតែប្រើរចនាបទបញ្ចូលគ្នានៃក្បាច់បែបប្រពៃណី និងសិល្បៈសហសម័យ និងថែមទាំងបានចូលរួមក្នុងការប្រកួតសិល្បៈជាច្រើននៅទូទាំងប្រទេស រហូតក្លាយជាសិល្បករខ្មែរដំបូងគេដែលត្រូវបានតែងតាំងឱ្យគូររូបនៅអាគាររដ្ឋាភិបាលសាធារណៈមួយផងដែរ។ វិចិត្រករ សុបិន បានបង្ហាញអត្តសញ្ញាស្នាដៃរបស់លោក តាមរយៈគំនូរមនុស្សស្រីដោយប្រើពណ៌ខ្មៅប្រផេះ ហើយរំលេចពណ៌ខៀវនៅផ្ទៃក្រោយឱ្យកាន់តែរស់រវើកថែមទៀត។
ជាង២ខែចុងក្រោយនេះ វិចិត្រកររូបនេះបាននាំយកស្នាដៃខ្លួនចូលរួមតាំងបង្ហាញក្នុងពិព័រណ៍ធំៗរួមមាន៖ នៅរ៉ូសវូដ, សារមន្ទីរជាតិ, និងពិព័រណ៍ជាក្រុមរបស់ Seeker។ ស្នាដៃរបស់លោករួមមានរូប ព្រះនាងឥន្ទ្រទេវី ដែលជាផ្សារភ្ជាប់ជាមួយនឹងរូបចម្លាក់ដ៏ល្បីល្បាញនៃរាជវង្ស រូបព្រះ រូបនារីរបាំ រូបលោកស្រីប៉ែរ៉ន រូបបងប្អូនស្រី និងភាគច្រើនជារូបមនុស្សស្រីតែម្ដង។ សុបិន បានព្យាយាមសម្រុកលើកយកស្នាដៃគំនូរបញ្ជ្រៀតទៅក្នុងព្រឹត្តិការណ៍ជាច្រើន ក៏ព្រោះតែលោកចង់មានចំណែកចូលរួមលើកកំពស់សិល្បៈខ្មែរ។
ស្នាដៃរបស់លោក ហួរ សុបិន សព្វថ្ងៃនេះ កំពុងដាក់តាំងបង្ហាញនៅក្នុងសារមន្ទីរខ្លែង រហូតដល់ថ្ងៃទី ១១ ខែមករា ឆ្នាំ២០២១នេះ ក្នុងពិព័រណ៌សិល្បៈសហសម័យកម្ពុជា៕
