បាងកក៖ សមាជិកព្រឹទ្ធសភាថៃ បានជួបប្រជុំគ្នានៅថ្ងៃអង្គារ សប្ដាហ៍នេះ ដើម្បីបោះឆ្នោតលើការធ្វើឱ្យអាពាហ៍ពិពាហ៍ភេទដូចគ្នាក្លាយជារឿងស្របច្បាប់ ដោយប្រទេសថៃ នឹងក្លាយជាប្រជាជាតិអាស៊ីអាគ្នេយ៍ដំបូងគេដែលទទួលស្គាល់ការរៀបអាពាហ៍ពិពាហ៍ភេទដូចគ្នា។ នេះបើយោងតាមការចេញផ្សាយដោយសារព័ត៌មាន CNA នាថ្ងៃអង្គារ ទី១៨ ខែមិថុនា ឆ្នាំ២០២៤។
យ៉ាងណាគេរំពឹងថា ព្រឹទ្ធសភា នឹងអនុម័តច្បាប់នេះ នឹងបន្ដសុំការយល់ព្រមពីព្រះមហាក្សត្រ Maha Vajiralongkorn មុនចូលជាធរមានក្នុងរយៈពេល ១២០ថ្ងៃបន្ទាប់ពីការបោះពុម្ភផ្សាយនៅក្នុងព្រះរាជសារផ្លូវការ។
ក្រោយអនុម័ត ប្រទេសថៃ នឹងក្លាយជាប្រទេសទី៣ ក្នុងទ្វីបអាស៊ី ដែលគូស្នេហ៍ភេទដូចគ្នាអាចចងចំណងអាពាហ៍ពិពាហ៍បាន បន្ទាប់ពីតៃវ៉ាន់ និងនេប៉ាល់ ហើយសកម្មជនកំពុងសង្ឃឹមថា អាពាហ៍ពិពាហ៍ភេទដូចគ្នាដំបូងគេដែលស្របច្បាប់នៅថៃ អាចនឹងត្រូវបានធ្វើឡើងនៅដើមខែតុលា។
ទាក់ទិននឹងបញ្ហានេះ លោក Tunyawaj Kamolwongwat សមាជិកសភាមកពីគណបក្សចលនាឆ្ពោះទៅមុខ បាននិយាយប្រាប់អ្នកសារព័ត៌មាន ថា «ថ្ងៃនេះជាថ្ងៃដែលពលរដ្ឋថៃនឹងញញឹម។ វា គឺជាជ័យជំនះសម្រាប់ប្រជាជនរបស់យើង ។ «ទីបំផុត ថ្ងៃនេះកំពុងកើតឡើងនៅប្រទេសថៃហើយ»។
ច្បាប់ថ្មីនេះ នឹងផ្ដល់សិទ្ធិគ្រប់បែបយ៉ាងឱ្យគូស្នេហ៍ភេទដូចគ្នា ឱ្យដូចទៅគូស្វាមីភរិយាផ្សេងៗដែរ ដែលមានដូចជា ច្បាប់ចិញ្ចឹមបីបាច់កូន និងការស្នងមរតក ជាដើម។
នាយករដ្ឋមន្ត្រីថៃ លោក ស្រេតថា ថាវីស៊ីន ដែលជាអ្នកគាំទ្រដោយបើកចំហចំពោះសហគមន៍ស្រឡាញ់ភេទដូចគ្នា (LGBTQ) បានឱ្យដឹងថា លោក នឹងរៀបចំកម្មវិធីជប់លៀងមួយសម្រាប់ក្រុមសកម្មជនគូស្នេហ៍ភេទដូចគ្នា នៅគេហដ្ឋានរបស់លោក ក្រោយពីការបញ្ចប់ការបោះឆ្នោតនៅរសៀលថ្ងៃនេះ។
សូមជម្រាបថា ការទទួលស្គាល់លើអាពាហ៍ពិពាហ៍ភេទដូចគ្នា កើតមានលើប្រទេសជាង៣០ រួចមកហើយ ដែលក្នុងនោះ ហូឡង់ គឺជាប្រទេសដំបូងគេលើពិភពលោក ដែលអនុញ្ញាតឱ្យមនុស្សភេទដូចគ្នារៀបការជាមួយគ្នាដោយស្របច្បាប់ គិតចាប់តាំងពីឆ្នាំ២០០១ មកម្ល៉េះ។ ដោយឡែកនៅក្នុងអាស៊ី មានតែប្រទេស២ ប៉ុណ្ណោះ ដែលទទួលស្គាល់ច្បាប់អាពាហ៍ពិពាហ៍ភេទដូចគ្នា នោះគឺ នេប៉ាល់ និងតៃវ៉ាន់។ ខណៈប្រទេសឥណ្ឌា កាលពីខែតុលាឆ្នាំមុន ក៏ត្រៀមចេញច្បាប់ថ្មីនេះផងដែរ តែត្រូវបានច្រានចោលវិញ ដោយតុលាការកំពូល បើទោះជាមានការយល់ព្រមពីសភាក៏ដោយ៕
