សិល្បៈជាតិ៖ លោក សាពូន មីដាដា បានចេញមកទម្លាយអារម្មណ៍ពិតរបស់ខ្លួនចំពោះកូនស្រី ដោយអះអាងថាទោះជាកូនមានដុងសិល្បៈដូចជាលោក និងអតីតភរិយាក្ដី ប៉ុន្តែលោកមានគោលជំហរ មិនចង់ឱ្យកូនបោះជំហានចូលក្នុងវិថីសិល្បៈនោះឡើយ។
ខណៈដែលអ្នកនិពន្ធ ដឹកនាំភាពយន្ត-ចម្រៀងខារ៉ាអូខេល្បីលោក កៅ សីហា បានប្រកាសបើកភ្លើងខៀវជួយដល់កុមារី សាពូន ដារ៉ាភិមាន ឱ្យចូលក្នុងវិស័យសិល្បៈដូចឪពុកម្ដាយ ស្រាប់តែលោក សាពូន មីដាដា បែរជាចេញមកបង្ហាញគោលជំហរមិនគាំទ្រឱ្យកូនស្រីបណ្ដូលចិត្តតែមួយរបស់ខ្លួនដើរតាមគន្លងរបស់លោក ដោយលោកបានរៀបរាប់ថា៖ «កូនស្រីមាសឪពុកច្រៀងចម្រៀងផ្ញើមកពុក ឱ្យពុកសណ្ដាប់សំរានលក់ស្រួល កូនស្រីដ៏កំសត់របស់ពុក ឆាកជីវិតគឺកំសត់យ៉ាងនេះហើយ គ្រប់រសជាតិជីវិតនឹងជម្រុញឱ្យកូនកាន់តែរឹងមាំ តែរឿងមួយដែលពុកសុំបើអាច គឺមិនចង់ឱ្យកូនដើរលើផ្លូវសិល្បៈដូចឪពុកទេ»
យោងតាមការរៀបរាប់នេះបានឆ្លុះបញ្ចាំងឱ្យឃើញច្បាស់ថាលោកមិនមានគោលបំណងចង់ឱ្យកូនស្រីរបស់ខ្លួនក្លាយជាតារានោះទេ តែលោកចង់ឱ្យកូនមានជីវិតជាមនុស្សសាមញ្ញធម្មតាច្រើនជាង។ លោកសាពូន មីដាដាខ្លួនឯងក៏បានបញ្ជាក់បន្ថែមដែរថា លោកមិនសោកស្ដាយទេដែលលោកបានដើរចេញពីសិល្បៈជិត១០ឆ្នាំ ព្រោះលោកបានយកពុទ្ធដីកា ព្រះពុទ្ធបរមគ្រូជាទីពឹង។
«៩ឆ្នាំហើយដែលពុកចាកចេញពីវិថីសិល្បៈដោយគ្មានស្ដាយស្រណោះបន្តិចឡើយ ចូរកូនរស់នៅក្នុងជីវិតដ៏សាមញ្ញមួយ ដោយយកព្រះពុទ្ធ ព្រះធម៌ ព្រះសង្ឃ ជាទីពឹងទីរលឹក រលាស់ខ្លួនចេញពីលោកីយ៍នេះ ទៅរកនិពាន្វជាត្រើយសុខណាកូន»។
ក្រោយមើលឃើញពីការលើកឡើងរបស់លោក សាពូន មីដាដា មិនចង់ឱ្យកូនសិល្បៈដូច្នេះ សាធារណជនកំពុងតែរង់ចាំមើលថា តើកុមារី សាពូន ដារ៉ាភិមាន ដែលមានដុងនិងទេពកោសល្យសិល្បៈដូចឪពុកម្ដាយ ថែមទាំងអាចលេងឧបករណ៍ Ukelele បានទៀតនោះ អាចនឹងបោះជំហានដើរលើផ្លូវសិល្បៈតាមការបើកឱកាសពីលោក កៅ សីហាទេ? ឬមួយក៏ត្រូវរស់នៅត្រឹមជាក្មេងស្រីសាមញ្ញធម្មតាតាមគោលបំណងឪពុក?
ចុះប្រិយមិត្តត្រយងវិញ តើយល់ស្របនឹងការលើកឡើងរបស់លោក សាពូន មីដាដា ដែរទេ?
