ប្រសិនបើអ្នកកំពុងតែតូចចិត្តអស់សង្ឃឹម ព្រោះតែអ្នកមានជីវភាពក្រីក្រលំបាក សូមនិយាយថាអ្នកមិនគួរអស់សង្ឃឹមនោះទេ ព្រោះជីវិតរបស់មនុស្សយើង ឱ្យតែមានការតស៊ូអ្នកប្រាកដជាទទួលបានជោគជ័យនៅថ្ងៃណាមួយជាក់ជាមិនខាន សំខាន់អ្នកត្រូវតែប្រឹងប្រែងដើរទៅមុខហើយមិនបោះបង់។ ថ្ងៃនេះសារព័ត៌មានត្រយង សូមបង្ហាញជូននូវឆាកជីវិត តស៊ូរបស់តារាសម្ដែងស្រី ៦រូប ដែលវិវត្តខ្លួនពីជីវភាពខ្វះខាតមកមានទ្រព្យសម្បត្តិ និងកិត្តិយសល្បីល្បាញ។ ចង់ដឹងថាតារាស្រីទាំងអស់នេះមានជីវិតលំបាក និង តស៊ូយ៉ាងណាខ្លះ សូមតាមដាន ខាងក្រោមនេះ ៖
១. Ariel Lin
បច្ចុប្បន្ននេះតារាសម្តែងតៃវ៉ាន់ល្បីរូបនេះមានតម្លៃខ្លួនរាប់លាន និងបានរៀបការក្នុងគ្រួសារអ្នកជំនួញម្នាក់។ បើជាធម្មតាអ្នកប្រហែលជាមិនអាចគិតទេថា នាងធ្លាប់រស់នៅក្នុងគ្រួសារដែលមានតែអ្នកម៉ាក់តែម្នាក់ហើយត្រូវចិញ្ចឹមបីបាច់កូនពីរនាក់គឺ នាង និងប្អូនប្រុសម្នាក់ទៀត។ ថ្លៃសិក្សា និងថ្លៃចំណាយប្រចាំថ្ងៃ ត្រូវខ្ចីប្រាក់ពីធនាគារដើម្បីយកមកចិញ្ចឹមជីវិត។
២. Zhao Liying
តារាសម្តែងស្រីល្បីឈ្មោះនៅដីគោក ប្រហែលជាមិនមានអ្នកមិនស្គាល់នាងនោះទេ បើនិយាយដល់ជីវភាពគ្រួសារ Zhao Liying កើតចេញពីគ្រួសារជនបទសុទ្ធសាធ។ ដោយសារលទ្ធភាពគ្រួសារមិនអំណោយផល នាងបានបោះបង់ក្តីស្រមៃក្នុងការរៀនផ្នែកអាកាសចរណ៍ ហើយចូលធ្វើការផ្នែកលក់ នៅក្រុមហ៊ុនតូចមួយ។ មិនមាន background គ្រួសារ មិនបានសិក្សាខ្ពង់ខ្ពស់ និងធ្លាប់ត្រូវគេប្រឆាំងដោយផ្នត់គំនិតតួស្រីត្រូវតែមានមុខ “វី” (V)។ ការតស៊ូក្នុងវិថីសិល្បៈរបស់នាងពិតជាលំបាកណាស់មិនខុសពីការតស៊ូក្នុងជីវភាពរស់នៅប៉ុន្មាននោះទេ ប៉ុន្តែមកដល់សព្វថ្ងៃ Zhao Liying មានទ្រព្យជាង ១០០ លានពិតជាទទួលជោគជ័យខ្លាំងក្នុងអាជីពការងារណាស់។
៣. Joey Yung
តារាចម្រៀងល្បីហុងកុងម្នាក់នេះ ត្រូវទទួលបន្ទុកក្នុងការរកស៊ីចិញ្ចឹមគ្រួសារតាំងពីអាយុ ១០ឆ្នាំជាង ដោយសារឪពុកនាងបានលែងលះជាមួយម្តាយនាងតាំងពីនាងមានអាយុត្រឹម ១៥ឆ្នាំ។ ដូច្នេះ នាងត្រូវចូលប្រលូកក្នុងសិល្បៈ តាំងពីក្មេងដើម្បីចិញ្ចឹមម្តាយនិងប្អូនប្រុស។
៤. Betty Sun
អ្នកប្រហែលជាធ្លាប់ស្គាល់ Betty Sun ក្នុងតួអង្គជាអ្នកម្នាងក្នុងរឿងចិនបុរាណ ប៉ុន្តែ ជីវិតពិតគឺជួបការលំបាកតាំងពីនាងនៅក្មេងម្ល៉េះ។ ជីវិតកាន់តែលំបាកព្រោះម្តាយឪពុកត្រូវលែងលះគ្នា ហើយមួយផ្នែកក៏ដោយសារ ម្តាយរបស់នាងគាំទ្រនាងចូលរៀនថ្នាក់សិល្បៈ ប៉ុន្តែឪពុកនាងមិនព្រម។ បន្ទាប់ពីលែងលះគ្នា Betty Sun រស់នៅជាមួយម្តាយ ដែលក្នុងរយៈពេល ៧ឆ្នាំក្រោយមក មិនមានកន្លែងស្នាក់នៅច្បាស់លាស់ រស់នៅផ្លាស់ប្តូរទីតាំងរហូត។ ម្តាយនាងបាត់បង់ការងារ ហើយថវិកាដែលបានក្រោយលែងលះក៏មិនមានច្រើនទៀត ធ្វើឱ្យនាងត្រូវតែលតោលសូម្បីតែលុយទិញអាហារហូបក៏រកសឹងមិនបានផង។
៥. Chaoyue Yang
តារាចម្រៀងក្នុងក្រុម Rocket Girls 101 និងជាតារាសម្តែងវ័យក្មេងរូបនេះ កើតចេញពីគ្រួសារជនបទ។ ឪពុកនិងម្ដាយនាងបានលែងលះគ្នាតាំងពីអាយុ ១២ឆ្នាំ ហើយនាងត្រូវបានឪពុកចិញ្ចឹមបីបាច់។ ដោយសារឪពុកនាងមានអាយុច្រើន ការងារមិនសូវហ្នឹងនរ នាំឱ្យនាងត្រូវឈប់រៀនតាំងពីមធ្យមសិក្សា ដើររកការងារធ្វើដើម្បីសម្រាលបន្ទុកគ្រួសារ។
៦. Rachel Momo
តារាសម្តែងស្រីក្នុងរឿង Nothing But Thirty មានភ្នែកធំមូលក្រឡង់ ដូចជាពាក់ឡែនម្នាក់នេះ ប្រហែលជាអ្នកមិនស្មានថាជីវិតពិតរបស់នាងកម្សត់ជាងក្នុងរឿងភាគទៀត។ កើតមកភ្លាមត្រូវឪពុកយកទៅបោះចោលក្នុងធុងសម្រាម សំណាងល្អដែលម្តាយបានរកឃើញវិញ។ ដោយសារទទួលយកចរិតប្តីខ្លួនមិនបាន ម្តាយនិងឪពុកនាងបានលែងលះគ្នាតាំងពីនាងនៅតូច ហើយនាងត្រូវរស់នៅជាមួយម្តាយតែពីរនាក់។ ទោះជាលំបាកយ៉ាងណា ម្តាយនៅតែខិតខំផ្គត់ផ្គង់ឱ្យនាងបានរៀនសូត្រដល់ចប់។ ប៉ុន្តែ នៅពេលឪពុកដែលធ្លាប់ជាប់គុកដោយសារប្រើប្រាស់គ្រឿងញៀនបានដឹងថានាងបានក្លាយជាតារា ក៏ទាមទារប្រាក់សំណងថ្លៃចិញ្ចឹម ៥០,០០០,០០០ យេន(ចិន) ហើយនៅបង្ខូចកេរ្តិ៍ឈ្មោះរបស់នាងទៀត។ សំណាងហើយដែលអ្នកគាំទ្រ នៅតែជឿជាក់លើនាង។
