ក្លិបមហាសេដ្ឋីម៉ាឡេស៊ី Johor Darul Ta’zim FC ប្រកាសតែងតាំងគ្រូបង្វឹកថ្មី Estaban Solari ជនជាតិអាហ្សង់ទីន ដើម្បីចូលមកជំនួសតំណែងលោក Héctor Bidoglio។ ខណ:លោក Héctor Bidoglio ត្រូវបានតែងតាំងជានាយកបច្ចេកទេសវិញម្តង។
លោក Esteban Solari បច្ចុប្បន្នមានវ័យ៤២ឆ្នាំ គឺជាអតីតកីឡាករក្រុមជម្រើសជាតិអាហ្សង់ទីន និងជាអតីតជំនួយការនៅក្រុម U23 អាហ្សង់ទីន និងជាប្អូនប្រុសបង្កើតរបស់អតីតគ្រូបង្វឹកក្រុមអធិរាស Real Madrid លោក Santiago Solari ។
នេះជាអាជីពជាគ្រូបង្វឹកលើកដំបូងរបស់លោក Esteban Solari ខណៈលោកធ្លាប់ជាសមាជិកក្រុម APOEL ប្រទេសស៊ីប (Cyprus) ចេញអុកឡុកទ្វីបអឺរ៉ុប កាលពីប៉ុន្មានឆ្នាំមុន ហើយគ្រានោះដែរលោកបានទាត់បញ្ជូលទីក្រុមយក្ស Real Madrid របស់អេស្ប៉ាញ នៅវគ្គ៨ក្រុមចុងក្រោយ ក្នុងរដូវកាលឆ្នាំ ២០១១-១២ ផងដែរ។
គួរដឹងថាក្លិបបាល់ទាត់ Jorhor Darul Ta’zim របស់ព្រះអង្គម្ចាស់ Tunku Ismail Sultan Ibrahim បានគ្រងតំណែងជើងឯកពានរង្វាន់លីគកំពូលរបស់ប្រទេសម៉ាឡេស៊ី Malaysia Super League ចំនួន៩ឆ្នាំជាប់ៗគ្នាហើយ គឺគិតចាប់តាំងពីឆ្នាំ២០១៤ មកម៉្លេះ។
ក្លិបដែលមានកីឡដ្ឋានជាប់ឈ្មោះជាកីឡដ្ឋានស្អាតជាងគេបំផុតនៅលើលោកក្នុងឆ្នាំ២០២០ មួយនេះបានឡើងមកលេងពានរង្វាន់លីគកំពូលម៉ាឡេស៊ី នៅរដូវកាល២០០៥-២០០៦ ហើយឈ្នះជើងឯកជាប់ៗគ្នាគឺនៅឆ្នាំ២០១៤,២០១៥,២០១៦,២០១៧,២០១៨,២០១៩,២០២០,២០២១ និង២០២២ នេះ៕
